"რადგან გამოვედი, ისე იგი მინდოდა და გამოვედი. მადლიერი ვარ მთელი ახალგაზრდობის, მე ვარ ახალგაზრდებთან! სიმღერა ნიჭიერად იყო გაკეთებული, ახალი რაღაც გამოვიდა და მე დამაინტერესა.
მადლიერი ვარ, ღმერთმა რომ ასეთი სიყვარული მაჩუქა ახალგაზრდების. ჩემი თაობიდან თითქმის ყველა წავიდა. ახლა ეკას, ნატალიას მეგობრები არიან, მაგრამ ეკას და ნატალიას შემდეგ კიდევ ხომ მოდის ახალგაზრდების თაობა? ეს არის ჩვენი მომავალი! ჩვენი დრო უკვე მთავრდება, მოდის ახალგაზრდების დრო!" - ამის შესახებ მომღერალმა ნანი ბრეგვაძემ Ambebi.ge-ისთან ინტერვიუში ისაუბრა.
24-25 მაისს Tbilisi Open Air განსხვავებული ფორმატით გაიმართა. Lisi Wonderland-ის ტერიტორიაზე წარმოდგენილი იყო ქართული თეატრი, ნაციონალური ბალეტი, ქართული მუსიკალური ლეიბლები, ბუნებრივი ღვინის ფესტივალი და თბილისის წიგნის ბაზრობა.
წლევანდელი ფესტივალი გამორჩეული იყო იმით, რომ მასში მონაწილეობა უცხოელ შემსრულებლებს არ მიუღიათ, ორი დღის მანძილზე მისული მსმენელის წინაშე სრულად ქართული მუსიკოსები და ბენდები წარდგნენ. სპეციალურად მოწვეულ სტუმართა შორის იყვნენ: პაატა ბურჭულაძე, ნანი ბრეგვაძე, მერაბ სეფაშვილი, გიული ჩოხელი და გიორგი უშიკიშვილი, სუხიშვილები...
ფესტივალმა ხმაურის ფონზე ჩაიარა. ნინო სუხიშვილის კრიტიკული განცხადებისა თუ ერეკლე გეწაძის პერფორმანსის ფონზე, ბევრს საუბრობდნენ ნანი ბრეგვაძის შესახებაც. მიუხედავად იმისა, რომ მსმენელმა ნანი ბრეგვაძე სცენაზე დიდი სიყვარულით მიიღო და ასევე გააცილა, სოციალურ ქსელში უამრავი კრიტიკული კომენტარი დაიწერა. ამბობდნენ, რომ ნანი ბრეგვაძე მსგავს ღონისძიებებში მონაწილეობა სარ უნდა იღებდეს.
ყველასათვის საყვარელი მომღერალი ნანი ბრეგვაძე არაერთი ათეული წელია, რაც სცენაზე დგას და ამ ხნის მანძილზე ყველა თაობის საყვარელი მუსიკოსი გახდა. მას ცოცხალ ლეგენდადაც კი მოიხსენიებენ. ის, გარდა ნიჭისა და ქარიზმისა, საზოგადოებას საკუთარი გამორჩეული, დახვეწილი და ელეგანტური გარეგნობითაც აღაფრთოვანებს. მუსიკოსი 88 წლის ასაკში შესანიშნავად გამოიყურება და აქტიურად აგრძელებს საქმიანობას.
ნანი ბრეგვაძე 1936 წლის 21 ივლისს დაიბადა. 1961 წელს დაამთავრა თბილისის კონსერვატორია. სასცენო მოღვაწეობა დაიწყო 1956 წელს საქართველოს პოლიტექნიკური ინსტიტუტის საესტრადო ორკესტრში. 1957 წელს გახდა მეექვსე საერთაშორისო ახალგაზრდულ-სტუდენტური ფესტივალის ლაურეატი მოსკოვში, სადაც გურამ ბზვანელის მიერ იოსებ გრიშაშვილის ლექსზე შექმნილი სიმღერა „ჩავაქრე სანთელი“ შეასრულა.
1959–1964 წლებში იყო საქართველოს სახელმწიფო საესტრადო ორკესტრის „რეროს“ სოლისტი, ხოლო 1964 წლიდან ვოკალურ-ინსტრუმენტული ანსამბლის „ორერას“ სოლისტი იყო.
იგი ქართველი კომპოზიტორების მრავალი ახალი საესტრადო ნაწარმოების პირველი შემსრულებელია. ასრულებს როგორც ქართულ ისე ყოფილ სსრკ ხალხთა და საზღვარგარეთის ქვეყნების სიმღერებს. წარმატებით გამოდის ყოფილ სსრკ ქალაქებსა და მსოფლიოს მრავალ ქვეყანაში...გაგრძელება