5 მარტივი ვარჯიში ორგანიზმის გასაჯანსაღებლად, რომელსაც სახლის პირობებში შეასრულებთ (+ გიფები) - Marao

ახალ კორონავირუსზე თქვენც გაიგებდით და ალბათ, სახლებში გამოკეტილები ცდილობთ დროის გაყვანას. ამდენი ფილმი, კულინარიული ექსპერიმენტები და სახლის დალაგება მოსაბეზრებელია. ამიტომ დროა, თავის მოვლაზეც ვიფიქროთ და ვირუსისგან შეშინებული და გაზარმაცებული სხეულები ტონუსში მოვიყვანოთ. ხომ გაგიგიათ, ქალი მუდმივად ფორმაში უნდა იყოსო, თან ვირუსთან გამკლავებას კარგი იმუნიტეტი სჭირდება.

სწორი, ჯანსაღი კვება და ყოველ დილით 30-წუთიანი ვარჯიში იმუნიტეტის გაძლიერებასა და სხეულის გაჯანსაღებაში აუცილებლად დაგემარებათ.

გთავაზობთ 5 მარტივ ვარჯიშს, რომელიც სახლის პირობებში სასიამოვნო შესასრულებელია.

ვარჯიშის დაწყებამდე მოსახერხებელი ტანსაცმელი შეარჩიეთ და სადმე ახლოს ბოთლით წყალიც დაიდგით. აუცილებელია ვიცოდეთ, რომ ვარჯიშისას სხეულზე დატვირთვა უნდა გადავანაწილოთ, რადგან ორგანიზმში თანაბრად შემცირდეს ცხიმები და ნახშირწყლები.

1. ვარჯიში გახურებით დავიწყოთ. ფეხები მხრების სიგანეზე გაშალეთ და ნელა, 15 ნახტომი გააკეთეთ. შემდეგ ცოტა ხანი შეისვენეთ და კიდევ 2-ჯერ გაიმეორეთ იგივე. სხეული გამოფხიზლდება და დანარჩენი 4 ვარჯიშისთვის მზად იქნება.

2. მრგვალი საჯდომი ყველა ქალს მოსწონს, ამიტომ ამაზეც უნდა ვიმუშაოთ. დადექით და წელში გაიმართეთ, ხელები მკერდთან მიიტანეთ და მუშტები შეკარით, ფეხები მხრების სიგანეზე გაშალეთ და ნელი მოძრაობით საჯდომის ვარჯიში დაიწყეთ. შეეცადეთ, ჩასვლისას საჯდომი უკან გამოწიოთ და ვარჯიშის დროს ქუსლები არ ამოძრაოთ.

3. ხელები და წელი გაუვარჯიშებელი არ უნდა დაგვრჩეს. თუ ჰანტელები არ გაქვთ, მაშინ დიდი წყლის ბოთლი დაიჭირეთ, 90 გრადუსზე გადაიხარეთ და მარტივი მოძრაობით ხელები გაავარჯიშეთ. არ დაგავიწყდეთ, წელი არ ამოძრაოთ და მაქსიმალური დატვირთვა ხელებზე გადაიტანეთ.

4. სკამი ან პატარა მაგიდა გაათავისუფლეთ და ვაჯიშისთვის ახლოს დაიდგით. ერთი ფეხი საშუალო სიმაღლის სკამზე დადეთ, წელში გაიმართეთ, ხელები ზევით ასწიეთ და ნელი მოძრაობით ჩაჯდომები დაიწყეთ. არ ამოძრაოთ წელი და ხელები, აქ დატვირთვა ფეხებზე უნდა წავიდეს.

5. როდესაც ბავშვები ვარჯიშს არ გვაცლიან და თან მუცლის ცხიმის შემცირება გვსურს, მარტივი გამოსავალი უნდა მოვძებნოთ. მყარ ადგილას დაწექით, ბავშვებიც ახლოს დაიწვინეთ და პრესის ვარჯიშებში პატარა შეჯიბრება მოაწყვეთ. ხელები კეფაზე დაილაგეთ და მკერდის ზედა ნაწილი სინქრონულად 15-ჯერ წამოსწიეთ, შემდეგ შეისვენეთ და კიდევ 2-ჯერ გაიმეორეთ იგივე. უკვე მუცელიც გავარჯიშებულია.

არ დაგავიწყდეთ, ყველა ვარჯიშისას ცხვირით შეისუნთქეთ ჰაერი და პირით გამოისუნთქეთ. ასე არ დაიღლებით და ბევრად პროდუქტიულადაც ივარჯიშებთ.