„საკითხავი ეს არის“ - „გამომცემლობა პალიტრა L“ 20 წლის იუბილეს აღსანიშნავ კამპანიას გვთავაზობს - Marao

მკითხველს ყოველთვის უნდა ჰქონდეს საკითხავი - გვეუბნება „გამომცემლობა პალიტრა L“ და წელს პირველი წიგნის გამოცემიდან მე-20 წელს აღნიშნავს. ამ ორ ათწლეულში იგი იქცა არა მხოლოდ ერთ-ერთ წამყვან გამომცემლობად, არამედ წიგნის უდიდეს გამავრცელებლად, რომელმაც სოფლად თუ ქალაქად ათასობით მკითხველს აჩუქა დაუვიწყარი თავგადასავლები და განახლებული ბიბლიოთეკა.

ამ მნიშვნელოვან თარიღთან დაკავშირებით, გამომცემლობა იწყებს თამამ კამპნიას და მკითხველს სათქმელს უგზავნის სლოგანით „საკითხავი ეს არის“, რაც გულისხმობს მრავალფეროვან, ხარისხიან და შთაგონებით სავსე საკითხავს ყველა თაობისა და გემოვნების მკითხველისთვის.

დღეს ლიტერატურა თავისუფლებისა და განვითარებისკენ სწრაფვის მნიშვნელოვანი ნაწილია. წიგნის კითხვა კვლავ რჩება ადამიანური კავშირის, განვითარებისა და განტვირთვის საუკეთესო ფორმად. ეს არის მოწვევა სამყაროში, სადაც წიგნები თანაგრძნობის, აზროვნების, წარმოსახვისა და ახალი გზების ძიების საშუალებაა. 

„პალიტრა L“ სიამაყით წარმოგიდგენთ მრავალფეროვან არჩევანს: საბავშვო წიგნებიდან თანამედროვე ბელეტრისტიკამდე, სამეცნიერო ლიტერატურიდან კლასიკურ ტექსტებამდე და სიახლეებთან ერთად სპეციალურ შეთავაზებებს თბილისის წიგნის ბაზრობასა (10-13 აპრილი) და თავის საიტზე აანონსებს.

რა წავიკითხოთ პატარებთან ერთად? 

• თომას ზღაპრები - გიორგი კეკელიძე

 

ამ წიგნში გაიცნობ თომას და მის მეგობრებს - ჯუჯებს, ბაიბურას, ავყანყალას, სიტყვაყლაპიას, ნიკა ლოს, მარი ლას, თუთას, თომთეს, ცაცანცალას... წახვალ საოცარ მოგზაურობაში მიწის ქვეყნიდან ცის ქვეყნისკენ და მიზანი გექნება უდიადესი - მზე მოიყვანო თოვლიან აგვისტოში, რომ გაიხარონ შოკოლადის ხეებმა და დიდხანს გაგრძელდეს ბავშვობა. ამ მოგზაურობაში, ბევრ სხვა უცნაურობასთან ერთად, იმასაც აღმოაჩენ, რომ შოკოლადის ხეების გახარებას არც მზე სჭირდება, არც სითბო და არც გაზაფხულ-ზაფხული. შოკოლადის ხეების სიცოცხლის წესში სულ სხვა რამ წერია და ეს რომ გაიგო, „თომას ზღაპრები“ ბოლომდე უნდა წაიკითხო.

• ბუ ტუსურა მიდის სტუმრად ბუ კნაჭოსთან  - ლელა ცუცქირიძე

იცი, როგორ ემზადებიან ბუები სტუმრად წასასვლელად? არა? მაშინ ეს წიგნი გულდასმით უნდა წაიკითხო. პატარა ბუ ტუსურა თავისმა მეგობარმა ბუ კნაჭომ სტუმრად დაპატიჟა, ერთად ვისაუზმოთ და მერე კარგად გავერთოთო. ჰოდა, აქ დაიწყო ამბავი, რომელიც ძალიან სახალისოც არის და თან კარგ „მანერვებსაც“ გასწავლის. ეს ცოდნა კი ყველგან და ყოველთვის გამოგადგება. ამიტომ არ დაიზარო და გაჰყევი ტუსურას სტუმრად - მასთან და კნაჭოსთან ერთად ნამდვილად არ მოიწყენ. თუმცა მანამდე ტუსურას დედის დარიგებებიც კარგად მოისმინე - ამ წიგნში რაც წერია, ყველაფერი დასამახსოვრებელია. ხომ იცი, რომ ბუ სიბრძნის სიმბოლოა!

