რჩევები მარჯვენასაჭიანი ავტომანქანების მძღოლებს - Marao

საქართველოში უამრავი მარჯვენასაჭიანი ავტომობილი მოძრაობს, გამომდინარე მათი დაბალი ფასიდან, მისაღები ტექნიკური მდგომარეობიდან და შედარებით ახალგაზრდა ასაკიდან.

* მარჯვენასაჭიანი ავტომანქანების სიჭარბე ჩვენს გზებზე დამატებით ყურადღებას და სიფრთხილეს მოითხოვს მოძრაობის ყველა მონაწილისგან, მიუხედავად მათი ავტომანქანების საჭის მდებარეობისა, ვინაიდან საქართველოში მოძრაობა ხდება მარჯვენა მხარეს, შესაბამისად, გზების მონიშვნა, საგზაო ნიშნები და ინფრასტრუქტურა ადაპტირებულია სწორედ მარჯვენა მხარეს მოძრავი მარცხენასაჭიანი ავტომობილებისთვის.

* ნუ გაასწრებთ მარჯვნიდან. გასაგებია, რომ მარჯვენასაჭიანი ავტომანქანით მსგავსი მანევრის განხორციელებას იოლად შეძლებთ, მაგრამ ამავდროულად, შექმნით საშიშ ავარიულ სიტუაციას.

* მარჯვენასაჭიანი ავტომანქანა უბიძგებს მძღოლს (მით უმეტეს, თუ იგი მანამდე მარცხენასაჭიან ავტომანქანას მართავდა), რომ უნებლიეთ დაიკავოს მარცხენა მხარე ზოლის მონიშვნის იგნორირებით, რითაც კეტავს სივრცეს და აფერხებს მოძრაობას. ჩვევის გამომუშავებას გარკვეული დრო სჭირდება. ამიტომ ყურადღება ადევნეთ საგზაო მონიშვნას და ნუ დაკარგავთ თქვენს ზოლს.

* ყურადღებით იყავით მარცხენა ზოლში მოძრაობისას. როცა თქვენ წინ მიმავალი მანქანა გიფარავთ სივრცეს, შესაძლოა, ამ დროს შემხვედრი ზოლიდან ცდილობდნენ მოხვევას, ხოლო, როცა შენიშნავთ მანქანას, მანძილი უკვე კრიტიკულად მცირე იქნება.

* გასწრებისას რეკომენდებულია მანევრის შედარებით ადრე დაწყება, ვიდრე ამას მარცხენასაჭიანი ავტომანქანის მართვისას გააკეთებდით. ზოგ შემთხვევაში, მარჯვენასაჭიანი მანქანის მძღოლი სივრცეს მარჯვენა მხრიდან დაზვერავს ხოლმე და ამის შემდეგ ასწრებს მარცხნიდან, მაგრამ გახსოვდეთ, რომ დროის ამ მცირე მონაკვეთში სიტუაცია გზაზე შესაძლოა სრულიად შეიცვალოს.

* გასწრებისას ნუ დაეყრდნობით მარცხნივ მჯდომი მგზავრის მიერ მოწოდებულ ინფორმაციას იმის შესახებ, ღირს თუ არა მანევრის განხორციელება. გახსოვდეთ, რომ ავტომანქანას მართავთ თქვენ და მხოლოდ თქვენ უწყით მისი ტექნიკური შესაძლებლობები - მოასწრებთ კი გარანტირებულად მანევრის მშვიდობიანად დასრულებას?

* საუკეთესო გამოსავალი ე.წ. გასწრების კამერის დამონტაჟებაა, რომლის მეშვეობითაც ჯერ ეკრანზე აკონტროლებთ სივრცეს და შემდეგ იწყებთ მანევრს (გახსოვდეთ, რომ კამერა უნდა იყოს ხარისხიანი და ასახავდეს რეალურ მასშტაბებს). არსებობს ასევე ორი სარკის სისტემა, რომლის მეშვეობითაც ხედავთ სივრცეს მარცხენა წინა მხარეს, თუმცა მას აქვს ერთი ნაკლი - ღამით შემხვედრი ავტომანქანების მაშუქები ორმაგად დაგაბრმავებთ.

ეს და კიდევ სხვა სასარგებლო რჩევები წაიკითხეთ ბროშურაში "ავტომრჩეველი", ჟურნალ "ავტობილდის" მაისის ნომერთან ერთად.