გადაცემა „დროება“ მეცო-სოპრანო ანიტა რაჭველიშვილს სტუმრობდა. ანიტამ გადაცემაში საკუთარ ცხოვრებასა და კარიერისკენ მიმავალ გზაზე არსებულ სირთულეებზე ისაუბრა.
„კონსერვატორიაში მანანა ეგაძესთან ვსწავლობდი. მან მომცა ის მომავალი, რომელიც დღეს მაქვს. მისი დაჟინებული თხოვნით, 2007 წლის ივლისში წავედი ლა სკალას აკადემიის გამოცდებზე... მას არ უნდოდა, რომ საქართველოში დავრჩენილიყავი, დარწმუნებული იყო, რომ ჩემი მომავალი იყო ევროპაში.
იმ დროს თანხა არ გვქონდა. მე და მამაჩემი კარდაკარ დავდიოდით, მათ შორის, კულტურის სამინისტროშიც, არც კი შეგვიშვეს არავისთან. ასევე ვიყავით სხვადასხვა ბიზნესმენთან, არტისტთან, რომლებიც იმ დროს რამეს წარმოადგენდნენ მსოფლიოში. დამცირების და სახეში კარის მიხურვის გარდა, არაფერი არ გვახსოვს. მხოლოდ ის მახსოვს, რომ ოჯახის ძალიან ახლო წევრებმა და მეგობრებმა მოაკოწიწეს, რაც კი შეეძლოთ, რომ გავეშვი მოსმენაზე, რომელიც 2007 წლის ივლისში იყო.
წავედი, ჩავაბარე, მიმიღეს ლა სკალას აკადემიაში.. 400 ადამიანი გადიოდა გამოცდას და იქიდან მხოლოდ 7 მოვხვდით აკადემიაში. მხოლოდ მე ვიყავი ქართველი. რომ დავრეკე, ქალბატონი მანანა იდგა და სიხარულისგან მთელ უბანს უყვიროდა, ჩემმა ანიმ ჩააბარაო...
მილანში ვალაგებდი სახლებს, ასევე ვმუშაობდი ბიბლიოთეკაში და ვფუთავდი ნოტებს. მქონდა ხოლმე ასეთი პატარ-პატარა სამუშაოები, როდესაც აკადემიის მთავრდებოდა, შემეძლო საღამოს საათებში მემუშავა“, – აცხადებს ანიტა რაჭველიშვილი.
ანიტა რაჭველიშვილი
ანიტა რაჭველიშვილის სახელი დიდი ხანია, რაც საქართველოს საზღვრებს გასცდა და მას, როგორც ერთ-ერთ ყველაზე ნიჭიერ საოპერო მომღერალს, მსოფლიო იცნობს. წარმატებული კარიერის პარალელურად, ანიტა სოციალურ ქსელშიც აქტიურია და საკუთარ მოსაზრებას სხვადასხვა საკითხთან დაკავშირებით ყოველთვის ღიად გამოთქვამს.
ქართველი მეცო-სოპრანო დაიბადა თბილისში, გურამ რაჭველიშვილისა და მეგი დუმბაძის ოჯახში. მას განსაკუთრებული წარმატება 2009 წელს ლა სკალას სეზონის გახსნაზე, კარმენში შესრულებულმა მთავარმა როლმა მოუტანა. ანიტამ, რამდენიმე წლის წინ Bachtrack Opera Awards-ზე საუკეთესო ქალი მომღერლის ნომინაციაში გაიმარჯვა, სულ მალე კი მეცო-სოპრანო The New York Times-მა კლასიკური მუსიკის ერთ-ერთ საუკეთესო შემსრულებლად დაასახელა.
2014-2015 წლების სეზონზე ანიტა რაჭველიშვილი დაბრუნდა ლა სკალას სცენაზე, შეასრულა კარმენისა და ამნერისის პარტიები. ამნერისის პარტია ასევე შეასრულა რომის ოპერის თეატრში, ხოლო კარმენი - მეტროპოლიტენ ოპერაში. იგი იყო სოლისტი ჯუზეპე ვერდის რეკვიემში ზალცბურგის ფესტივალზე.