• თოვლის გუნდა და მისი მეგობრები - ნათია ჯანაშია

 

ამ მშვენიერ წიგნში თოვლის გუნდას უჩვეულო და სახალისო თავგადასავლები გელოდება. გაინტერესებს, ვინ არიან გუნდას მეგობრები, როგორი გეგმები აქვს შენს საყვარელ გმირს, როგორ ერთობა, რა აინტერესებს, რა აშინებს და რაზე ოცნებობს? წიგნში „გუნდა და მისი მეგობრები" ამ კითხვებზე საინტერესო ამბებად მოთხრობილი პასუხები გელოდება. შენც დაუმეგობრდი გუნდას, გაიცანი მისი მეგობრები და გაჰყევი ექსკურსიაზე. მასთან ერთად ცას წერილიც მისწერე. გასაჭირშიც ნუ მიატოვებ.

თანამედროვე თარგმანების თაროზე რამდენიმე საინტერესო სიახლე გელოდებათ

• მონა - ისააკ ბაშევის ზინგერი 

 

„მონა“ პოლონელ-ამერიკელი მწერლის, ლიტერატურის დარგში 1978 წლის ნობელის პრემიის ლაურეატის, იცხოკ (ისააკ) ბაშევის ზინგერის, მსოფლიო ბესტსელერია.

მე-17 საუკუნე. პოლონეთი. ადგილობრივებისა და ებრაული თემის თანაცხოვრება უნდობლობით, შუღლითა და სისხლით არის სავსე. იაკობი წარჩინებული ებრაელია, დაწყებითი ებრაული ტრადიციული სკოლის მასწავლებელი, რომელსაც ძალიან ახალგაზრდას შეეხო ამ დაპირისპირების მსახვრალი ხელი – ჰაიდამაკებმა დაარბიეს, გადაწვეს და გაჟლიტეს მისი ქალაქი და ამ დაუნდობელ ანგარიშსწორებას შეეწირა იაკობის ცოლ-შვილიც. ის ცოცხალი გადარჩა, მაგრამ, უპოვარი და უსახლკარო, პოლონელი გლეხის ოჯახს მონად მიჰყიდეს. განმარტოებული, გამრჯე, კეთილსინდისიერი და საკუთარ რწმენაში ჩაძირული იაკობისთვის ერთადერთი თავშესაფარი ლოცვაა. მაგრამ თანდათან მის გულს სხვაგვარი ფორიაქიც ეპარება, რომლის მიზეზიც პოლონელი ვანდაა – სოფელში მარგალიტივით გამორჩეული, ოქროსფერნაწნავებიანი გლეხის ქალი. ორი რელიგია, ორი ხალხი, ორი ტრადიცია და წეს-ჩვეულებები – ყველაფერი ამ სიყვარულის წინააღმდეგაა, მაგრამ ის უძლეველია, თუმცა მსხვერპლსაც ითხოვს.

მთარგმნელი: კატია ვოლტერსი

• შერლი - შარლოტ ბრონტე

 

 შერლის შარლოტ ბრონტე უმძიმეს დროსა და გარემოში წერდა – მისი ძმა და ორი და სწორედ იმ პერიოდში შეიწირა ტუბერკულოზმა. რომანი 1849 წელს გამოიცა ფსევდონიმით კარერ ბელი. ეს არის შარლოტ ბრონტეს ყველაზე „მძაფრსიუჟეტიანი“ ნაწარმოები, შეზავებული კლასიკური გოტიკური და დეტექტიური მოტივებით. ეს არის რომანი ორ ძლიერ ახალგაზრდა ქალზე – ღარიბ და ობოლ ქეროლაინზე, რომელსაც თავდავიწყებით უყვარს მდიდარი ფაბრიკანტი რობერტ მური, და მის საუკეთესო მეგობარზე, მდიდარ, ლამაზ და თავნება შერლიზე, რომელსაც რობერტ მურის ძმა, მორიდებული და განათლებული გუვერნანტი ლუი უყვარს. როგორ დასძლევენ მეგობრები თავიანთ საზოგადოებაში დამკვიდრებულ ხავსმოკიდებულ შეხედულებებსა და ცრურწმენებს, ამ საინტერესო რომანში შეიტყობთ.

