თავადი დადიანი - ერთი ღამით „გათხოვებული“ ცოლი მილიონი ოქროს სანაცვლოდ: კარგარეთელის ქუჩის სასახლის უნიკალური ისტორია - Marao
თავადი დადიანი - ერთი ღამით „გათხოვებული“ ცოლი მილიონი ოქროს სანაცვლოდ: კარგარეთელის ქუჩის სასახლის უნიკალური ისტორია
ვინც თბილისში, კარგარეთელის ქუჩაზე, ერთხელ მაინც მოხვედრილა, შეუძლებელია მისი ყურადღება ზღაპრულ შენობას არ დამსახურებინა. მაღალი ქონგურები, ლამაზად გაფორმებული კარნიზები და ღია ტერასა შენობას უჩვეულო, დედაქალაქისთვის ნაკლებად დამახასიათებელ სილუეტს აძლევს. სასახლემ დროს გაუძლო და დღესაც ინარჩუნებს დიდებულ იერს. ნამუშევარი გერმანელ არქიტექტორ პაულ შტერნს ეკუთვნის, შენობის კედლები კი უნიკალური სიყვარულის ისტორიას ინახავს.
აგრაფინა “ვეფხისტყაოსნის” დადგმაში მონაწილეობდა, სადაც ნესტან-დარეჯანის როლს ასახიერებდა. ამ წარმოდგენას გერმანელი პრინცი კონსტანტინე ოლდერბურგიც ესწრებოდა, რომელიც თბილისიდან ფოთამდე რკინიგზას აშენებდა. თავადი დადიანის მეუღლის - აგრაფინა ჯაფარიძის სილამაზით დატყვევებულმა პრინცმა მეუღლეს ცოლის თავი ერთი ღამით, მილიონი ოქროს სანაცვლოდ სთხოვა. თავადს სიხარბემ სძლია და დათანხმდა. სწორედ აქედან დაიწყო ახალი სიყვარულის ისტორიაც.
აგრაფინა ჭკვიანი ქალი ყოფილა. როდესაც ეს ამბავი შეიტყო, თავი დამცირებულად იგრძნო და პრინცს შეუთვალა: “ფული ჩემს ქმარს გადაუხადე და სურვილიც მან აგისრულოსო”. ოლდენბურგს უკითხავს, თუ რა უნდა გაეკეთებინა აგრაფინას გულის მოსაგებად. მას კი ულამაზესი სასახლის აშენება უთხოვია.
აგრაფინას სიყვარულით დატყვევებულმა პრინცმა სასახლე ექვს თვეში ააშენებინა. პრინცთან გატარებული ერთი ღამის შემდეგ აგრაფინამ მეუღლე მიატოვა და მასთან ერთად სასახლეში დაიწყო ცხოვრება. სამწუხაროდ, ამ საოცარ ისტორიას სევდიანი დასასრული აქვს. გადმოცემის თანახმად, პრინცესა აგრაფინა ბოლშევიკებმა სიყვარულის სასახლეში დაახრჩვეს. ამ ტრაგედიის შემდეგ ქალაქში ხმა დადიოდა, რომ თეთრ ტანსაცმელში ჩაცმული ქალის აჩრდილი დადიოდა და მისი მომხიბლავი კისკისი ესმოდათ. დღეს ერთ დროს „სიყვარულის სასახლედ“ წოდებული სახლი საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმად ფუნქციონირებს. რაც შეეხება უშუალოდ მუზეუმს, აქ დაცულია 300 ათასზე მეტი ექსპონატი. მუზეუმი ინფორმაციას მოგაწვდით ქართული თეატრის, მუსიკის, ცირკის, ხალხური შემოქმედების, ოპერისა და საბალეტო ხელოვნების განვითარებასა და ამ დარგში მოღვაწე ხელოვანთა შესახებ.
