8 რეალური მიზეზი, როგორ გააკეთო ეკონომია პრაქტიკულად ყველაფერზე - Marao

მარტივი, მაგრამ აუცილებელი რჩევები, რომლებიც დაგეხმარებათ ფინანსების დაზოგვაში. თუკი წინა კვირის განმავლობაში შექმნილი მდგომარეობიდან გამომდინარე, მოგიწიათ უამრავი საყოფაცხოვრებო საშუალების, პროდუქტის შეძენა, ახლა ნამდვილად დადგა დრო, როცა ფიქრობთ, როგორ გადაანაწილოთ ფინანსები სწორად აუცილებლად შესაძენ ნივთებზე. ამას ემატება ბუნებრივი აირის, ელექტროენერგიისა და წყლის გადასახადი. ჩვენ მივაგენით მარტივ რჩევებს, რომლებიც დაგეხმარებათ ოჯახის ბიუჯეტის დაზოგვასა და სწორად განკარგვაში.

შეადგინეთ მენიუ ერთი კვირით ადრე

• ჩამოწერეთ, რა პროდუქტები გჭირდებათ კვირის განმავლობაში, იმისათვის, რომ კვირაში ერთხელ მოგიწიოთ სახლიდან გასვლა. ამით დაზოგავთ დროს, თუ რა მიირთვათ დღისა და კვირის განმავლობაში და ერთი საფიქრალით ნაკლები გექნებათ. აუცილებლად მიჰყევით ჩამოწერილ სიას, არ მოიმარაგოთ ზედმეტი პროდუქტები. ვინაიდან არ ვიცით, რამდენ ხანს გაგრძელდება არსებული მდგომარეობა, ამიტომ აუცილებელია ფინანსების დაზოგვა. შეძენილი პროდუქტებით შეგიძლიათ მარტივი და გემრიელი კერძების მომზადება, მით უმეტეს, რომ სოციალური ქსელები სავსეა მარტივი რეცეპტებით.

დაგეგმეთ კვების განრიგი

• შეეცადეთ, რომ ოჯახის ყველა წევრმა ერთ დროს მიირთვას და ვახშმის თუ სადილის მოსამზადებლად ერთი დრო აირჩიეთ. ეს რეჟიმი დაგეხმარებათ დროის ეფექტურად გადანაწილებასა და წონის შენარჩუნებაში. შეათანხმეთ ყველასათვის ოპტიმალური კვების განრიგი. გადაანაწილეთ საკვები ულუფების მიხედვით. ასე თავიდან აიცილებთ ზედმეტი საკვების მიღებას და წონაში მომატებას. არ დაგავიწყდეთ ოჯახის წევრებისთვის საყვარელი ხილის, თხილეულის, შოკოლადის მომარაგებაც.

გამოიყენეთ სმარტფონზე აპლიკაციები

• ეს დაგეხმარებათ, ონლაინდაათვალიეროთ მარკეტები, სადაც მოცემულია პროდუქტები თავიანთი ღირებულებით. ასე დაზოგავთ თანხას და ბევრად ნაკლები დაგიჯდებათ ქათმის, მაკარონის, წიწიბურას თუ სასურველი ტკბილეულის შეძენა. დაგეგმეთ კვირაში ერთი ან ორი დღე, რომელიც დაეთმობა შენაძენის გაკეთებას.

ნაკლები დრო შხაპზე

• იბანავეთ ტაიმერის დაფიქსირებით. ჩაინიშნეთ დრო, რამდენი ხანი გჭირდებათ ბანაობისთვის, მიღებულ ციფრს გამოაკელით 1 წუთი და დააყენეთ ზარი, რომელიც ყველა წყლის პროცედურის დასრულებას შეგატყობინებთ. ერთწუთიანი ეკონომია არ აისახება ბანაობის ხარისხსა და თქვენს განწყობაზე, სამაგიეროდ, დაზოგავთ თანხას და წყლის მოხმარებას.

ოთახიდან გამოსვლისთანავე გამორთეთ სინათლე

• კიდევ ერთხელ შეგახსენებთ, რომ ოთახში არსებული სინათლის დაზოგვა თქვენი იქ არყოფნისას აისახება თქვენსავე ფინანსებზე.

შეამცირეთ საყოფაცხოვრებო ტექნიკის გამოყენება

• ჩაიდანი, ყავის მადუღარა, უთო - საკმაოდ ბევრ ელექტროენერგიას მოიხმარს. სარეცხის მანქანაც დიდი რაოდენობით ელექტროენერგიას საჭიროებს. ამიტომ შეამცირეთ ეს დრო და კვირაში ერთხელ გამოყავით რეცხვისათვის.

შეამოწმეთ ტელეფონი ფასიან გამოწერებზე

• სახლში ყოფნის პერიოდში ბევრმა კომპანიამ გამოიჩინა ინიციატივა ვარჯიშებსა და წიგნების საკითხავ აპლიკაციებზე უფასოდ სარგებლობის თაობაზე. შესაბამისად, უმჯობესია თქვენს ელექტრონულ საფულეზე მიბმული აპლიკაციები დროებით გამორთოთ და ისარგებლოთ იმით, რაც უფასოდ გაქვთ მოცემული. გაითვალისწინეთ, რომ ნებისმიერი დანაზოგი თქვენს ფინანსურ მდგომარეობაზე აისახება.

გამოიყენეთ დახმარების პროგრამები

• დღესდღეობით გადავსებულ საავადმყოფოებსა და სამედიცინო დაწესებულებებში არსებული მდგომარეობიდან გამომდინარე, უმჯობესია, თუკი სერიოზული არაფერი აღგენიშნებათ, დარჩეთ სახლში და გამოიყენოთ ონლაინდახმარების პროგრამა ან  სამედიცინო დაწესებულების ექიმის ონლაინკონსულტაცია. ასე თავიდან აიცილებთ ზედმეტად სავარაუდო ინფიცირებულებთან კომუნიკაციას და უფრო მეტად იქნებით დაცული.

წყარო: goodhouse