ნებისმიერ ჩვენგანს დიეტის დაცვის დროს მიგვიმართავს ცხიმების მწველი პროდუქტებისთვის. ამ შემთხვევაში იგულისხმება საკვები პროდუქტები, რომლებსაც თუ მივიღებთ, წონაში აუცილებლად დავიკლებთ.
მართლაც რა საოცარი იქნებოდა, ეს რომ სიმართლე იყოს, თუმცა, სამწუხაროდ, ქალბატონებო, ეს მხოლოდ და მხოლოდ მითია.
სინამდვილეში ის პროდუქტები, რომლებიც ვითომდა ცხიმებს წვავს, შეიცავს სასარგებლო ნივთიერებებს და ძალიან მცირე რაოდენობით კალორიებს. იმისათვის, რომ თქვენი ეჭვები გავფანტოთ, გადავწყვიტეთ, მოგიყვანოთ პოპულარული "ცხიმების მწველი" პროდუქტების სია.
ანანასი
მითი: რამდენიმე ანანასს თუ შევჭამთ, კვირაში 2 კგ-ს დავიკლებთ.
რეალობა: ანანასი შეიცავს ფერმენტს, სახელწოდებით ბრომელაინი, რომლის მეშვეობითაც ადამიანის ორგანიზმი მარტივად გადაამუშავებს ცილოვან საკვებს, ხოლო მისი უხეში ქსოვილები ხელს უწყობს ნაწლავების სწორ მუშაობას. ამასთან, აქრობს შიმშილის გრძნობას.
გრეიპფრუტი
მითი: აქტიურად წვავს ცხიმებს და ყოველდღიურად გრეიპფრუტის ერთ ჭიქა წვენს თუ დავლევთ, მიუხედავად დღის განმავლობაში მიღებული საკვების რაოდენობისა, წონაში დავიკლებთ.
რეალობა: ორგანული მჟავები, რომლებსაც ეს ციტრუსი შეიცავს, ხელს უწყობს საჭმლის მონელებას. მთავარი ეფექტი კი გრეიპფრუტის მიღებისას სისხლში ინსულინის დაწევაა, რაც თავის მხრივ, მადის დაქვეითებას იწვევს.
ნიახური
მითი: ნიახური, პრაქტიკულად, მთლიანად წყლისგან შედგება. ამიტომაც მისი მიღებისას წონაში მომატება გამორიცხულია.
რეალობა: ეს ერთ-ერთი ყველაზე სასარგებლო და გახდომის მსურველთათვის შეუცვლელი პროდუქტია, მაგრამ არა იმიტომ, რომ ის მხოლოდ წყლისგან შედგება. ის შეიცავს დიდი რაოდენობით უჯრედისს, რაც შიმშილის გრძნობას კლავს და ამასთან, მინიმალური რაოდენობის კალორიას აწვდის ორგანიზმს.
კომბოსტო
მითი: ზრდის მკერდს
რეალობა: მკერდის ზომაზე კომბოსტო აბსოლუტურად არანაირად არ მოქმედებს, მაგრამ უჯრედისითა და წყლით მდიდარი პროდუქტი შესანიშნავად კლავს შიმშილის გრძნობას და თითქმის ნოლ კალორიას აწვდის ორგანიზმს. ასევე, კომბოსტო შეიცავს უამრავ ვიტამინს და სასარგებლოა მისი ყველა სახეობა: ყვავილოვანით დაწყებული, თეთრი და წითელი კომბოსტოთი დამთავრებული.
დარიჩინი
მითი: თუ ტკბილეულს დარიჩინს მოვაყრით, შეგვიძლია აღარ ვინერვიულოთ წონაზე.
რეალობა: დარიჩინი სისხლში შაქრის შემცველობას დაბლა სწევს, რაც ინსულინის მატებას უშლის ხელს. ფაფასა თუ იოგურტში 1/4 ჩაის კოვზი დარიჩინის დამატებით ორგანიზმს ცხიმის დაგროვებისგან დავიცავთ.
სინამდვილეში, ყველა ეს პროდუქტი წონაში დაკლების საქმეში კარგ სამსახურს გაგიწევთ. უბრალოდ, ნუ გადააჭარბებთ მათი შესაძლებლობის შეფასებისას. სწორად იკვებეთ და არ დაივიწყოთ სპორტი.