მთარგმნელი: ლევან ინასარიძე

• სიკვდილი აუზთან - აგათა კრისტი 

 

„პალიტრა L-ის“ მკითხველისთვის განსაკუთრებით საყვარელი დეტექტივების სერიას მორიგი წიგნი შეემატა. შეუდარებელი პუაროსა და დეტექტივების დედოფლის, აგათა კრისტის მოყვარულები ამ სიახლეს დიდი ხანია ელიან:ინგლისელი არისტოკრატთა ოჯახი უქმეებზე ნათესავებს იწვევს, გაერთობიან, ნუგბარ კერძებს შეექცევიან, კარგი ამინდით დატკბებიან, მამულის სანახებში გაისეირნებენ. სტუმრები სასიამოვნო ხალხია, განსაკუთრებით ახალგაზრდა, ნიჭიერი ექიმი, სიცოცხლით სავსე, ნათელი კაცი და... სწორედ მას კლავენ. მიწვეულთა შორის იყო დიდი ერკიულ პუაროც, რომელიც, როგორც მეზობელი, ლანჩზე დაპატიჟეს, ის კი მკვლელობის მოწმე შეიქნა…

მთარგმნელი: პაატა ჩხეიძე

• მოახლე - ფრიდა მაკფადები

Top თრილერის სერია მძაფრი ემოციების მოყვარულებს ახალ ბესტსელერს სთავაზობს: ციხიდან ციხეზე უარეს საპყრობილეში, რომელსაც სიმპათიური ურჩხული უსჯის სულ უბრალო შეცდომისთვისაც კი. უნებური მკვლელი ისევ მკვლელობის სურვილს ებრძვის. სხვა გზა არა აქვს, რადგან წამებას ვეღარ გაუძლებს. ერთხელ თავისუფლება დაკარგა იმისთვის, რომ სიბილწეს მოუღო ბოლო, მეორედ ამას ვეღარ აიტანს. არადა, სიყვარულზე ოცნებობდა, საშინელ ხაფანგში კი გაება მეორე ტანჯულის გულისთვის თუ სულსწრაფობისთვის?

მთარგმნელი: ანტონ სინატაშვილი

• და ყოველ დილით სულ უფრო გრძელდება გზა შინისკენ - ფრედრიკ ბაკმანი 

ერთ-ერთი ყველაზე ცნობილი შვედი მწერლის, ფრედრიკ ბაკმანის ტექსტს თუ დავუჯერებთ, ერთხელაც დგება დღე, როცა უნდა წახვიდე, მანამდე კი მოგონებების დროა, სევდანარევი სიხარულით გახსენება იმისა, ვინც ან რაც გიყვარდა და დაუნდობელმა დრომ წაიღო. გახსენება იმისა, თუ როგორ გიყვარდა სამყარო, ქალი, რომელმაც ვაჟი, მან კი საყვარელი შვილიშვილი – ნოანოა გაჩუქა, გონიერი ბიჭი, რომელსაც ბაბუასავით უყვარს მათემატიკა, უამრავ კითხვას სვამს და ბაბუისგან სწორ პასუხებსაც იღებს. ვისაც ცხოვრება ეჩქარება, ის განშორებას აჩქარებსო, ეუბნებოდა ბებია ნოას. არადა, როგორ არ უნდა იჩქარო?! ხომ უნდა უთხრა შენს საყვარელ ადამიანებს, რომ ყველა ძალიან გიყვარდა, მაგრამ ამის სათქმელად ხშირად დრო არ გქონდა! დიახ, სიბერე მოგონებების დროა, მძაფრი სურვილი იმისა, ბოლო წუთამდე გახსოვდეს, ვინც და რაც გიყვარდა; სიბერე კიდევ ერთი სიხარულია, რომ სანამ კოსმოსში წახვალ, საყვარელი ადამიანები შენ გვერდით იქნებიან.

მთარგმნელი: პაატა ჩხეიძე

• შეცოდებანი - ლუიზ კენედი 

 

