უარი საქართველოში, დიდი წარმატება საზღვრებს გარეთ და შანსი "ევროვიზიაზე" - თათია კობალაძის ინტერვიუ კარიერასა და განვლილ გზაზე - Marao
უარი საქართველოში, დიდი წარმატება საზღვრებს გარეთ და შანსი "ევროვიზიაზე" - თათია კობალაძის ინტერვიუ კარიერასა და განვლილ გზაზე
კარიერა ადრეული ასაკიდან დაიწყო და 21 წელია, რაც სცენაზე დგას. თათია მონაწილეობდა უკრაინის "X ფაქტორში" 2015 წელს, სადაც ფინალისტი გახდა, ხოლო 2020 წელს თურქეთის "ვოისში" ნახევარფინალამდე მიაღწია. 2021 წელს ის გახდა პირველი ქართველი, ვინც ყაზახეთის "ვოისში" მიიღო მონაწილეობა და ჟიურის ოთხივე წევრის მოწონება დაიმსახურა.
წელს, 2025 წლის ევროვიზიის სიმღერის კონკურსზე საქართველოს წარმომადგენლად თათია კობალაძე აქტიურად განიხილება: "ევროვიზიაზე უნდა წავიდეს თათია კობალაძე! სულ რაღაც ორი კვირის წინ ამოიკვეთა სიმსივნე და მისი სული ისევ ანთებულია კონკურსისკენ" - ეს სიტყვები მომღერალსა და კომპოზიტორ მაია კაჭკაჭიშვილს ეკუთვნის, რომელიც მან სოციალურ ქსელში დაწერა.
ამ დროისთვის ცნობილი არ არის, ვინ წარადგენს საქართველოს ევროვიზია 2025-ზე, რომელიც 13, 15 და 17 მაისს შვეიცარიის ქალაქ ბაზელში გაიმართება, თუმცა მანამდე მოგიყვებით თათია კობალაძის ძალიან საინტერესო, სირთულეებითა და წარმატებით სავსე გზის შესახებ.
თათია კობალაძე და მისი განვლილი გზა
თათია კობალაძე, გოგონა, რომელიც საქართველოში არაერთ კონკურსზე დაიწუნეს, უკვე წლებია წარმატებულად ასპარეზობს სხვა ქვეყნის კონკურსებში.
თათია კობალაძე, ევროვიზიის განაცხადამდე 14 ლაივი ჰქონდა ყაზახეთის „ორ ვარსკვლავში“, სადაც მსგავსი პრეცედენტი იქამდე არ ყოფილა, რომ სხვა ეროვნების მომღერალი საკუთარი ქვეყნის ვარსკვლავად წარედგინათ. 16 წყვილში თათია ერთადერთი უცხოელი იყო. სწორედ იმ პერიოდში იგრძნო თავი ცუდად, როდესაც საქართველო-ყაზახეთი დაფრინავდა.
ვრცელ ინტერვიუში მომღერალი გვიყვება მოულოდნელ დიაგნოზზე, მკურნალობის გზასა და იმ ბრძოლაზე, რომელსაც ახლა გადის ევროვიზიამდე მისასვლელ გზაზე...
- შემოდგომაზე ყაზახურ „ორ ვარსკვლავში“ ვმონაწილეობდი, ხშირად მიწევდა ორ ქვეყანას შორის ფრენა. ნახევარფინალიდან საკუთარ თავს უცნაური რაღაცები შევატყვე, რასაც გადაღლილობას ვაბრალებდი. ფაქტობრივად არ მეძინა კონკურსის პერიოდში, სამი თვე სულ დავფრინავდი, რთული გრაფიკი მქონდა. არსებობენ, კონკურსის მომღერლები და ჩვეულებრივი მომღერლები, მე კონკურსის მომღერალი ვარ. ერთ დილას რომ გავიღვიძე, ყურიდან სისხლი წამომივიდა, ფრენისას იყო კიდევ ასეთი შემთხვევა როდესაც აეროპორტში, გაფრენამდე ცუდად გავხდი. რეისი გაჩერდა და სასწრაფო დახმარება გამოიძახეს. ექიმებმა საქართველოდან გაფრენა ამიკრძალეს, მაგრამ მაშინ ფინალი მქონდა ყაზახეთში და ვთქვი, რომ აუცილებლად უნდა წავსულიყავი. იქ რომ ჩავფრინდი, უკვე კარგად ვიყავი. იმდენად მიყვარს ჩემი საქმე რომ ამ სიმპტომებს ყურადღებასაც არ ვაქცევდი.
