ქართველი ძიუდოსიტი, რომელიც ესპანეთის სახელით ასპარეზობს, ნიკო შერაზადიშვილი გახლავთ.
პარიზის ოლიმპიადამდე მისით ცნობილი ჟურნალის, Men’s Health ესპანური გამოცემა დაინტერესდა და მისი ფოტო გარეკანზე განათავსა.
ნიკოლოზ შერაზადიშვილი
ქართული წარმოშობის ესპანელი ძიუდოისტია. ამჟამად ასპარეზობს 90კგ წონით კატეგორიაში. 2018 წელს მოიგო მსოფლიო ჩემპიონატი. ამავე წელს მოიგო ხმელთაშუა ზღვის თამაშები. 2018 წლის ევროპის ჩემპიონატზე მოიპოვა ბრინჯაოს მედალი. "ქართველი ბიჭი, რომელიც ესპანეთის გმირი გახდა" - ასე ასათაურებდნენ მაშინ ნიკოზე დაწერილ სტატიებს. ესპანეთის ქალაქ ბრუნეტეში კი "ტატამის მეფისა" და "ძიუდოს ანგელოზის" პატივსაცემად გაიხსნა ქუჩა, რომელსაც "Niko Shera" ეწოდება.
"ამას ვერასდროს წარმოვიდგენდი, რომ ესპანეთში ჩემი სახელობის ქუჩა იქნებოდა. როცა აქ ჩამოვედით, არც ესპანურს ვფლობდი და არაფერი ვიცოდი ესპანეთის შესახებ. ახლა ვსაუბრობ ესპანურად, ქართულად, ინგლისურად და რუსულად. ბრუნეტში გავატარე ჩემი პირადი და სპორტული ცხოვრების დიდი ნაწილი...
მე ვიცი, რომ საქართველოდან მოვდივარ და ეს არასოდეს უნდა დამავიწყდეს. ამაყი ვარ" - უთხრა ესპანურ სპორტულ გამოცემა as.com-ს შერაზადიშვილმა.
ქართველი ბიჭი უკვე წლებია ესპანეთის სახელით ასპარეზობს. ნიკოლოზ შერაზადიშვილი 1996 წლის 19 თებერვალს თბილისში დაიბადა. მისი მამა კარგად ცნობილი ძიუდოისტი - ზაზა შერაზადიშვილი, მეტსახელად "პაპუასა" იყო, რომელიც რამდენიმე წლის წინ სიმსივნით გარდაიცვალა.
საქართველოში ცხოვრებისას, პატარა ნიკო ძიუდოსა და წყალბურთში ვარჯიშობდა. 10 წლის წინ, შერაზადიშვილების ოჯახი ესპანეთში გადავიდა საცხოვრებლად. რადგან ნიკოლოზს კარიერის გაგრძელება ძიუდოში სურდა, მადრიდიდან დაახლოებით 35 კილომეტრში, პატარა ქალაქ ბრუნეტეს ძიუდოს სკოლაში შეიყვანეს. მისი მასწავლებელი და მთავარი მწვრთნელი ჯოაკინ რუისი გახდა, რომელსაც ოლიმპიადაზე სამჯერ ჰქონდა მონაწილეობა მიღებული. 190 სანტიმეტრი სიმაღლის სპორტსმენი 90 კგ წონით კატეგორიაში ასპარეზობს.
2015 წლის მსოფლიო ჩემპიონატზე შერაზადიშვილი 21-წლამდელთა შორის ვერცხლის მედლის მფლობელი გახდა, თუმცა მაშინ ფინალში უკვე ბექა ღვინიაშვილთან დამარცხდა. ვერცხლის მედლით დაასრულა 2016 წლის ევროპის ჩემპიონატი ახალგაზრდათა შორის.