ლუის კენედის „შეცოდებანი“ არის წიგნი ჩვეულებრივ ადამიანებზე, რომელთაც ჩვეულებრივი ცხოვრება სურთ „არაჩვეულებრივ“ დროებაში. მთავარი გმირი, კუშლა ლავერი, ახალგაზრდა ქალია, რომელიც ირლანდიის პატარა ქალაქში ცხოვრობს. მისი ცხოვრება თავდაყირა დგება მას შემდეგ, რაც ერთ საღამოს, პაბში, ბელფასტელ ცოლიან მამაკაცს ხვდება და, შედეგად, სულ უფრო მეტად ეფლობა იმ რეალობაში, სადაც სიყვარულს საზღვრები აქვს, ინდივიდუალური სურვილები და სოციალური რეალობა კი ხშირად შეუთავსებელია. „მნიშვნელობა არა აქვს, რას აკეთებ, – უთხრა მაიკლმა კუშლას, – მთავარია, ვინ ხარ“. და შემდეგ, მკითხველი ხედავს, რომ მთელი თხრობა ამ ბუნდოვანებას ეხება – რეალისტური ნაწარმოების ტრადიციულ თემას, ქმედებისა და პიროვნების ჭეშმარიტი რაობის შეპირისპირებას, რომელიც წიგნში სოციალურ-პოლიტიკური დაპირისპირების ფონზე ვითარდება. რა ფასად უჯდება წყვილს აკრძალული კავშირი? ანდა რამდენად შესაძლებელია ბედნიერების პოვნა სამყაროში, სადაც „ვინ ხარ“ უფრო მნიშვნელოვანია, ვიდრე „რას აკეთებ?“

მთარგმნელი: ნათია ჩუბინიძე

წიგნის ბაზრობაზე ქართველი ავტორების ახალ ტექსტებსა და დებიუტანტებსაც შეხვდებით:

• მშვიდობით, თემურ! - ბასა ჯანიკაშვილი 

კაცმა თავის მოკვლა რომ გადაწყვიტოს, რას გავაკეთებთ? ცხადია, ამის უფლებას არ მივცემთ, თუმცა, იცით, რომ შეიძლება გამოჩნდნენ ისეთებიც, ამ კაცის უბედურებას საკუთარი ბედნიერებისთვის რომ გამოიყენებენ?! აბსურდია, არა? ასეთია ბასა ჯანიკაშვილის პიესა „მშვიდობით, თემურ!“ – ამბავი გროტესკული მინიშნებებითა და მიგნებებით. თემური — პიესის მთავარი გმირი – თავის მოკვლას გადაწყვეტს, მაგრამ ვინ აცდის? უფრო სწორად, ვინ აცდის ეს ისე გააკეთოს, როგორც თავად სურს – მის გვერდით ჩნდებიან ე.წ. დაინტერესებული პირები – თვითმკვლელობის დამგეგმავები – და „ურჩევენ"" თოკზე ისე ჩამოეკიდოს, როგორც თავად აწყობთ, როგორც გამოადგებათ. თემურის თვითმკვლელობა ისეთი უნდა იყოს... მათთვის სარფიანი, ხელსაყრელი და ამიტომ გადაწყვეტილია: მშვიდობით, თემურ! მაგრამ საინტერესოა, როგორ დაგვემშვიდობება თავად თემური?

• სახელისა და დიდების ფენომენი ანტიკურ ლიტერატურაში - ქეთი ნიჟარაძე 

„ტექსტი ეძღვნება მსოფლიო კულტურის ისტორიის ერთ-ერთ უმნიშვნელოვანეს პრობლემას – როგორი იყო ძველ სამყაროში ადამიანის ცხოვრების აზრის გაგება და სად ხედავდნენ მოკვდავები სიცოცხლის პესიმისტური ფინალის – სიკვდილის განეიტრალების შესაძლებლობებს. ავტორი განსაკუთრებულ ყურადღებას აქცევს იმ გარდატეხას, რაც ჰომეროსმა შეიტანა სიკვდილის წინაშე შიშის საკითხში და რასაც მის შემდეგ ღრმად და საფუძვლიანად განიხილავდნენ ძველი ბერძენი და რომაელი ავტორები“, - რისმაგ გორდეზიანი. 

