ნანი ბრეგვაძე იუბილარია - მომღერალმა დაბადების დღე ახლობლების გარემოცვაში აღნიშნა - Marao

ნანი ბრეგვაძე დღეს იუბილარია. ლეგენდარული მომღერალი, რომელმაც საკუთარი არაჩვეულებრივი ნიჭითა და განუმეორებელი შემოქმედებით სახალხო სიყვარული და აღიარება მოიპოვა, 88 წლის გახდა. ნანი ბრეგვაძე უამრავ მილოცვას იღებს სოციალურ ქსელში. იუბილედან კადრებს სოციალურ ქსელში მსახიობი და ტელეწამყვანი სალომე შარვაძე გვიზიარებს.

ნანი ბრეგვაძის ფოტოები გამოაქვეყნა მისმა შვილიშვილმა ნატალია ქუთათელაძემაც: 

ნანი ბრეგვაძე 

"87 წლის ვარ...  ეს ძალიან რთული სათქმელია. ვერ გეტყვით, რომ არაფერი მაწუხებს, ძალიანაც ბევრი რამ მაწუხებს, მაგრამ ეს არ მაჩერებს.

სანამ ომი დაიწყებოდა, ისრაელში ვიყავი, ანალიზები გავიკეთე და ამ ანალიზების მიხედვით, 62 წლის ვარ. სასაცილოა, ახლა ამას რომ ვამბობ, მაგრამ უჯრედის დონეზე ასეა.

• "ლეგენდარული ნანი ბრეგვაძე და მაგნოლია" - ნანი ბრეგვაძის ახალი ფოტოსესია თავისი სახელობის მაგნოლიასთან ერთად 
• "მე პოლიტიკა სიღრმისეულად არ მესმის, მაგრამ მგონია, რომ ევროპაში შესვლა ნამდვილად უნდა გვინდოდეს" - ნანი ბრეგვაძე 

ძველ ფოტოებს  რომ ვათვალიერებ, ჩემი თავი არ მომწონდა, განსაკუთრებით, რამდენიმე ფოტოზე. დიდი ხანი რომ გავიდა, ახლა ვფიქრობ, რატომ არ მომწონდა. იმ დროისთვის არც იყო მოსაწონი, მაგრამ წლები რომ გემატება, შენი თავი მოგწონს, ახალგაზრდას რომ უყურებ. 

მე საოცრად არაფოტოგენური ვიყავი... ნაოჭი მედარდება, ეს ყველა ქალს აწუხებს, მაგრამ ეს მეორეხარისხოვანია. ჩემი სახლი სავსე სტუმრებით; ღმერთო, ჩემი შვილები დიდხანს მიცოცხლე, იმდენი ვართ, მაგრამ ძალიან მაკლია სტუმრები. ისეთი სტუმრები არა, ტელეფონზე რომ რეკავენ და მოდიან; ისეთი სტუმრები, კარს რომ გააღებ და სიურპრიზი დაგხვდება. ახლა ასეთი მეგობრობა აღარ არსებობს. ალბათ იმიტომ, რომ ყველა დაკავებულია. თუმცა ადრეც ყველა დაკავებული იყო.

„სულ წარსულში ვარ ფიქრებით. უკვე ძნელია ჩემი ფიქრი მომავალზე... მაგრამ ძალიან მინდა, დიდხანს ვიცოცხლო, მიხარია სიცოცხლე. ჩემი რამდენიმე ამხანაგი ხომ შემომრჩა და ვამბობთ ხოლმე, რა ბედნიერები ვიყავით, როგორ კარგად ვცხოვრობდითო“. – ამბობდა მომღერალი.

ნანი ბრეგვაძის ოჯახი

საზოგადოება კარგად იცნობს ნანის შვილს, ეკა მამალაძეს და შვილიშვილს, ნატალია ქუთათელაძეს. ნატალია თვითონაც ფანტასტიკურად მღერის.

ეკა მამალაძე 1960 წელს ქალაქ თბილისში დაიბადა. მომღერლობაზე არასდროს უოცნებია, თუმცა პროფესიონალური მუსიკალური განათლება ოჯახში აუცილებელი იყო. ტელევიზიაში პირველად 6 წლის ასაკში გამოჩნდა, როცა კომპოზიტორ მარიკა კვალიაშვილის საახალწლო სიმღერა შეასრულა. დიდ სცენაზე გამოსვლა კი 1980-ინი წლებიდან დაიწყო. გამორჩეულია დედასთან ერთად ნამღერი ცნობილი სიმღერები: „მინდვრად დაგიჭერ პეპელას“, „ერთხელ ამამღერე“, „გოგოვ, გოგოვ შავთვალა“, „მეფის ქალი“ და სხვა.