ჟურნალისტი ნათია ბანძელაძე სოციალურ ქსელში სამწუხარო ინფორმაციას ავრცელებს. გარდაიცვალა გიორგი გოგიჩაიშვილის მამა, მსახიობი სოსო გოგიჩაიშვილი.
„იცით როგორი იყო ჩემი სოსიკო. მზეს რომ 9 სხივი აქვს იმაზე თბილი, კაშკაშა, სიცოცხლით სავსე. იცით როგორი იყო ჩემი სოსიკო? ყველას რომ ყოფნიდა მისი სიყვარული. იცით როგორი კაცი დაკარგა ამ ქალაქმა: კეთილზე კეთილი, ტკბილზე ტკბილი, ნიჭიერი, კაშკაშა ვარსკვლავი რომელიც ისე ბრჭყვიალებდა არავის წვავდა. ჩემმა, ჩვენმა ყველაზე დიდმა გოგიჩამ ასე გადაწყვიტა, წავიდა და გოგიჩას ჩაეხუტა… მიყვარხართ ბიჭებოოო, როგორ არ დამინდეთ, თქვენ ხომ ყველაზე კეთილი ადამიანები იყავით ამ სამყაროში…მიყვარხარ ცოტა ეს სიტყვა, მტკივა, ძალიან მტკივა ახლა უკვე ყველაზე დიდი გოგიჩა#იოსებგოგიჩაიშვილი საქართველოს დამსახურებული არტისტი“, – წერს ნათია ბანძელაძე.
ნათიას სტატუს ნანუკა გოგიჩაიშვილი აზიარებს:
„ბაბუ შენ რამხელა სიყვარულს დავატარებ გულით ყოველ წამს , შენ კი იცი … მიყვარხარ, სიტყვა ამ სიყვარულს არ იტევს.“
ბაბუას სიკვდილზე წერს ნინი გოგიჩაიშვილი.
„ჩემი მზის სხივი, ჩემი უსაყვარლესი ბაბუ! რამდენ ბედნიერ წამს ითვლის გული შენთან ერთად! ჩემი უტკბესი ბაბუ, არ არსებობს ადამიანი ვისაც სოსიკოსთან შეხება ქონია და სიგიჟემდე არ უყვარს! დიდი ადამიანი დიდი გულით! ურთულესია, შენთან დამშვიდობება და არც მინდა ამ რეალობის აღქმა.“- წერს ნინი.
სოსო გოგიჩაიშვილი დაიბადა 1938 წლის 11 თებერვალს ბათუმში, 1960 წელს დაამთავრა შოთა რუსთაველის სახელობის თეატრალური ინსტიტუტის სამსახიობო ფაკულტეტი.
1960-1961 წლებში გორის თეატრის, 1962-1963 წლებში სანკულტურის თეატრის, 1963-1967 წლებში მარჯანიშვილის სახელობის თეატრის, 1967-1976 წლებში რუსთავის თეატრის, 1976 წლიდან მარჯანიშვილის სახელობის თეატრის მსახიობია. გადაღებულია ფილმებში: „ერთი ცის ქვეშ“ (1961), „მე, ბებია, ილიკო და ილარიონი“ (აგიტატორი, 1962), „შეხვედრა წარსულთან“ (აკია, 1966), „დათა თუთაშხია“ (ნიკიფორე ბუბუტეიშვილი, 1978), „ხსოვნა“ (1989), „თეთრი ბაირაღები“ (ზედამხედველი, 1990), „ღმერთო, რისი გულისთვის“ (უმადური, 2003) და სხვა.
დაქორწინებულია მსახიობ ნანა დათუნაშვილზე, მათი შვილი იყო ცნობილი ტელეწამყვანი გიორგი გოგიჩაიშვილი.
გიორგი გოგიჩაიშვილი 1968 წლის 28 აპრილს თბილისში დაიბადა. მარჯანიშვილის თეატრის მსახიობის, იოსებ გოგიჩაიშვილის და რუსთაველის თეატრის მსახიობის, ნანა დათუნაშვილის ოჯახში. საყოველთაო პოპულარობა მოიპოვა სატელევიზიო სივრცეში, უმეტესწილად შემეცნებით-გასართობ პროექტებში მოღვაწეობით. სხვადასხვა დროს იყო საზოგადოებრივი მაუწყებლის, ტელეკომპანია "იმედის", "რუსთავი 2"-ის და სხვა ტელერადიოკომპანიების თანამშრომელი. სხვადასხვა შოუს პარალელურად, რეგულარულად იყო ჩართული საბავშვო-საყმაწვილო სტუდია "ბასტი-ბუბუს" პროექტებში, როგორც სატელევიზიო სახე, ასევე, როგორც ერთ-ერთი ორგანიზატორი.
გიორგის მეუღლე ნათია ბანძელაძეს 2010-2012 წლებში პრეზიდენტის პრესსამსახურის უფროსის თანამდებობა ეკავა. წყვილს ორი შვილი, ნანუკა და ნინი ჰყავს. ორივე მათგანი მოდელია, ნანუკა "ვიცე-მის საქართველო 2015"-ის, ნინი კი "მის-საქართველო 2018"-ის ტიტულის მფლობელია.
გიორგი გოგიჩაიშვილი 2019 წლის 4 ივლისს გარდაიცვალა, სიმსივნესთან რამდენიმეწლიანი ბრძოლის შემდეგ.