თავდაპირველად გთავაზობთ პატარა ტესტს... შეეცადე, გულახდილად უპასუხო შემდეგ კითხვებს:
1. მთელი შენი შეგნებული ცხოვრება გათხოვებას ცდილობ, მაგრამ როგორადაც არ ეცადე, მაინც ვერსად ნახე ადამიანი, რომელიც შენს ყველა მოთხოვნას დააკმაყოფილებდა?
2. გქონია ცხოვრებაში ისეთი კავშირი, რომელსაც ვერაფრით წყვეტდი, მიუხედავად იმისა, რომ ეს ურთიერთობა საშინლად გტანჯავდა?
3. ხომ არ გეჩვენება, რომ უცნაური, ასე ვთქვათ, გარეწრები გიზიდავს და ნორმალურ მამაკაცებს ახლოსაც არ იკარებ?
4. ნაცნობ-მეგობრების წრეში შენ ხომ არ ხარ ის ერთადერთი, ვისაც დღემდე არ შეუქმნია ოჯახი?
5. ხშირად გისვამენ კითხვას, რატომ უშვებ ხელიდან ბედისგან მონიჭებულ შანსს?
6. შფოთვით უყურებ ყოველდღე საკუთარ თავს სარკეში, მიუხედავად იმისა, რომ გარშემომყოფები გამუდმებით აღნიშნავენ შენს მომხიბვლელობას?
7. ბოროტად ხომ არ იყენებ ალკოჰოლს, ნარკოტიკებს, საჭმელს ან სექსს?
თუ შენ შეკითხვების უმეტესობას დადებითი პასუხი გაეცი, შესაძლოა, იმ ემოციური დაავადებით იტანჯები, რომელსაც ამერიკელმა ქალბატონებმა - ფსიქოლოგმა ელისაბედ მაკავოიმ და მწერალმა სიუზენ იზრაელსონმა - სახელად "მერილინ მონროს სინდრომი" უწოდეს.
მერილინ მონრო ლამაზი, სექსუალური და წარმატებული ქალი იყო. მასზე მილიონობით მამაკაცი ოცნებობდა! თუმცა, ის მათკენ მიისწრაფოდა, ვინც ცხოვრებას უნგრევდა. ყველაფერი კი - ვარსკვლავის მძიმე ბავშვობიდან დაიწყო.
პატარა მერილინის მამა გოგონას დაბადებისთანავე გაქრა. დედა ფსიქიკური აშლილობით იტანჯებოდა და გოგონას აღზრდა არ შეეძლო, ამიტომაც პატარა მერილინი დეიდას გაუგზავნა გასაზრდელად, დეიდამ თავის მხრივ, ბავშვი ბავშვთა სახლში ჩააბარა. შემდეგ ვინ არ იშვილა, 10-ზე მეტი ოჯახი გამოიცვალა.
გავიდა წლები, მერილინი გაიზარდა, დამშვენდა და ძალიან პოპულარულიც გახდა. წარმატება სულ თან სდევდა. მაგრამ ყველა ქვეყნისა და დროის სასურველ ქალს გულის სიღრმეში მაინც არ სჯეროდა, რომ ლამაზი იყო და სიყვარულს იმსახურებდა. მიუხედავად სილამაზისა, სექსუალურობისა და წარმატებისა, სარკეში მონრო შეუხედავ, უბედურ ქალს ხედავდა. როცა პატარა იყო, იმდენჯერ უარყვეს და დაამცირეს, რომ მთელი თავისი ცხოვრება და დრო იმას მიუძღვნა, რაც შეიძლება მეტი ადამიანისთვის შეეყვარებინა თავი.
სამჯერ გათხოვდა და სამჯერვე ისეთ მამაკაცს გაჰყვა, ვისაც არ ყვარებია. ყოველი განქორწინების შემდეგ თავს სულ უფრო და უფრო უბედურად გრძნობდა. ისეთი მამაკაცები უყვარდებოდა, ვინც საკუთარი მიზნებისთვის იყენებდნენ, ან ცოლიანები იყვნენ, ან ამცირებდნენ და როგორც პიროვნებას უარყოფდნენ...
და როცა ყველაფერი მთავრდებოდა, დამნაშავედ მხოლოდ საკუთარ თავს თვლიდა. მერილინს ძალიან ეშინოდა მარტოობის, გამუდმებით და სიგიჟემდე ეჭვიანობდა. ქრონიკული დეპრესია სტანჯავდა, რის გამოც მიეძალა ალკოჰოლს, ნარკოტიკებს, საძილე საშუალებებს, უწესრიგო სექსს... და 36 წლის ასაკში გარდაიცვალა.
მერილინ მონროს სინდრომით დაავადებულ ქალთა უმეტესობა - დისფუნქციური, გაჭირვებული ოჯახის შვილები არიან... ოჯახის, სადაც ბავშვი ვერ იღებს სითბოს, სიყვარულსა და მზრუნველობას. მიზეზები სხვადასხვა შეიძლება იყოს - ალკოჰოლიკი ან სამსახურს გადაყოლილი მშობლობი... და რაც მთავარია, დანგრეული ან დანგრევის პირას მყოფი ოჯახი.
თავის დროზე მშობლების სიყვარულს მოკლებული ქალი იცვლის და იცვლის პარტნიორს. "მე ვიმსახურებ, რომ ვუყვარდე!", "მე კარგი ვარ!" - ისევ და ისევ ცდილობს დაუმტკიცოს თავს, პარტნიორს და მთელ ქვეყანას.
მაკავოისა და იზრაელსონის მტკიცებით მერილინ მონროს სინდრომი განკურნებადია. მკვლევარები გვირჩევენ, რომ ქალმა, რომელსაც სურს, ამ სინდრომისგან გათავისუფლდეს, შემდეგ მცნებებს უნდა მისდიოს:
1. შევიყვარო თავი ისეთი, როგორიც ვარ.
2. ყოველდღიურად ვიზრუნო საკუთარ ჯანმრთელობაზე.
3. შეძლებისდაგვარად შემოვუშვა საკუთარ ცხოვრებაში სიკეთე და სიყვარული;
4. ვეცადო ვიცხოვრო ისე, რომ ირგვლივ ყველაფერი ჩემს მიზნებს, სურვილებსა და ამოცანებს დაემორჩილოს;
5. ვიზრუნო საკუთარ თავზე, გავიზარდო, როგორც პიროვნება;
6. მქონდეს მხოლოდ საკუთარი თავის იმედი, ვენდობოდე მხოლოდ საკუთარ თავს და მოვუსმინო მხოლოდ ჩემს გულისთქმას;
7. დავიცვა საკუთარი თავი დარდისგან, ტკივილსგან, ყველაფერი ნეგატიურისგან, ყველაფრისა და ყველასგან, რასაც ცუდი მოაქვს.
8. დავაფასო თავი, საკუთარი აზრები, იდეალები და ფასეულობები.