თუ ახლო მომავალში მგზავრობას აპირებთ, ეს სტატია წაიკითხეთ! - Marao

დასასვენებლად წასვლას გეგმავთ? თუ ხანგრძლივი მგზავრობა გელით თვითმფრინავით, ავტომანქანით ან გემით, იზრუნეთ წინასწარ, რომ მაქსიმალურად კომფორტულად იმგზავროთ...

ავტობუსი, მანქანა, გემი

ბევრი ადამიანი ვერ იტანს ავტოტრანსპორტით მგზავრობას. არასასიამოვნო სიმპტომები თავს იჩენს მიხვეულ-მოხვეულ, დანგრეულ გზებზე სწრაფად სიარულის დროს, თუ გემით მგზავრობთ - რწევის დროს (ზღვის ავადმყოფობა). ამისგან დაზღვეული არც ბავშვები და არც მოზრდილები არ არიან.

ადამიანებს, რომლებიც ვერ იტანენ მგზავრობას, აღენიშნებათ თავის ტკივილი, ნერწყვის ჭარბი გამოყოფა, გულისრევის შეგრძნება, ღებინება, ცივი ოფლი.

იმისათვის, რომ თავიდან აიცილოთ არასასიამოვნო შეგრძნებები და გზაში დრო მხიარულად და უზრუნველად გაატაროთ, შეიძინეთ აფთიაქებში სპეციალური ჰომეოპათიური პრეპარატები. ისინი აბსოლუტურად უსაფრთხოა და ძვირიც არ ღირს.

გამგზავრების წინ ნუ მიიღებთ მძიმე და ცხიმიან საკვებს. გასვლამდე 1,5-2 საათით ადრე მსუბუქად წაიხემსეთ. შეეცადეთ, ტრანსპორტში ყველაზე უსაფრთხო ადგილები დაიკავოთ. ავტობუსში - წინა რიგში დაბრძანდით, გემზე კი შეარჩიეთ ადგილი გემის კიჩოზე ან ზედა გემბანზე. შეეცადეთ, მოთავსდეთ მოძრაობის მიმართულებით და გზაში ნუ წაიკითხავთ. თუ იცით, რომ ზღვის ავადმყოფობა გაქვთ, თან ლიმონი, მომჟავო გემოს მქონე შაქარყინული ან ჯინჯერის (კოჭა) ნაჭერი წაიღეთ. ზემოთ ჩამოთვლილი პროდუქტები უსიამოვნო სიმპტომების მოხსნაში დაგეხმარებათ. თუ გულისრევის შეგრძნება ტრანსპორტის მოსახვევში შესვლის დროს გაგიძლიერდებათ, გადახარეთ სხეული სწორედ ამ მოსახვევების მხარეს.

თვითმფრინავი

ალბათ, შეგინიშნავთ, რომ ჰაერი თვითმფრინავში ყოფნის დროს განსხვავდება მიწის ჰაერისგან. ის თვითმფრინავში უფრო მშრალი, ცივი და განმუხტულია (ანუ ნაკლებ ჟანგბადს შეიცავს). ეს ნებისმიერ შემთხვევაში აისახება ადამიანის განწყობასა და ჯანმრთელობის მდგომარეობაზე. ხანგრძლივი ფრენის დროს განსაკუთრებით კანი ზარალდება. ამიტომ მიიღეთ ბევრი სითხე, გამოიყენეთ თერმული წყალი კანის დასატენიანებლად ან დაიდეთ სახეზე უფერო გელის ნიღაბი (გაიჩერეთ 20 წთ, შემდეგ ნიღბის ნარჩენები სველი ხელსახოცით მოიშორეთ).

ხანგრძლივი ჯდომის შედეგად ხშირად ადამიანებს ფეხები უშუპდებათ და სტკივათ. ამის თავიდან ასაცილებლად გირჩევთ ვენების მატონიზირებელი სპრეის გამოყენებას. მისი შესხურება კოლჰოტზეც კი შეიძლება (თუ წელიწადის ცივ პერიოდში მგზავრობთ). ვენების სპრეი არ სვრის სამოსს და სწრაფად იწოვება.

როგორ ფიქრობთ, რატომ ანიჭებენ უპირატესობას თვითმფრინავით მგზავრობისას ტომატის წვენს? საქმე იმაშია, რომ დაბალი წნევის გამო ცაში სასმელები და პროდუქტები უფრო უგემურად გვეჩვენება. აი, ტომატის წვენს კი იგივე გემო უნარჩუნდება, ისევე, როგორც დიდი რაოდენობით მარილის, შაქრის ან სუნელების შემცველ რიგ კერძებს. თუმცა, თუ ხშირად გიშუპდებათ კიდურები, მოერიდეთ თვითმფრინავში მარილიან, გაზიან ან ზედმეტად ტკბილ სასმელებს, რადგან მათ ორგანიზმში სითხის შეკავების პროვოცირება შეუძლიათ.

ფრენის დროს უმჯობესია დალიოთ წყალი, ხშირად და პატარ-პატარა ყლუპებით. ასევე შეგიძლიათ მიირთვათ ჩაი, ყავა და წვენები.

ჯანსაღი რუჯი

ყველამ ვიცით, რომ უსაფრთხო რუჯის მისაღებად საჭიროა კანზე მზისგან დამცავი კრემების წასმა და მზეზე განსაზღვრული დროით გასვლა (დილის საათებში და საღამოს), როდესაც მზე ნაკლებად აქტიურია. მაგრამ ხშირად არ გამოდის ამ „წესების“დაცვა. მთელი წლის ლოდინის შემდეგ ერთი სული გვაქვს, დიდხანს ვიყოთ პლაჟზე, ვიცურავოთ, გავერთოთ პლაჟის თამაშებით... იმისათვის, რომ კანის დამატებითი დაცვა უზრუნველყოთ, დამცავ კრემს კიდევ ერთი საშუალება დაურთეთ: ვიტამინები გარუჯვისთვის. ეს ვიტამინი დაგეხმარებათ - დაიცვათ ყველაზე მგრძნობიარე კანიც კი ულტრაიისფერი სხივების მავნე ზემოქმედებისგან. თანაც, ეს ვიტამინები (შეიძინეთ აფთიაქებში) ხელს უწყობს თანაბარი და მდგრადი რუჯის მიღებას, იცავს კანს გამოშრობისა და პიგმენტური ლაქების გაჩენისგან. მათში შემავალი ანტიოქსიდანტები ინარჩუნებს კანის ახალგაზრდობას და აძლიერებს მის დამცავ ფუნქციებს, თავისთავად რუჯი ხომ ულტრაიისფერი სხივების ზემოქმედებაზე კანის დამცავი რეაქციაა. რაც უფრო მუქია კანის ფერი, მით უფრო დაცულია მზისგან.

ვიტამინები შემდეგნაირად უნდა მიიღოთ: 1 კაფსულა 1-ჯერ დღეში ჭამის დროს. უმჯობესია, მათი მიღება გამგზავრებამდე 2-3 კვირით ადრე დაიწყოთ. განაგრძეთ მათი მიღება შვებულების დროს და შემდგომ პერიოდში ხანგრძლივი მოქმედებისათვის. კურსის ჩატარების შემდეგ სასიამოვნოდ გაკვირვებული დარჩებით: თქვენი კანი ჯანსაღი და დატენიანებული იქნება, ხოლო ლამაზი, თანაბარი და მდგრადი რუჯი უყურადღებოდ არავის დატოვებს...