უარი ბალანჩინის ცოლობაზე და თანამშრომლობა ჰოლივუდის ლეგენდებთან - თამარ თუმანიშვილი: ამერიკაში მოღვაწე ქართველი ბალერინა - Marao

თამარ თუმანიშვილი - ქალი, რომელსაც ჯორჯ ბალანჩინი თავის მუზას უწოდებდა. ამერიკაში მოღვაწე ქართული წარმომავლობის ბალერინამ წარუშლელი კვალი დატოვა როგორც ბალეტის, ასევე ჰოლივუდის ისტორიაში.

ბავშვობა

თამარა ევგენია თუმანიშვილისა და რუსი სამხედროს, კონსტანტინე ზახაროვის ერთადერთი შვილი იყო. მისი მშობლების შესახებ ბევრი არაფერია ცნობილი. მხოლოდ ის ვიცით, რომ 18 წლის ევგენია ცოლად გაჰყვა კონსტანტინეს და წყვილი მენშევიკური მთავრობისგან თავის დაღწევის მიზნით საქართველოდან ჩინეთში გაემგზავრა. გზაში კონსტანტინე გაურკვეველი დაავადებით გარდაიცვალა - ამის ფონზე ქალს ნაადრევი მშობიარობა დაეწყო და თამარი მატარებელში დაიბადა. გაურკვეველი მიზეზის გამო დედამ შვილს თავისი გვარი მისცა.

ევგენიას მშობიარობაში ექიმი ვლადიმერ ბორეცკი-ხაზიდოვი დაეხმარა - ამის შემდეგ სწორედ მასთან ერთად გააგრძელა ცხოვრება და ოჯახი ჯერ ჩინეთში, შემდეგ ეგვიპტეში, ბოლოს კი პარიზში დასახლდა. სადაც ვლადიმერი ტაქსისტად, ევგენია კი მრეცხავად მუშაობდა. 

ცეკვა

თამარს ცეკვისადმი ინტერესი მაშინ გაუჩნდა, როცა 9 წლის ასაკში დიდ სცენაზე ანა პავლოვა ნახა. მალე კი  ოლგა პრეობრაჟენსკაიას სტუდიაში მოხვდა. „არასოდეს დამავიწყდება ის შთაბეჭდილება, რომელიც ჩემზე პატარა, გამხდარმა გოგონამ მოახდინა. ის ფეხისმოუცვლელად, ერთდროულად აკეთებდა ფეხის წვერებზე 64 ფუეტეს. ეს იყო თამარა თუმანოვა, მომავალში ცნობილი ბალერინა“ – იხსენებდა მსახიობი და მოცეკვავე ვიქტორია ტომინა. 

მოგვიანებით ანა პავლოვამ სტუდია მოინახულა და თავისი წარმოდგენისთვის რამდენიმე გამორჩეული მოცეკვავე აარჩია - ასე მოხვდა 11 წლის თამარა პარიზის დიდ სცენაზე. 1 წლის შემდეგ კი ჯორჯ ბალანჩინმა შეამჩნია და ამერიკაში მიიწვია. აქ თამარამ სიმღერის ნიჭიც გამოავლინა და ბროდვეის მიუზიკლში მიიღო მონაწილეობა. 

თამარას იწვევდნენ ისეთ ღონისძიებებზე საცეკვაოდ, როგორიცაა: ჰოლანდიის დედოფლისა და პრინცის გალა-საღამო და დიდი ბრიტანეთის მეფის, ჯორჯ VI-ის გამართულ გალა-საღამო.

• იმასაც ამბობენ, რომ ბალანჩინმა მას ცოლობა სთხოვა, თუმცა თამარას სულ სხვა ადამიანი უყვარდა. 

პირადი

თამარა თუმანოვას მეუღლე ამერიკელი დრამატურგი ქეი რობინსონი იყო. წყვილმა ერთმანეთი "დიდების დღეების" გადაღებაზე გაიცნო, რომელშიც თამარას პარტნიორობას გრეგორი პეკი უწევდა.

"ეს მშვენიერი, არაჩვეულებრივი ქორწინებაა... ყველაფერი მაქვს, რაც მინდა" - იხსენებდა თუმანოვა მოგვიანებით.ამის მიუხედავად, წყვილი ერთმანეთს 10-წლიანი ქორწინების შემდეგ დაშორდა. 

ჰოლივუდი

1956 წელს რეჟისორმა ჯინ კელიმ თამარა თავის ფილმში  "მიპატიჟება საცეკვაოდ" მიიწვია. ბერლინის საერთაშორისო ფესტივალის „ოქროს დათვის“ პრიზიორი გახდა. 1966 წელს ალფრედ ჰიჩკოკმა თუმანოვა ფილმში „Torn Curtain“ პოლ ნიუმენთან და ჯული ენდრიუსთან ერთად გადაიღო. 1970 წელს მონაწილეობა მიიღო ბილი უაილდერის ფილმში „The Private Life of Sherlock Holmes“.

გარდაცვალება

ცნობილია, რომ ევგენია თუმანიშვილს არ გაუწყვეტია ურთიერთობა ქართველ ნათესავებთან. თამარაც ხშირად ამბობდა, რომ ქართველი იყო. ევგენია ლოს-ანჯელესში დაკრძალეს.

„რა შეიძლება იყოს იმაზე მშვენიერი ჯილდო ქალიშვილისთვის, ვიდრე საკუთარ დედაში საუკეთესო მეგობრის პოვნა?“ - ამბობდა თამარა.

თამარა თუმანოვა 1996 წელს 77 წლის ასაკში გარდაიცვალა. დაკრძალეს დედის გვერდით. ანდერძის თანახმად, მთელი მისი ქონება ქველმოქმედებას მოხმარდა.