თამო ვაშალომიძის ვენეციური თავგადასავალი - როგორ და რატომ მოხვდა პრესტიჟულ ფესტივალზე ქართველი ფოტომოდელი - Marao
თამო ვაშალომიძის ვენეციური თავგადასავალი - როგორ და რატომ მოხვდა პრესტიჟულ ფესტივალზე ქართველი ფოტომოდელი
თამო ვაშალომიძის სახელი და გვარი პირველად საზოგადოებამ წლების წინ გაიგო, როცა მან ყურადღება თამამი ფოტოსესიებითა და განცხადებებით მიიპყრო. ის ფოტომოდელია და ხშირად ჩანს სხვადასხვა კამპანიაში. ამის გარდა, ის სოციალურ ქსელში თავადაც აქტიურია, აქვს "ფეისბუკის", "ინსტაგრამისა" და "ტიკ-ტოკის" საკუთარი არხები და გამომწერებს ცხოვრების საინტერესო დეტალებს ამ გზით უზიარებს.
თამო დაქორწინებულია ბიზნესმენ აკა სამხარაძეზე. წყვილს ერთი საერთო შვილი, მაქსიმე ჰყავს, ხოლო თამოს პირველ ურთიერთობაში გოგონა შეეძინა.
თამო ვაშალომიძე ვენეციის კინოფესტივალზე
მაშინ, როცა ყველა დეა კულუმბეგაშვილის ფილმის, "აპრილის" წარმატებაზე საუბრობდა და საზოგადოება აქტიურად აზიარებდა ფილმის მთავარი გმირების, მერაბ ნინიძის, კახა კიწურაშვილისა და ია სუხიტაშვილის ფოტოებს, თამო ვაშალომიძემ ფესტივალის წითელ ხალიჩაზე გადაღებული კადრები გამოაქვეყნა და ყურადღებაც მიიპყრო. თამოს 2011 და 2019 წლებში ფილმებში "მხატვრის ტურფა" და "გარეკილები" მონაწილეობა მიღებული აქვს, თუმცა ამჯერად ამ პრესტიჟულ ღონისძიებაზე მსახიობის ამპლუაში არ იმყოფებოდა.
როგორ და რატომ მოხვდა თამო ვაშალომიძე ვენეციის კინოფესტივალზე, ამის შესახებ სოციალურ ქსელში არაერთი კითხვა თუ კომენტარი დაიწერა.
- "თამო ვაშალომიძის ისეთ ბულინგს ვუყურებ. მეგობრებო, თამომ თავის მოვლის ხაზი გააკეთა და მისი შემოსავალი იმდენად ეფექტურია, რომ სპონსორის სტატუსით მიიწვიეს. დააფსა კატამ თქვენს სტანდარტებს, რომელსაც ის არ აკმაყოფილებს. ერთი, ხალხს არ იჩემებდეთ, რა, თქვე რაღაცნაირებო. თამო, წარმატებები და ასე გააგრძელე", - დაწერა სოციალურ ქსელში ჟურნალისტმა ნანუკა ჟორჟოლიანმა.
პასუხი კრიტიკოსებს თავად თამო ვაშალომიძემაც გასცა, მან საკუთარ გვერდზე გამოაქვეყნა ვიდეო, სადაც დადებითი კომენტარების ავტორებს მადლობა გადაუხადა, დაინტერესებულებს კი აუხსნა, რომ განაცხადს მსგავს ღონისძიებებზე მონაწილეობისთვის უკვე რამდენიმე წელია, რაც აგზავნის, მაგრამ აქამდე ყოველთვის უარი მოსდიოდა, ახლა კი, ორი თვის წინ, ვენეციის კინოფესტივალიდან მიიღო თანხმობა და მიწვევა.
ამ მნიშვნელოვანი მოვლენისთვის თამო ვაშალომიძე ფოტოგრაფთან, ვიზაჟისტსა და დიზაინერთან ერთად მოემზადა. სპეციალურად წითელი ხალიჩისთვის მან თეთრი კაბა მოირგო, რომელსაც დამატებით აქსესუარად დიდი ზომის შლეიფი ჰქონდა. კაბა დახვეწილი და სადა დიზაინით გამოირჩევა.