ნინო მუმლაძე და მისი მეუღლე გუგა გოგინაშვილი ბიჭის მშობლები გახდნენ. მსახიობი დედობის ახლად შეძენილ ემოციებზე ჟურნალ „სარკის“ ახალი ნომერში საუბრობს.
„ჩემი ახალშობილი არის რონი გოგინაშვილი. ძალიან დიდხანს ვფიქრობდით, რა დაგვერქმია ჩვენი შვილისთვის… ბოლოს მამიკომ მოიფიქრა ეს სახელი. ეს არის ინგლისური სახელი, თან, ჩემი მეუღლის ბავშვობის საყვარელი ნაწარმოების გმირის, ჰარი პოტერის საუკეთესო მეგობარს ჰქვია. ჩემს მეუღლეს უნდოდა, ისეთი სახელი დაგვერქმია, რომელიც ძალიან გავრცელებული არ იქნებოდა…
ყველა მეუბნებოდა, არ გარისკო ფიზიოლოგიურად მშობიარობა, 38 წლის ასაკში პირველი მშობიარობისთვის ჯობია საკეისრო გაიკეთოო, მაგრამ ექიმს ვენდე და ეს არჩევანი გავაკეთე…
ძალიან რთულ პერიოდს გავდივართ. იმის გამო, რომ მსგავსი გამოცდილება არ მაქვს, ყველაფერს მძაფრად აღვიქვამ. საკუთარ თავთან მაქვს კითხვები, რამდენად სწორად ვაკეთებ, რაც ბავშვს ეხება. დედობის პირველი ეტაპი მართლა ძალიან რთულია…“
"შემიძლია ვთქვა, რომ დღეს ჩემს ცხოვრებაში, ჩემ გვერდით არის ადამიანი, რომელიც ძალიან მიყვარს და მასაც ძალიან ვუყვარვარ. დანარჩენს ყველაფერს დრო გვიჩვენებს" - ამბობდა ყველასათვის საყვარელი მსახიობი, მშვენიერი ნინო მუმლაძე, რომელიც მაყურებელმა წლების წინ პოპულარული სერიალებიდან თუ სპექტაკლებიდან გაიცნო.
"თავიდან ჩემი ბიჭის დაბადების სავარაუდო თარიღად 2 ივნისი დაასახელეს, თუმცა მერე მითხრეს, წონით ცოტა დიდია და შესაძლოა, ცოტა ადრე დაიბადოსო. იმ კლინიკაში რომ მივედი, სადაც უნდა ვიმშობიარო, ლიფტის კარი გაიღო, მივიხედ-მოვიხედე და გამიელვა, საიდან მეცნობა ეს გარემო-მეთქი. ბევრი ვიფიქრე და გამახსენდა: „ჩემი ცოლის დაქალებში“ ჩემი მშობიარობის სცენა სწორედ იქ იყო გადაღებული. ვამბობდი, ბედმა მომიყვანა ისევ აქ-მეთქი. ექიმს რომ შევხვდი, მოვუყევი ეს ამბავი და მითხრა: მახსოვს ეგ გადაღება, მეუბნებოდნენ, კადრში შემოდი და დავიმალეო", - იხსენებდა ნინო ცოტა ხნის წინ.
ნინოს მეუღლე ფერმწერი გუგა გოგინაშვილია. წყვილი ერთად ცხოვრობს, თუმცა ქორწილს ბავშვის გაჩენის შემდეგ გეგმავენ.
„მე და ჩემს მეუღლეს ურთიერთობა ჯერ დაკანონებული არ გვაქვს და შემოდგომისთვის ვგეგმავთ. როცა ერთად ცხოვრება დავიწყეთ, მაშინ შემომთავაზა ხელის მოწერა, მაგრამ სანამ ამ ყველაფრის ორგანიზებას მოვაბამდით თავს, მუცელიც გამეზრდებოდა და წონაშიც მოვიმატებდი, ამიტომ უარი ვთქვი. გადავწყვიტე, რომ დავიკლებ და გავლამაზდები, მერე გადავიხდი ქორწილს-მეთქი. ორსულობის პერიოდში 17 კილო მოვიმატე. კი მეუბნებიან, კარგად გამოიყურები, ლამაზი ხარო, მაგრამ მინდა, რომ ქორწილში ბევრად გამხდარი ვიყო. ასეთი რამ ცხოვრებაში ერთხელ ხდება და მინდა, ისეთი ლამაზი ვიყო, მთელი ცხოვრება დამამახსოვრდეს", - ამბობს მსახიობი.