• არაფერი არ გვემართება - თაკო წულაია

არაფერი არ გვემართება თაკო წულაიას პირველი წიგნია, რომელიც მცირე ზომის მოთხრობებს აერთიანებს. ტექსტები მხატვრული თვალსაზრისით ძალიან მრავალფეროვანია, მაგრამ მათ ერთი რამ აქვს საერთო – ეს არის ლიტერატურა, რომელიც თითქოს ცხოვრებასთან აკვიატებულ დაპირისპირებაში, კონკურენციაში იბადება. როგორი რეალობაა გამოსადეგი იმისთვის, რომ მისგან ხელოვნება შეიქმნას? რა მოხდება, თუ მწერალი მეტისმეტად ჩვეულებრივი ამბების დაუსრულებელ წრებრუნვაში აღმოჩნდება? ამბების, რომლებიც არაფრით არ არის „საკმარისი“ ლიტერატურისთვის? ავტორი სწორედ ამ შიშებთან შეჯიბრების პირობებში წერს. თითოეულ ჩვენგანს აქვს თავისი ერთი, განსაკუთრებული „შინაგანი ამბავი“, რომელიც მთლიანად განსაზღვრავს ჩვენს იდენტობას – სწორედ ამ საინტერესო ეგზისტენციალურ თემას ეხება მოთხრობების აბსოლუტური უმეტესობა. ხმაურიანი მეზობლებით სავსე კოტეჯში გამოკეტილი მდგმური, გარდაცვლილი მამის სახლში მარტო დარჩენილი ქალიშვილი, ფოტოებიდან გაუჩინარებული ქალი, ბიბლიოთეკარი, რომელიც ათას ოთხას ოთხმოცდაცხრამეტ წერილს აგზავნის ერთი ადრესატის საპოვნელად, სახელდაკარგული უცნობი, სტუდენტი, რომელსაც ინგებორგ ბახმანის სურათი ელაპარაკება, ლიტერატურული კლუბის წევრები თუ პიჯაკად გადაქცეული კაცი – თაკო წულაიას უკლებლივ ყველა პერსონაჟი გვიყვება თავისი ცხოვრების იმ ერთადერთ, შეიძლება ითქვას, დიაგნოსტიკურ ამბავს, რომელზე წერაც ღირს.

• თანამედროვე გოგონები წარსულიდან - ნათია ჟვანია

ეს წიგნი ქალების დიდ ამბებს მოგიყვებათ. აქ იპოვით ქალებს ყველგან, სადაც აქამდე არ გეგულებოდათ – მეცნიერებაში, ლიტერატურაში, პოლიტიკაში, სპორტში, ალპინიზმში. იპოვით და კიდევ ერთხელ იამაყებთ თქვენი ქვეყნით, საქართველოთი, რომელსაც ასეთი უშიშარი, განსაკუთრებული, შეუჩერებელი, „დედანი, მარად ნეტარნი‘‘ ჰყავს. ისტორიული დავთრების წაკითხვისას ქალების სახელებს ნაკლებად შეხვდებით, ისიც – თუ წმინდანია, მეფე ანდა რომელიმე მეფის ცოლი. ესაა და ეს, სულ რამდენჯერმე გაკრთება პოლიტიკოსი თუ გმირი ქალების სახეები და სახელები. არადა, საქართველოს უახლეს თუ ძველ ამბებში ქალთა სახეების ისეთ შთამბეჭდავ გალერეას წააწყდებით, თუნდაც გაკვრით, წინადადებებს შორის დამალულ, მაგრამ მაინც ასეთ გასაოცარ სახეებს!

მსოფლიო ტრენდები და ქართული გამოცემები 

• ილონ მასკი - უოლტერ აიზეკსონი

სტივ ჯობსისა და სხვა ბესტსელერი ბიოგრაფიების ავტორისგან ეს საოცრად ინტიმური ისტორია მსოფლიოს ყველაზე საოცარ, თუმცა ამავდროულად, ისეთ გამომგონებელს ეხება, რომელიც არაერთხელ გამხდარა დავის საგანი. მისი ხელშეწყობით სამყარომ ელექტროავტომობილების ეპოქაში გადაინაცვლა. სწორედ მასკმა აიყვანა სამყარო კოსმოსური კვლევებისა თუ ხელოვნური ინტელექტის მაღალ საფეხურზე. დიახ, კიდევ – მან Twitter-იც იყიდა. ბავშვობაში ილონ მასკი სამხრეთ აფრიკაში ცხოვრობდა და იმ დროს ხშირად ბულინგის მსხვერპლიც კი იყო. ერთ დღეს კიბეზე დააგორეს და დიდ ხანს ურტყეს კიდეც. ილონი კლინიკაში მთელი კვირა იწვა, მაგრამ ფიზიკური ნაიარევი არაფერი იყო იმ ემოციურ ტკივილთან შედარებით, რომელიც მისთვის მამას მიუყენებია. 2022 წლის დასაწყისში – ერთ წელიწადში მას შემდეგ, რაც Spaxe X-მა 31 რაკეტა გაიყვანა ორბიტაზე, Tesla-მ მილიონზე მეტი ავტომობილი გაყიდა, ხოლო მასკი დედამიწაზე ყველაზე მდიდარ ადამიანად იქცა, – ილონი ნაღვლიანად მსჯელობდა დრამისადმი საკუთარი დაუოკებელი ლტოლვის შესახებ. 

