"მე და გია ხუთი დღით გაგვიშვეს რომში და მათი უზომოდ მადლობელი ვარ" - თამრიკო ჭოხონელიძე - Marao
"გამორჩეული საჩუქარი მივიღე, მე და გია 5 დღით რომში ვიყავით..." - თამრიკო ჭოხონელიძისა და გია როინიშვილის იტალიური არდადეგები და მოულოდნელი სიურპრიზი
თამრიკო ჭოხონელიძე ქართველი მომღერალი, მუსიკათმცოდნე, ფოლკლორისტი, პიანისტია. დაიბადა მუსიკოსების — ეთნომუსიკოლოგის, პროფესორ ევსევი (კუკური) ჭოხონელიძისა და ელისაბედ (ლიზიკო) კალანდაძის ოჯახში.
1973–1978 წლებში იყო ანსამბლ „მზიურის“ ერთ-ერთი წევრი. 1981 წლიდან საქართველოს ფილარმონიის სოლისტია. განსაკუთრებით აღსანიშნავია ვოკალური ნამუშევარი კინოფილმში „იავნანა“. მიღებული აქვს სამი თაობის საუკეთესო შემსრულებლის (1996) და ფესტივალ „თბილისური გაზაფხულის“ წლის საუკეთესო შემსრულებელის წოდებები (1995). კონცერტებზე ასრულებს ხალხურ და საესტრადო სიმღერებს.
1998 წელს დაჯილდოებულია ღირსების ორდენით, აგრეთვე, იაკობ გოგებაშვილის სახელობის პრემიით და დები იშხნელების სახელობის პრემიით დებთან, სოფიკო და თინიკო ჭოხონელიძეებთან ერთად. 2016 წლის 15 დეკემბერს ფილარმონიის დიდი საკონცერტო დარბაზის წინ გაიხსნა თამრიკო ჭოხონელიძის ვარსკვლავი. ჩატარებული აქვს სამი სოლო-კონცერტი - 1999, 2010 და 2016 წლებში.
თამრიკო ჭოხონელიძისა და გია როინიშვილის ურთიერთობა განხილვის საგანი არაერთხელ გამხდარა. წყვილი გარკვეული პერიოდის განმავლობაში ერთმანეთს დაშორდა, თუმცა მოგვიანებით ურთიერთობების აღდგენა და თანაცხოვრება კვლავ შეძლეს. მათ ორი შვილი, კოკო და მარიამი ჰყავთ, რომლებიც ხელოვნების სფეროში საქმიანობენ და საზოგადოება, ცნობილი მშობლების მსგავსად, მათაც კარგად იცნობს.
"მე და თამრიკოს ცხოვრებაში ბევრი კონფლიქტი გვქონია, მაგრამ ერთმანეთში ყოველთვის იმას ვეძებდით, რაც ან ვინც გვაერთიანებდა. ყოფილა წყენაც, მაგრამ მაინც ეს გაერთიანება გვშველოდა. თამრიკოს შემორიგება ადვილი არ არის, მაგრამ მას აქვს იმის ძალა, რომ იპოვოს მთავარი, სიმღერაშიც, ხელოვნებაშიც და გადაწყვეტილების მიღებაშიც. არც მე და არც ის არ ვართ მარტივი ადამიანები. ამიტომ ხშირად ყოფილა გაუგებრობა, მაგრამ დრო რომ გადის, ყველაფერი ლაგდება" - ამბობდა გია როინიშვილი.
"ფეთქებადი ვარ და არ მინდა, რომ ეს თვისება ჩემს შვილებს გამოჰყვეთ მრცხვენია, რომ ცხოვრების რაღაც მონაკვეთის განმავლობაში ჩემი ჯანმრთელობა სოციალურ ქსელს გადავაყოლე. ეს მონაკვეთი, მინდა, რომ საერთოდ ამოვიღო ჩემი ცხოვრებიდან. საშინელი ტალღა წამოვიდა. შეიძლება ვიმსახურებდი, მაგრამ ადამიანებმა ასე არ უნდა გაიმეტონ ერთმანეთი. ვერ გამოვასწორებ ამ ადამიანებს. მივხვდი, რომ ჩემს შვილებს მოვაკლდი. გარდა იმისა, რომ ყურადღება მოვაკელი, დავძაბე ისინი. ახლა ვბრაზობ და მრცხვენია ჩემი შვილების" - ამბობდა თამრიკო.
- თამრიკო ჭოხონელიძე დაბადების დღეს 18 იანვარს აღნიშნავს. ამ დღეს მას შვილებმა განსაკუთრებული სიურპრიზი მოუწყვეს და მეუღლესთან ერთად რომში გაუშვეს სამოგზაუროდ.
„გამორჩეული საჩუქარი მივიღე ჩემი შვილებისგან. მართლა ძალიან გადაღლილი ვარ და მითხრეს, შენ აუცილებლად გჭირდება ისეთ ქალაქში წასვლა, რომელიც განტვირთვაში დაგეხმარება და დადებითი ემოციებით აგავსებსო, ქალაქში, რომელიც შენ ძალიან გიყვარსო და ეს არის რომი. მე და გია ხუთი დღით გაგვიშვეს რომში და მათი უზომოდ მადლობელი ვარ. თავიდან ძალიან შევწუხდი, რომ ეს ხარჯი გაიღეს. ჩემი შვილები ძალიან პატიოსანი ცხოვრებით ცხოვრობენ. ალბათ, რამდენ ხანს აგროვეს თანხა ამისთვის და ამაზე ფიქრმა დამტანჯა, მაგრამ მერე მივხვდი, რომ სისულელე იყო ჩემი ასეთი განწყობა, უნდა მიიღო ის, რასაც გულით გჩუქნიან“ - ამბობს მომღერალი.
