ნინო სუხიშვილის 5 მთავარი რჩევა და თავის მოვლის საიდუმლოებები: ბებიის მემკვიდრეობა და სილამაზის ფორმულა - Marao
ნინო სუხიშვილის 5 მთავარი რჩევა და თავის მოვლის საიდუმლოებები: ბებიის მემკვიდრეობა და სილამაზის ფორმულა
ნინო სუხიშვილი ქართული ნაციონალური ბალეტის, „სუხიშვილების“, ხელმძღვანელია და ცნობილია თავისი დახვეწილი და ელეგანტური გარეგნობით. მისი სტილი ხშირად გამოირჩევა კლასიკური და თანამედროვე ელემენტების შერწყმით, რაც მის ვიზუალს განსაკუთრებულ ხიბლს ანიჭებს.
ნინო სუხიშვილი აქტიურად მონაწილეობს ფოტოსესიებში და საჯარო ღონისძიებებში, სადაც მისი გარეგნობა და სტილი ხშირად ხვდება საზოგადოების ყურადღების ცენტრში. ნინო სუხიშვილის გარეგნობა და ვიზუალი ხშირად განიხილება, როგორც ქართული სილამაზისა და ელეგანტურობის ნიმუში, რაც მას განსაკუთრებულ ადგილს ანიჭებს ქართულ კულტურულ სივრცეში.
ნინო სუხიშვილი სილამაზისა და ახალგაზრდობის შესახებ
ნინო სუხიშვილი სულ ცოტა ხნის წინ 60 წლის გახდა. ის ასაკის მატებას ტრაგედიად არ განიხილავს, უმტკივნეულოდ იღებს ყველა ახალ ნაოჭს სახეზე და მათ წარსულის ანარეკლად მიიჩნევს:
"ნატურალიზმია ჩემთვის მთავარი. რამდენი ნაოჭიც გაქვს, იმდენი პრობლემა გაწერია სახეზე. მივიჩნევ, რომ ნაოჭები ბუნებრივია. როდისღაც ჩამოგეკიდება კანი და ყოველთვის 20 წლის ვერ იქნები. ყველა ასაკს თავისი ხიბლი აქვს. ხელოვნურად რაღაცის გამოსწორებას, დამატებას, გაკეთებას არ მივესალმები. ნაოჭებში პრობლემას ვერ ვხედავ. ბებიაჩემი ისეთი დაჭმუჭნილი სახით დადიოდა, მაგრამ ყველაზე ლამაზი იყო.
ასაკის მატებასთან ერთად შინაგანმა ხიბლმა უნდა წამოიწიოს წინ. ქალს უნდა ჰქონდეს შარმი და ხიბლი, რაც ტუჩის ზომითა და თვალის ჭრილით არ განისაზღვრება. არ მეშინია არც დაბერების, არც ასაკის. ერთადერთი, რისიც მეშინია, ავადმყოფობაა. მომემატოს ასაკი, მაგრამ მინდა, ჯანმრთელი ვიყო", - ამბობდა ნინო სუხიშვილი.
ნინო სუხიშვილი სტილის შესახებ
მიუხედავად იმისა, რომ ნინო სუხიშვილის ჩაცმულობა, გამონაკლისის გარეშე, ყოველთვის დახვეწილი და ელეგანტურია, თავად ამბობს, რომ მის გარდერობში ბევრი ბრენდული სამოსი არ მოიძებნება. უპირატესობას ქართველ დიზაინერებს ანიჭებს და ბებიის კაბებსაც ხშირად ირგებს:
"მაქვს რამდენიმე გამოსასვლელი ბრენდული კაბა, ყოველდღიურ ცხოვრებაში ბევრი ცნობილი ბრენდი ნამდვილად არ მაცვია. სასცენოდ მაქვს ბევრი ქართველი დიზაინერის სამოსი, თუკი მკითხავენ, ვისი კაბა მაცვია, მიყვარს, როცა ქართველს ვასახელებ. გარდერობში არის ასევე „დრის ვან ნოტენის“, „ლანვინის“ კაბები. არ მაქვს „შანელი“, რადგან ძალიან ძვირია… „შანელი“ ბებიაჩემს უყვარდა. ასევე „ჰერმესი“ და „დიორი“.დღემდე მაცვია ბებიაჩემის საკონცერტო კაბები, მხოლოდ სცენაზე, რა თქმა უნდა.
ის, რაც ბებიისგან არ მაქვს, თავის მოვლის სიყვარულია. დაახლოებით საათ-ნახევარს ატარებდა სარკის წინ, მე კი სახლიდან გასვლის წინ 10 წუთი მჭირდება მხოლოდ", - ამბობს ნინო.
ნინო სუხიშვილის თავის მოვლის რუტინა
"სილამაზე ჩემთვის განწყობაა, დადებითი იმპულსი, სიხარულისა და ბედნიერების მომტანია. კარგი არ არის, როცა ქალი თავის თავს დროს არ უთმობს, თუმცა მე ამის ფუფუნება დიდად არ მაქვს. მიუხედავად ამისა, არის ასაკი, რომლის შემდეგაც საჭიროა მცირე ძალისხმევა მაინც გაიღო", - ამბობდა ნინო სუხიშვილი.
როგორც თავად განმარტა, ძვირადღირებულ პროდუქტებს არ იყენებს, თუმცა თავის მოვლის საკუთაეი ხერხები მაინც აქვს:
"მე ძალიან მიყვარს ყინულის პროცედურები, ეს სისხლის მიმოქცევისთვის ძალიან კარგია. დილით ყინულის კუბებით ვიმასაჟებ სახეს. მიყვარს სახის დაბანა საპნითა და წყლით, არ ვხმარობ განსაკუთრებულ ლოსიონებს. რა თქმა უნდა, საპონი უნდა იყოს კოსმეტოლოგიური. რადგან მშრალი კანი მაქვს, მიყვარს მსუყე დამატენიანებლები და ზეთები. ზეთებს თმაზეც ვხმარობ, თუმცა ეს ინდივიდუალურია. მე კარგად ვიყენებ ზეითუნის ზეთს, ასევე მომწონს ავოკადოს, ჟოჟობას, ხორბლის, არგანის ზეთები", - ამბობს ნინო.
ნინო სუხიშვილი განსაკუთრებულ მნიშვნელობას ანიჭებს ძილის რეჟიმს და ამბობს, რომ ცდილობს, 12-საათამდე დაიძინოს"
"კოკო შანელი ამბობდა, რომ ქალმა აუცილებლად უნდა დაიძინოს 12 საათამდე, რადგან 12 საათის შემდეგ არაფერი საინტერესო აღარ ხდებაო. მეც ძალიან მიყვარს ადრე დაძინება და ადრე გაღვიძება. ეს კანისა და ჯანმრთელობისთვის ძალიან სასარგებლოა. ვცდილობ ჯანსაღად ვიკვებო, ნაკლებად ვვარჯიშობ, თუმცა მიყვარს ფეხით სიარული", - ამბობდა ნინო.