ორი წლის განმავლობაში უოლტერ აიზეკსონი აჩრდილივით დასდევდა მასკს, ესწრებოდა მის თათბირებსა და შეხვედრებს, თან ახლდა ქარხნებში და დროის უმეტეს ნაწილს თავად ილონ მასკისა და მისი ოჯახის, მეგობრების, თანამშრომლებისა თუ მოწინააღმდეგეების გამოკითხვაში ატარებდა. შედეგად მკითხველებს შემოგვთავაზა მასკის გამარჯვებებითა და რყევებით გამორჩეული ცხოვრების ამსახველი საოცარი ისტორია, რომელიც თავისთავად გვიჩენს კითხვას: ნუთუ სწორედ ის დემონები წარმოადგენს მასკის მთავარ მამოძრავებელ ძალას, რომელსაც შედეგად ინოვაციები და პროგრესი მოჰყვება.

მთარგმნელი: ხათუნა ბასილაშვილი

• CEO-ს დღიური - სტივენ ბარტლეტი

 

„ეს წიგნი ბიზნესის სტრატეგიის შესახებ არ არის. სტრატეგია წლის სეზონების მსგავსად იცვლება. ამ წიგნში ბევრად უფრო მდგრად ცნებებზე ვიმსჯელებთ. ჩემი ყველა წარმატებისა თუ მარცხის სათავე, როგორც ჩემი ანტრეპრენერული მოგზაურობის, ისე ათასობით ინტერვიუს ჩატარების დროს, პრინციპების ერთობლიობაა. ეს პრინციპები გაუძლებს დროს, ნებისმიერ ინდუსტრიაში გამოგადგებათ და მოერგება ნებისმიერი ადამიანის ამოცანებს, რომელსაც მნიშვნელოვანი საქმეების კეთება სურს და უნდა თავადაც გამორჩეული გახდეს. ეს ფუნდამენტური წესები სრულყოფილებისკენ სწრაფვის გარანტიას მოგცემთ. ეს წესები ეფუძნება ფსიქოლოგიასა და ქცევით მეცნიერებას, ჩემი ინტერვიუების შედეგებს ათეულათასობით ადამიანთან ყველა კონტინენტზე, ყველა ასაკობრივ ჯგუფსა და პროფესიაში და, რაღა თქმა უნდა, ჩემი საავტორო პოდკასტის ჩანაწერებს - საუბრებს მსოფლიოში ყველაზე წარმატებულ და შთამაგონებელ ადამიანებთან. ეს წესები დღესაც იმუშავებს და ასი წლის შემდეგაც“, – წერს წიგნის ავტორი სტივენ ბარტლეტი 

მთარგმნელი: გიორგი დოლიძე

• იცხოვრე, როგორც ქალღმერთმა - ჯინ მინგისი 

 

ეს ლეგენდარული ქალბატონები სიბრძნით, სიძლიერითა და შეუპოვრობით გამოირჩევიან. ოსანი, იორუბას სიყვარულის ქალღმერთი. ის ყოველთვის დაუპირისპირდება მათ, ვინც მიიჩნევს, რომ ქალები სუსტები არიან. რიანონი, ფერიების დედოფალი უელსიდან. ის არასდროს მისცემს სხვას უფლებას მის ნაცვლად მიიღონ გადაწყვეტილებები, არავის მისცემს თავისი გულისა და გონების გაკონტროლების უფლებას. ფრეია, სიყვარულისა და ომის სკანდინავიელი ქალღმერთი. ის არ ეგუება საზოგადოებრივ ნორმებსა და ზეწოლას, და ყოველთვის უწესებს სხვებს საზღვრებს. ეს ქალბატონები ისტორიამ დაივიწყა, მაგრამ თავად არასდროს დაივიწყებენ საყვარელ ქმნილებებს, ადამიანებს, განსაკუთრებით კი – გოგონებს, და ყოველთვის შეახსენებენ, როგორ დაიცვან თავი, როგორ გაუმკლავდნენ გამოწვევებს და რაც მთავარია - როგორ ირწმუნონ საკუთარი თავების.

მთარგმნელი: სოფო ჩერქეზიშვილი

კითხვა უნდა იყოს არა მხოლოდ ცოდნის წყარო, არამედ სიამოვნება, შთაგონება და თავგადასავალი. „საკითხავი ეს არის“ – მოდი, ერთად ვიპოვოთ შენი შემდეგი საყვარელი წიგნი!

R