ვიდეო: ბიჭი "გაღმა ნაპირიდან" - თედო ბექაურის ბრწყინვალე შესრულება და მაყურებლის ემოციები - Marao

თედო ბექაურმა 2009 წელს გიორგი ოვაშვილის ფილმში „გაღმა ნაპირი“ შესრულებული როლით თავი არა მხოლოდ საქართველოს, არამედ მთელ მსოფლიოს გააცნო. ფილმის პრემიერა ბერლინის საერთაშორისო კ/ფესტივალზე 2009 წლის 7 თებერვალს გაიმართა. 2009 წლის განმავლობაში ფილმი ნაჩვენები იყო ოცდაათამდე ქვეყანაში, ორმოცდაათამდე საერთაშორისო კინოფესტივალზე. თედო ბექაურმა შესრულებული როლისთვის არაერთი ჯილდო დაიმსახურა, მათ შორის, პალმ სპრინგის საერთაშორისო კ/ფესტივალი (აშშ) (2010) – ფიპრესის ჯილდო მამაკაცის როლის საუკეთესო შესრულებისათვის, დაკას საერთაშორისო კ/ფესტივალი (ბანგლადეში, 2010) – ჯილდო მამაკაცის როლის საუკეთესო შესრულებისათვის და სხვ.

„გაღმა ნაპირი“ თედო ბექაურის ცხოვრებაში ერთ-ერთი ყველაზე მნიშვნელოვანი მოვლენა იყო: „დედაჩემმა მიმიყვანა თვალის ექიმთან და იქ რიგში აღმოჩნდა ფილმის რეჟისორი გიორგი ოვაშვილიც - შვილები ჰყავდა მოყვანილი. მათ რაღაც სათამაშო ვერ გაიყვეს და ძიძგილაობაში ერთმა გვარიანად ჩააფარა მეორეს. ამის დანახვაზე გულიანად გადავიხარხარე, რითიც, როგორც აღმოჩნდა, მათი რეჟისორი მამის ყურადღება მივიქციე. გამომელაპარაკა, ზოგადი კითხვები დამისვა და მეც მორცხვად ვუპასუხე. ბატონი გიორგის მეუღლეს უთქვამს დედაჩემისთვის, რომ ფილმის გმირს ეძებდნენ და ჩემით დაინტერესდნენ. მერე თბილისშიც დამიბარეს. არ გაგიმართლებს ეგ ბავშვი, ტყუილად არ აიყვანოო, უთქვამთ, მაგრამ გიორგი ოვაშვილმა მაინც თავისი გაიტანა. მადლობელი ვარ მისი და იმ ბედნიერი დღის, როცა თვალის ექიმის რიგში მასთან ერთად მოვხვდი...“ - ამბობდა თედო ბექაური „კვირის პალიტრასთან“ ინტერვიუში.

"ახლა პატარას ველოდებით; ქორწილი ვერ გადავიხადეთ. შეზღუდვები რომ გამკაცრდა, სოფელში ჩამოვედი" - როგორ ცხოვრობს ბიჭი "გაღმა ნაპირიდან" და ვინ არის მისი რჩეული 

„გაღმა ნაპირის“ შემდეგ თედო ბექაურმა კიდევ არაერთ ფილმში ითამაშა. სწავლა კი თეატრალურ კოლეჯში გააგრძელა. ამჟამად ეროვნულ მუზეუმში მუშაობს და მის ცხოვრებაში არაერთი სასიამოვნო სიახლეა. თედო ბექაურმა რჩეულზე, ანი ხუციშვილზე იქორწინა და სულ ცოტა ხნის წინ ისინი პირველი შვილის, დემეტრეს მშობლები გახდნენ. წყვილი ბედნიერად ცხოვრობს და ოჯახურ კადრებს სოციალურ ქსელში მეგობრებსა და გულშემატკივრებსაც უზიარებენ.

ამჯერად თედო "ცეკვავენ ვარსკვლავების" მე-12 სეზონის ერთ-ერთი მონაწილეა. მისი მეწყვილე ანა ბირთველიშვილია.

პირველი ნომრის შესრულებამდე თედომ ისაუბრა, როგორ ემზადებოდა „ცეკვავენ ვარსკვლავებისთვის“.

„გავიზარდე ორბეთში, აქვე ვცხოვრობდით. ჩავედით კლინიკაში, სადაც შეგვხვდა რეჟისორი. მითხრა, მე რეჟისორი ვარ და ფილმში თუ ითამაშებო.  რა დაინახა ჩემში? ალბათ, გამომეტყველება და თვალის პრობლემა, რომელმაც დიდი წარმატება მომიტანა.

დაგვირეკა, ჩამოგვიყვანა თბილისში. ოთახში შემიყვანა და მითხრა, მე მაგიდაზე დავუკრავ და იცეკვეო. პირველად რომ დაუკრა, არ მიცეკვია და მერე ვიცეკვე. მაშინ მითხრა, რომ ეს ის ცეკვაა, რაც მე მინდაო.

მაგის მერე დაიწყო ჩვენი ურთიერთობა და ერთი საქმე.

„ცეკვავენ ვარსკვლავებში“ თავიდან გამიჭირდა, ცეკვასთან დიდად შეხება არ მქონია, მაგრამ ყველაფერი იმაზეა დამოკიდებული, როგორ გასწავლის ადამიანი“. – ამბობს თედო.