უნიკალური სამედიცინო ლიტერატურა, რომელზეც 20 ექიმისგან შემდგარი ჯგუფი მუშაობს - Marao

"ძალიან მნიშვნელოვანია მკურნალობის პროცესში პაციენტის თანამონაწილეობა.
ეს წიგნი სწორედ ამას გასწავლით... დღეს მოსახლეობის დიდი ნაწილი დაბალი დონის განათლების გამო თვითმკურნალობას არასწორად იწყებს, რაც, შეიძლება, სავალალო შედეგით დასრულდეს. განათლებული პაციენტი კი უკეთესად ითანამშრომლებს ექიმთან"

სამედიცინო სფეროს მოღვაწეები თუ დაინტერესებული პირები მალე მსოფლიოში ცნობილი ფარმაცევტული კომპანიის Merck-ის სამედიცინო წიგნს გაეცნობიან. ის მსოფლიოში აღიარებული 300 სამედიცინო ექსპერტის მიერ შეიქმნა, რაც წიგნის სანდოობასა და ხარისხს განსაზღვრავს. ნაშრომის გადმოქართულებაზე კი 20 ექიმისგან შემდგარი ჯგუფი მუშაობს. წიგნი მორგებული იქნება როგორც პროფესიონალებზე, ასევე არაპროფესიონალებზე, რომელთაც სურვილი აქვთ, სამედიცინო სფეროში მეტი ცოდნა შეიძინონ. ექიმთა ჯგუფს ცნობილი მკურნალები, დოქტორები: გურამ კიკნაძე და გივი ჯავაშვილი ხელმძღვანელობენ.

გურამ კიკნაძე: - Merck-ის გამოცემა მსოფლიოში კლასიკურ ვარიანტად ითვლება, ყოველ 4-5 წელიწადში ერთხელ გამოდის და მტკიცებულებებით გამყარებულ მასალებს შეიცავს. აქამდე არსებული სამედიცინო ლიტერატურისგან განსხვავებით, აერთიანებს მაღალი დონის, დეტალურ და უხვ ინფორმაციას.

- რამდენად მნიშვნელოვანია Merck-ის სამედიცინო ენციკლოპედია სამედიცინო სფეროს განვითარებისთვის?

- სამედიცინო მომსახურების ხარისხი ძირითადად, ორი კომპონენტით არის წარმოდგენილი. ერთია სამედიცინო პერსონალი, მეორე - პაციენტი და მისი განათლება.

ძალიან მნიშვნელოვანი საკითხია მკურნალობის პროცესში პაციენტის თანამონაწილეობა. ეს წიგნი სწორედ ამას გასწავლით. მოიცავს სამედიცინო დახმარების გაწევის, ჯანმრთელობის შენარჩუნებისა და მკურნალობის გარკვეულ ეტაპებს.

- ვინ მუშაობს წიგნის მომზადებაზე?

- წიგნზე მუშაობს პროფესიონალი ქართველი ექიმების ჯგუფი. მათ კარგად იციან საქმე და შეუძლიათ კვალიფიციურად თარგმნონ.

"პალიტრა L"-ის ეს გამოცემა საზოგადოებისთვის ძალიან საჭირო და მნიშვნელოვანია. არის ასეთი ტერმინი - "იურიდიული უწიგნურობა~, რაც იმას ნიშნავს, რომ მოქალაქეთა დიდი ნაწილი საკანონმდებლო საკითხებში ვერ ერკვევა. მსგავსი სიტუაციაა მედიცინაშიც - მოსახლეობის დიდი ნაწილი ამ სფეროში დაბალი დონის განათლების გამო თვითმკურნალობას არასწორად იწყებს, რაც შეიძლება სავალალო შედეგით დასრულდეს. განათლებული პაციენტი კი უკეთესად ითანამშრომლებს ექიმთან. შეიძლება ითქვას, რომ ეს პროექტი უპრეცედენტოა საქართველოში. წიგნი ხელს უწყობს საზოგადოებაში სამედიცინო ცოდნის ამაღლებას.

თამარ მელიქიძე, ოჯახის ექიმი: - წიგნი დაეხმარება სამედიცინო დარგის სტუდენტებსაც. გამოცემა სანდო, მტკიცებულებებზე დაფუძნებული და პროფესიონალი ექიმების მიერ მაღალ დონეზეა ნათარგმნი. მსგავსი გამოცემა ქართველი მკითხველისთვის ხელმისაწვდომი არასდროს ყოფილა.

გივი ჯავაშვილი: - ამ წიგნით შეიძლება მივიღოთ თანამედროვე ინფორმაცია სამედიცინო სფეროს ყველა სპექტრის შესახებ, რაც დაგვეხმარება, გავეცნოთ ფარმაკოლოგიას, გენეტიკას, ციტოლოგიას და სხვა სფეროებს, ასევე გვირჩევს, როგორ ვითანამშრომლოთ ექიმთან, სხვადასხვა დაავადების შემთხვევაში. მოგეხსენებათ, ექიმისა და პაციენტის თანამშრომლობა აუცილებელია, რაც პაციენტის ინფორმირებულობას მოითხოვს. ქართულ ენაზე ამ დონის ნაშრომი ჯერ არ გამოცემულა. შვიდტომეულის პირველი წიგნის წაკითხვას თებერვალში შეძლებთ, ამ ტომში ბიოლოგიის, ანატომიის, კლინიკური ფარმაკოლოგიის, კვებისა და სხვა სფეროების იმ ძირითად ინფორმაციას გაეცნობით, რომელიც ავადმყოფობასთან გამკლავებაში დაგეხმარებათ.

ვიმედოვნებ, ეს გამოცემა თქვენს სამაგიდო წიგნად იქცევა.

ეკა გადახაბაძე