ნუცა კუხიანიძეს ქართველი მაყურებელი კარგად იცნობს. მან სამსახიობო კარიერა ჯერ კიდევ 9 წლის ასაკში დაიწყო, როცა რეჟისორმა გიო მგელაძემ მიიწვია ერთ-ერთ მთავარ როლზე მხატვრულ ფილმში „არა, მეგობარო“. ნუცამ შეასრულა მთავარი როლები ქართულ და უცხოურ კინოფილმებში: „27 დაკარგული კოცნა“, „კარგი ქურდი“, „მატილდა“, „ბინძური საქმე“, „გასეირნება ყარაბახში“, „მედიატორი“, „კონფლიქტის ზონა გასეირნება ყარაბახში-2“. 2005 წელს რამდენიმე მეგობართან ერთად დააფუძნა კინოსტუდია „სანგუკო“.
ამჯერად ნუცა კუხიანიძემ დათო გორგილაძის გადაცემაში ასევე ყველასთვის საყვარელი მსახიობის, ლევან აბაშიძის შესახებ ისაუბრა და მასთან შეხვედრა გაიხსენა. ნუცა კუხიანიძისა და ლევან აბაშიძის პროფესიული გადაკვეთა გიო მგელაძის ფილმში „არა, მეგობარო“ მოხდა:
„ბავშვი ვიყავი და უხერხულობის მომენტი მქონდა. არ ვიცოდი, რა სიტუაციაში ვიქნებოდი, დიდად არ მინდოდა, ვერ ვხვდებოდი, საერთოდ რა უნდა გამეკეთებინა და რას მოითხოვდნენ ჩემგან.
გიომ მითხრა, წამოდი, ლევანს გაგაცნობ; წამომყევი, არ გინდა, ფილმზე ნუ ფიქრობ, უბრალოდ, ლევანი მინდა გაგაცნოო.
იქ იყო ადამიანი, რომელიც გავიცანი, დავუმეგობრდი... ჩემი გადმოსახედიდან, ახალი აღმოჩენა იყო ჩემთვის და უკვე ყველაფერზე თანახმა ვიყავი, ფილმში რა იქნებოდა და როგორ. ფილმის გადაღება იმდენად ხანმოკლე იყო, იმდენად პატარა ვიყავი, სულ მაგათთან ერთად ვერ ვიქნებოდი, მაგრამ იყო მომენტები, როცა უნდა წავსულიყავი, გადამეღო, ლევანთან მეურთიერთა… ყველაზე ძალიან ამას ველოდებოდი.
ბოლოს რომ ვნახე, სუფრა იყო თუ რა, არ მახსოვს… ამოვიდა, სულ თეთრებში იყო. მე რაღაცაზე გავბრაზდი, ყურადღება არ მომაქცია, სავარაუდოდ, და ავვარდი ზემოთ, პროტესტის ნიშნად აღარ ჩამოვდიოდი. ლევანი მეძახდა, მივდივარ, მივდივარ, ჩამოდი, ჩამოდიო. მე იქიდან ვიყურებოდი და ვაკვირდებოდი სიტუაციას და მახსოვს, ზუსტად აქ იყო და ხელი დამიქნია, მოვალო, მოვალო კიდევ. ასე მითხრა და წავიდა” - იხსენებს ნუცა.