ირინკა კავსაძის გვარი, ალბათ, უკვე ბევრს ამბობს. ის ცნობილი ბაბუის, კახი კავსაძისა და ასევე ქართული კინოს ლეგენდის, უმშვენიერესი ბელა მირიანაშვილის შვილიშვილია. კავსაძეების ოჯახის ხელოვნების სფეროსთან სიახლოვე ამ დიდი არტისტების გამო გასაკვირი არ არის და გამონაკლისი არც ირინკაა. ირინკას პროფესიულ არჩევანსა და ცხოვრებაზე მისი მამიდა, ნანუკა ხუსკივაძე საუბრობდა:
"ირინკა მსახიობების ოჯახში დაიბადა. ხშირად ხდება, რომ ასეთ ოჯახში დაბადებულები მსახიობის პროფესიას ირჩევენ. მართლაც განსხვავებულ ატმოსფეროში გაიზარდა. გარდა ამისა, მის შემთხვევაში არის გენეტიკური ფაქტორიც, რაც ძალიან მნიშვნელოვანია და რაც რეალურად მართლაც არსებობს. ამ ბავშვში სახელოვნებო ფესვები შორიდან მოდის. მისი პაპის მამა გენიალური ქართველი ლოტბარი სანდრო კავსაძე გახლდათ. დათაშკა კავსაძე (ასევე ლოტბარი) კი - პაპის მამა. კახიზე არაფერს ვამბობ, ბებიის, ბელა მირიანაშვილის მხრიდან ფესვებზე - ბელას მამა ქუთაისის ლადო მესხიშვილის თეატრის მსახიობი იყო.
მოკლედ, ირინკას გენეტიკა არტისტული ბუნებით დახუნძლულია, მაგრამ მას არა მხოლოდ გენეტიკურად აქვს ეს ყველაფერი, თვითონ პიროვნულად არის საოცრად მოსიყვარულე, მშრომელი და ნიჭიერი გოგონა. ხანდახან გვაოცებს იმით, როგორი ადამიანების მოსიყვარულეა. არანორმალურად უყვარს თავისი არჩეული გზა, რაც ძალიან მნიშვნელოვანია. კარგია, რომ ასე გამოსდის ეს. ამასთან, საშინლად შრომისმოყვარეა", - ასე ახასიათებდა ნანუკა ხუსკივაძე ირინკა კავსაძეს.
ირინკა 10 წლის იყო, როდესაც მშობლებთან ერთად დატოვა საქართველო. მამა, ირაკლი კავსაძეც, მსახიობია. სკოლის დამთავრების შემდეგ ირინკამ "სინეტიკის თეატრში" დაიწყო თამაში, იქ, სადაც მამამისი - ირაკლი კავსაძე მუშაობს. ამავე თეატრში ჯერ კიდევ 10 წლისამ სწორედ მამასთან ერთად ითამაშა სპექტაკლში - "სტუმარ-მასპინძელი".
2018 წელს ირინკა მთელმა საქართველომ გაიცნო, როდესაც ამერიკიდან სპეციალურად ჩამოვიდა და პროექტ "ცეკვავენ ვარსკვლავებში" მონაწილეობდა. ირინიკას მეწყვილე მოცეკვავე ოთო ფოლადაშვილი იყო. წყვილმა ვერ გაიმარჯვა, მაგრამ ფინალში გავიდნენ და საპრიზო მეორე ადგილს დასჯერდნენ.
ცოტა ხნის წინ ირინკა კავსაძემ მსახიობ გიორგი ტაბიძესთან ერთად გადაღებული კადრები გამოაქვეყნა. მოგვიანებით კი ირინკას რჩეულმა ხელი სთხოვა. 2024 წლის 31 აგვისტოს გიორგისა და ირინკას ქორწილი გაიმართა. ორწლიანი სიყვარულის ისტორია წყვილმა ქაშვეთის ეკლესიაში ჯვრისწერითა და კახეთში ქორწილით დააგვირგვინა.
გიორგი ტაბიძემ და ირინკა კავსაძემ სტუმრებს ისტორიულ სოფელ მანავში, გიუაანის მეღვინეობაში უმასპინძლეს. ქორწილი ღია ცის ქვეშ შედგა, ულამაზეს გარემოში გადაღებული კადრები კი სოციალურ ქსელში გავრცელდა.
შვილთან ურთიერთობისა და მისი დაოჯახების შესახებ ირაკლი კავსაძემაც ისაუბრა. ის აღნიშნავს, რომ ირინკა პირად ურთიერთობებს ყოველთვის სერიოზულად უდგებოდა:
"როცა ირინკა საქართველოსკენ წამოვიდა, უფრო აქეთ იყო, მაგ პერიოდში გაიცნეს ერთმანეთი. მერე მეც გამიმხილა. გამიხარდა. ირინკა უკვე იმ ასაკში შევიდა, რომ ეს აუცილებელი იყო.
ირინკა ძალიან გაწონასწორებული იყო ამ საკითხში. ცუდი გოგო ნამდვილად არ არის და სულ მარტო დადიოდა. ჩემთვისაც მიკვირდა ხოლმე, ვფიქრობდი, რამე ხომ არ აწუხებს, ან რამე ხომ არ ჰქონდა თავში ჩადებული, რომ, აი, მე არავისთან არ ვიურთიერთებ. ასეთებიც ხდება, მაგრამ, აი, გამოჩნდა ადამიანი, რომელმაც გაუღო გულის კარი. არაჩვეულებრივი წყვილია, ძალიან კარგი ადამიანი შეხვდა მას ცხოვრებაში, ეს ძალიან მნიშვნელოვანია,“ - ამბობს ირაკლი კავსაძე.