სიყვარულის 29 წელი, ორი შვილი და ცხოვრების საინტერესო ამბები - რეზი არველაძისა და თეონა თავართქილაძის ოჯახი - Marao
სიყვარულის 29 წელი, ორი შვილი და ცხოვრების საინტერესო ამბები - რეზი არველაძისა და თეონა თავართქილაძის ოჯახი
რევაზ არველაძე - ქართველი ფეხბურთელი, ნახევარმცველი. 2009–2015 წლებში საქართველოს ფეხბურთის ფედერაციის გენერალური მდივანი - ეს ძმები არველაძეებიდან ყველაზე უფროსის, რეზი არველაძის ოფიციალური რეგალიაა. მისი ბიოგრაფია, კარიერის მნიშვნელოვანი მომენტები და გოლები კი, ალბათ, ბევრ თქვენგანს კარგად ახსოვს. რეზი თამაშობდა ევროპის სხვადასხვა მხარის გუნდებში. პროფესიონალური კარიერა დაიწყო თბილისის „დინამოში“. საზღვარგარეთ ითამაშა გერმანიასა და ბელგიაში. საქართველოში დაბრუნდა 1998 წელს. ეროვნულ ნაკრებში ჩაატარა 11 მატჩი.
გარდა რეზი არველაძის საფეხბურთო მიღწევებისა, ის და მისი ტყუპი ძმები, შოთი და აჩი, გულშემატკივრებისთვის განსაკუთრებული იუმორითა და უშუალობითაც გამოირჩევიან. დიდ სიყვარულს იმსახურებს მათი ოჯახიც.
რეზი არველაძე და თეონა თავართქილაძე
რეზი არველაძის მეუღლე წარმატებული დიზაინერი თეონა თავართქილაძეა, წყვილი უკვე 29 წელია, რაც ერთადაა.
„ჯერ კიდევ ერთი სასწავლო წელი მქონდა დარჩენილი, როცა გავთხოვდი. მე და რეზი ძალიან დიდი ხანი ვიცნობდით ერთმანეთს, ვმეგობრობდით და როგორ გადაიზარდა ურთიერთობა სიყვარულში, ვერ მივხვდით. როცა აღმოვაჩინეთ, რომ გვიყვარდა ერთმანეთი, დავქორწინდით.
რეზი მაშინ გერმანიაში თამაშობდა, მე საფრანგეთში ბოლო კურსზე ვსწავლობდი. თქვენ წარმოიდგინეთ, ის ერთი წელი ახალდაქორწინებულებმა ცალ-ცალკე გავატარეთ. გვენატრებოდა ერთმანეთი, მაგრამ ხშირად ვერ ვნახულობდით. მაშინ უვიზო მიმოსვლა არ არსებობდა და ერთმანეთის ქალაქებში წასასვლელად ვიზებს ველოდებოდით. მე ბევრი სამეცადინო მქონდა, რეზის უამრავი მატჩი, ვარჯიში“, - ამბობდა თეონა ერთ-ერთ ინტერვიუში.
კრიზისული პერიოდი თითქმის ყველა წყვილის ცხოვრებაშია, თუმცა რეზისა და თეონას მსგავსი დაბრკოლებები ნაკლებად ჰქონდათ, რაც, დიდწილად, რეზის იუმორის დამსახურებაცაა:
"მე მგონი, ჩვენ მშვიდად გადავიარეთ ყველა კრიზისული პერიოდი. ჩვენი მეგობრები იხდიან ქორწინების 25 წლისთავს, შეკრებილები ვიყავით და ამაზე ვსაუბრობდით, კრიზისებზე, შერიგებებზე, გაშორებებზე. ჩუმად ვიჯექი და მომერიდა ხმის ამოღება, რადგან მართლა არასდროს გვიჩხუბია. არ მქონდა არაფერი მოსაყოლი და ვიჯექი ჩუმად. ეს უფრო რეზიკოს ხასიათის დამსახურებაა, მისი იუმორის გრძნობის. ყოფილა შემთხვევა გავბრაზებულვარ რაღაცაზე, მაგრამ ისეთ რამეს გეტყვის; რომ გაბრაზება არ გამოდის, უცებ გადაგივლის", - იხსენებდა თეონა.
რეზის და თეონას ორი ვაჟი, ნიკა და ვატო ჰყავთ, რომლებიც უკვე დიდები არიან და დამოუკიდებელი ცხოვრება აქვთ:
"ბედნიერება სიყვარულია. სიყვარულში ვგულისხმობ ყველანაირ სიყვარულს, შვილების მიმართ უპირობო სიყვარულიდან დაწყებული, ქალისა და მამაკაცის სიყვარულით დამთავრებული. როცა გრძნობ, რომ გიყვარს, ამ დროს ხარ ყველაზე ბედნიერი.
შვილები უკვე გაიზარდნენ და დამოუკიდებლად ცხოვრობენ საზღვარგარეთ. ერთი ფეხბურთს თამაშობს პოლონეთის უმაღლეს ლიგაში. მეორეც მუშაობს. ადრე ძალიან ხშირად ვიყავი მათთან, მაგრამ ახლა იმდენად ვერ ვახერხებ ხოლმე შვილებთან ჩასვლას, რომ უკვე თვითონ მეკითხებიან, როდის ჩავალ.
ძალიან მინდოდა, ქალიშვილი მყოლოდა... ისე გამოვიდა, რომ არც მე მყავს გოგონა და ჩემ გარშემოც ყველას ბიჭები ჰყავთ. ამიტომ ამას უნდა დავარქვათ აუხდენელი ოცნება", - ამბობდა თეონა.
თუ გოგო შვილი თეონასთვის აუხდენელ ოცნებად დარჩა, ეს დანაკლისი სულ ცოტა ხნის წინ შვილიშვილმა, პატარა სოფიამ შეუვსო. არველაძეების ოჯახის პირველი შვილიშვილის დაბადება, შეიძლება ითქვას, მთელმა საქართველომ ერთად იზეიმა.
რამდენიმეწლიანი სასიყვარულო ურთიერთობის შემდეგ ვატომ საყვარელ ქალს, მაკუნა ზედაშიძეს, ორი წლის წინ ხელი საჯაროდ სთხოვა. ამ მოვლენის ამსახველი კადრები მაშინ სოციალურ ქსელში გავრცელდა.
მაკუნა პროფესიით ფსიქოლოგია, ვატო კი ფეხბურთელების ოჯახის ერთადერთი შვილია, რომელმაც თავადაც პროფესიად ფეხბურთელობა აირჩია. 2020 წლის აგვისტოში ვატო საცხოვრებლად თურქეთში გადავიდა და ორწლიანი კონტრაქტი კლუბ "ფათიჰ კარაგიუმრიუკისთან" გააფორმა. თუმცა 2323 წლის აგვისტოში ცნობილი გახდა, რომ ვატო სამშობლოში დაბრუნდა და კარიერას „დინამო თბილისში“ გააგრძელებს.
მაკუნასა და ვატოს პირველი შვილი, სოფია არველაძე, მარტში შეეძინათ.
