დათო კენჭიაშვილის რეგიონული ტურნე გრძელდება! 23 ივნისს მომღერალი კონცერტს ქუთაისში გამართავს - Marao

საქართველოს რეგიონული ტურნეს იდეა, ქართული ფოლკლორის გამორჩეულ მომღერალს, დათო კენჭიაშვილს თბილისის ფილარმონიის დიდ საკონცერტო დარბაზში ანშლაგით ჩატარებული  კონცერტის შემდეგ გაუჩნდა.  მსმენელთა დიდი ნაწილი გულდაწყვეტილი დარჩა, რადგან ვერ მოახერხეს საყვარელი მომღერლის კონცერტზე დასწრება თბილისში. ამიტომ, მომღერალმა გადაწყვიტა, თავად ჩავიდეს  მათთან და ტურნეს ფარგლებში საქართველოს ბევრი კუთხე მოიაროს. 

ტურნე ბათუმში, კულტურის ცენტრის საზაფხულო თეატრიდან დაიწყო. სავსე დარბაზი, საოცარი მუხტი, ორსაათიანი პროგრამა და იმპროვიზაცია - ფინალში ექსპრომტად შესრულებულმა აჭარულმა სიმღერამ დარბაზში განსაკუთრებული ემოციები გამოიწვია. აჭარელი მსმენელი კონცერტის დასრულების შემდეგაც არ დაიშალა, ისინი გარეთ ელოდნენ „საქართველოს ბულბულის“ გამოსვლას, რომ პირადად გაეზიარებინათ შთაბეჭდილებები და საყვარელ მომღერალთან სამახსოვრო ფოტოებიც გადაეღოთ. 

წარმატებული კონცერტის შემდეგ, დათო კენჭიაშვილი ახალი ემოციებითა და ენერგიით აგრძელებს საქართველოს მასშტაბით დაგეგმილ ტურნეს. მომდევნო გაჩერება ქუთაისი იქნება – 23 ივნისს, დათო თავის მსმენელს ლადო  მესხიშვილის სახელობის დრამატულ თეატრში შეხვდება.

მომღერალი აღნიშნავს, რომ ქუთაისის კონცერტისთვის განსაკუთრებული ემოციით ემზადება. მესხიშვილის თეატრი მისთვის განსაკუთრებული ადგილია, სადაც მრავალი საინტერესო წარმოდგენა უნახავს. მომღერალი სპეციალურად ჩავიდა ქუთაისში, რათა თეატრის სცენაზე დამდგარიყო და მისი ენერგეტიკა შეეგრძნო. ქუთაისის კონცერტზე გულშემატკივრებს ახალი სიმღერები და მოულოდნელი სიურპრიზები ელოდებათ.

დათო კენჭიაშვილი გულწრფელად აღიარებს, რომ ქუთაისში დაგეგმილი კონცერტი მისთვის განსაკუთრებული ემოციური დატვირთვის მატარებელია:

- ბათუმში წარმატებული კონცერტის შემდეგ, მალე ქუთაისს ეწვევით. როგორ ემზადებით ამ შეხვედრისთვის და როგორი განცდა გაქვთ ქუთაისელი მსმენელის წინაშე პირველად რომ უნდა წარდგეთ? 

- ბათუმის კონცერტმა ჩემთვის განსაკუთრებული მუხტი შექმნა, მაგრამ ქუთაისთან შეხვედრა სრულიად ახალი ემოციაა. პირველად ვდგები ქუთაისელი მსმენელის წინაშე და ეს პასუხისმგებლობასაც ბევრად აძლიერებს. პირველ შთაბეჭდილებას განსაკუთრებული ძალა აქვს — ის წარუშლელია. მინდა, რომ ჩვენი მუსიკა, ენერგია და გულწრფელი დამოკიდებულება მათთვის გულთან ახლოს იყოს. მთელი გუნდი ძალიან სერიოზულად ვემზადებით, რომ პირველი შეხვედრა დაუვიწყარი იყოს როგორც ჩვენთვის, ისე მათთვის.