ფინალის შემდეგ, საქართველოში რომ დავბრუნდი, გარშემო ყველა მეუბნებოდა, რომ ძალიან თეთრი ფერი მქონდა, ასევე მოულოდნელად ძლიერი ხველა დამეწყო. ახლობლები მაძალებდნენ ექიმთან მივსულიყავი, რადგან შესაძლოა ბრონქების ანთება მქონოდა.
- და მხოლოდ ხველის დაწყების შემდეგ მიხვედით ექიმთან?
- დიახ, ვიფიქრე, რომ ხველას სიმღერაში ხელი რომ არ შეეშალა, მივსულიყავი. ექიმმა მითხრა, თათია, თქვენ სხვა პრობლემა გაქვთ, ბრონქები არაფერ შუაში არ არისო. მერე დაიწყო დაუსრულებელი დიაგნოზების სერია. ვხვდებოდი, რომ რაღაც რიგზე ვერ იყო და საბოლოოდ თურქეთში წავედი კვლევებზე. ჩემთვის მთავარი იყო მემღერა. საერთოდ, რაც არ მოხდეს ჩემს ცხოვრებაში, იცოდეთ, რომ ბოლო დღემდე ვიმღერებ. ეს არის ჩემი სიცოცხლის აზრი.
- იქ რა დიაგნოზი დაგისვეს?
- საუბარია ყელისა და საშვილოსნოს სიმსივნეზე, ეს ბოლო, სტამბულში გაირკვა. თავიდან იშვიათი მიმართულების სიმსივნეს ვარაუდობდნენ, რომლისგან განკურნებაც რთულია, და ამ შემთხვევაშიც დიდია ალბათობა რომ უკან მობრუნდეს. სასწრაფო ოპერაცია დამინიშნეს. იქ შესვლამდე ვფიქრობდი, რომ როგორც კი გამოვიდოდი საოპერაციოდან გამოჯანმრთელებული, ბრძოლას გავაგრძელებდი ევროვიზიისთვის. მაშინ ჯერ კიდევ არავინ იცოდა, რომ სიმღერა გაგზავნილი მქონდა. ოპერაცია კარგად დასრულდა, ახლა მკურნალობას გავდივარ და იმედი მაქვს ყველაფერი კარგად იქნება.
მინდა, რომ მქონდეს შანსი „ევროვიზიაზე“ წავიდე, სხვანაირად მოტივირებული ვარ, ისე უნდა ვიმღერო, თითქოს ეს იყოს ბოლო. ეს არის ჩემი ცხოვრების მიზანი, რომ ისეთი გამარჯვება მოვუტანო ჩემს სამშობლოს რომ ჩემმა ქვეყანამაც მაღიაროს როგორც ნიჭიერი მომღერალი და ჩემმა შვილებმაც იამაყონ ჩემით.
- სიმღერა როგორ შეარჩიეთ?
- როდესაც სიმღერა მინდა, პირდაპირ მაიკო კაჭკაჭიშვილს ვწერ. ის საოცარი კომპოზიტორია, მისი სიმღერები გულში და ძარღვში გაივლის ხოლმე. ზუსტად ვიცი, მაიკოს სიმღერა იქნება ის სიმღერა, რომელიც „ევროვიზიას“ მოიგებს და თათიაც ძალიან მაგრად შეასრულებს...გაგრძელება