თამრიკო ჭოხონელიძე გადაცემა „ნიკოლოზის კითხვების“ სტუმარია, რომლის ეთერშიც მეუღლესთან, გია როინიშვილთან დაშორების პერიოდზე საუბრობს.
მუსიკოსის თქმით, საქორწინო ბეჭედი არასდროს მოუხსნია, რადგან იცოდა, რომ ეს დაშორება მხოლოდ პაუზა იყო.
„ოჯახის შექმნა ჩემთვის ძალიან დიდი მოვლენაა. ასეთ რამეებს მარტივად არ ვწყვეტ. ვიცოდი, რომ ეს დაშორება მხოლოდ პაუზა იყო. მსგავსი რამ ნებისმიერი ადამიანის ცხოვრებაში შეიძლება მოხდეს. ბეჭედი არასდროს მომიხსნია, რადგან ეს იყო დასტური იმ სიყვარულისა, რამაც მე ოჯახი შემაქმნევინა, ამასთან კოკო და მარიამი არიან და ისინი ჩემი მთავარი მისია ამ ქვეყნად. ამ ყველაფერს ასე უბრალოდ ვერ განვაგდებდი.
ხალხს მინდა მივმართო და ვუთხრა, რომ არ შეიძლება პირად ცხოვრებაში ასე ღრმად შეიჭრა. სირცხვილია უბრალოდ“, – ამბობს თამრიკო ჭოხონელიძე.
თამრიკო ჭოხონელიძე ქართველი მომღერალი, მუსიკათმცოდნე, ფოლკლორისტი, პიანისტია. დაიბადა მუსიკოსების — ეთნომუსიკოლოგის, პროფესორ ევსევი (კუკური) ჭოხონელიძისა და ელისაბედ (ლიზიკო) კალანდაძის ოჯახში.
1973–1978 წლებში იყო ანსამბლ „მზიურის“ ერთ-ერთი წევრი. 1981 წლიდან საქართველოს ფილარმონიის სოლისტია. განსაკუთრებით აღსანიშნავია ვოკალური ნამუშევარი კინოფილმში „იავნანა“. მიღებული აქვს სამი თაობის საუკეთესო შემსრულებლის (1996) და ფესტივალ „თბილისური გაზაფხულის“ წლის საუკეთესო შემსრულებელის წოდებები (1995). კონცერტებზე ასრულებს ხალხურ და საესტრადო სიმღერებს.
1998 წელს დაჯილდოებულია ღირსების ორდენით, აგრეთვე, იაკობ გოგებაშვილის სახელობის პრემიით და დები იშხნელების სახელობის პრემიით დებთან, სოფიკო და თინიკო ჭოხონელიძეებთან ერთად. 2016 წლის 15 დეკემბერს ფილარმონიის დიდი საკონცერტო დარბაზის წინ გაიხსნა თამრიკო ჭოხონელიძის ვარსკვლავი. ჩატარებული აქვს სამი სოლო-კონცერტი - 1999, 2010 და 2016 წლებში.
თამრიკო ჭოხონელიძისა და გია როინიშვილის ურთიერთობა განხილვის საგანი არაერთხელ გამხდარა. წყვილი გარკვეული პერიოდის განმავლობაში ერთმანეთს დაშორდა, თუმცა მოგვიანებით ურთიერთობების აღდგენა და თანაცხოვრება კვლავ შეძლეს. მათ ორი შვილი, კოკო და მარიამი ჰყავთ, რომლებიც ხელოვნების სფეროში საქმიანობენ და საზოგადოება, ცნობილი მშობლების მსგავსად, მათაც კარგად იცნობს.
"მე და თამრიკოს ცხოვრებაში ბევრი კონფლიქტი გვქონია, მაგრამ ერთმანეთში ყოველთვის იმას ვეძებდით, რაც ან ვინც გვაერთიანებდა. ყოფილა წყენაც, მაგრამ მაინც ეს გაერთიანება გვშველოდა. თამრიკოს შემორიგება ადვილი არ არის, მაგრამ მას აქვს იმის ძალა, რომ იპოვოს მთავარი, სიმღერაშიც, ხელოვნებაშიც და გადაწყვეტილების მიღებაშიც. არც მე და არც ის არ ვართ მარტივი ადამიანები. ამიტომ ხშირად ყოფილა გაუგებრობა, მაგრამ დრო რომ გადის, ყველაფერი ლაგდება" - ამბობდა გია როინიშვილი.