- სად და როდის გაიმართება კონცერტი? რა მოლოდინი გაქვთ? ფიქრობთ, რომ ქუთაისელებიც ისე „აიტაცებენ“ თქვენს მუხტს, როგორც ბათუმელი მსმენელი? 

- კონცერტი 23 ივნისს გაიმართება მესხიშვილის სახელობის თეატრში — იმ თეატრში, რომელსაც ისტორია და სული აქვს. დარწმუნებული ვარ, რომ ქუთაისელებიც ისეთივე გულით მოეკიდებიან ჩვენს მუსიკას, როგორც ბათუმელები. დარბაზი, სადაც აუდიტორია გულწრფელად რეაგირებს, სრულიად ცვლის შესრულების ენერგიას. მოლოდინი დიდია — იმედი მაქვს, ქუთაისელების ოვაციებიც დარჩება ჩემს მეხსიერებაში ისევე, როგორც ბათუმელი მსმენელის ემოციები.

- ამზადებთ თუ არა რაიმე სიურპრიზს? რას უნდა ელოდოს თქვენი გულშემატკივარი ქუთაისის კონცერტზე? 

- გულშემატკივრებს ნამდვილად ელით სიურპრიზები — იქნება ახალი სიმღერები, რომლებიც მათთვის სულ ახლახან მოვამზადეთ. მინდა, რომ თითოეული კომპოზიცია სცენიდან პირდაპირ გულამდე მივიდეს. კონცერტზე არ იქნება მხოლოდ შესრულება — ვეცდებით, რომ ეს შეხვედრა ემოციური მოგზაურობა გახდეს. 

- რატომ შეარჩიეთ მესხიშვილის თეატრი? რა ემოციური კავშირი გაქვთ მასთან? 

- მესხიშვილის თეატრი ჩემთვის არა მხოლოდ სცენაა, არამედ შთაგონების და ბავშვობის მოგონებების ადგილი.  ქუთაისური ტურნესთვის სხვა სივრცე არც მინდოდა. იქაურ აურას დიდი ისტორია აქვს, და დარწმუნებული ვარ, ის ჩვენს ემოციებს იდეალურად მოერგება. მესხიშვილის თეატრს განსაკუთრებით ვაფასებ. იქ ბევრი შთამბეჭდავი სპექტაკლი მინახავს. ახლა, როცა თავად უნდა დავდგე ამ სცენაზე, ემოცია ორმაგია. სპეციალურად ჩავედი ქუთაისში — წარმოვიდგინე თავი პუბლიკის ადგილას, დავდექი სცენაზე, რომ ყველაფერი შემეგრძნო. ამ კედლებში ისეთი ენერგიაა, თითქოს მუსიკას თავად სივრცე გიკარნახებს.

 - ტურნეს ფარგლებში უკვე ფიქრობთ შემდეგი მიმართულების შერჩევაზე — რა განსაზღვრავს თქვენს არჩევანს, და რა ემოციური კავშირი გაქვთ კახეთთან ან სამცხე-ჯავახეთთან? 

- ტურნეს დაგეგმვა ჩემთვის მხოლოდ ლოჯისტიკა არ არის — ეს ადამიანებთან შეხვედრის სურვილია. უკვე განვიხილავთ შემდეგ ლოკაციებს, მათ შორის კახეთს და სამცხე-ჯავახეთს. ეს რეგიონები ჩემთვის განსაკუთრებულად ძვირფასია. მათი კულტურა, სტუმართმოყვარეობა და ტრადიციები დიდი ხანია მიზიდავს. ბოლო პერიოდში აბასთუმანი გახდა ჩემი ერთ-ერთი საყვარელი ადგილი — ხშირად ჩავდივარ, დიდ ენერგიას ვიღებ და გულით მინდა, იმ ენერგიით დავუბრუნდე იქაურ ხალხს.