"ყველაზე ბედნიერი 2 წუთი იყო ჩემს ცხოვრებაში..." - რა შემთხვევას იხსენებს ია ფარულავა - Marao
"ყველაზე ბედნიერი 2 წუთი იყო ჩემს ცხოვრებაში..." - რა შემთხვევას იხსენებს ია ფარულავა
- შენი ცხოვრების რომელი მომენტი გინდა, რომ თავიდან განიცადო?
- ყველაზე ბედნიერი 2 წუთი იყო ჩემს ცხოვრებაში, მოსკოვის საერთაშორისო კინოფესტივალზე რობერტ დე ნირომ რომ ამირჩია ყველაზე ლამაზ ქალად, სცენაზე რომ მომიხმო და ქართველები ცემს სახელს რომ ყვიროდნენ. მეორე შემთხვევა იყო, როცა თეატრალურ ინსტიტუტში ჩავაბარე და თუმანიშვილმა ხუთიანი დამიწერა. როცა ვნახე ჩემი სახელი და გვარი გამოკრული და სამსახიობო ოსტატობაში მეწერა ხუთიანი, ცაში ავიწიე. რომ გითხრა, ძალიან მხიარული ცხოვრება მქონდა-მეთქი, არა, თავს ვიმხიარულებ უბრალოდ, - თქვა ია ფარულავამ ვიკა ბუკიას გადაცემაში "ვიკასთან ფილტრის გარეშე".
ია ფარულავა დაიბადა 1967 წლის 5 თებერვალს თბილისში, სკულპტორისა და მხატვრის, ოთარ ფარულავას ოჯახში. მისი სამსახიობო კარიერა 12 წლის ასაკში დაიწყო, როდესაც რეჟისორ ნანა ხატისკაცის ფილმში „ძნელი დასაწყისი“ (1981) ობოლი გოგონას, თიკოს როლი შეასრულა.
მამამისი, ოთარ ფარულავა, ცნობილი ქართველი მხატვარი და მოქანდაკე იყო. მისი პირველი მეუღლე ოპერის მომღერალი მედეა ამირანაშვილი გახლდათ, რის გამოც ია ბავშვობაში ხშირად სტუმრობდა ოპერის თეატრს და კულისებიდან ადევნებდა თვალს წარმოდგენებს.
"ვარ ერთი გიჟი ქალი, მაგრამ არა სულელი" - ასე ახასიათებს საკუთარ თავს მსახიობი ია ფარულავა. ია უკვე მრავალი წელია, მაყურებლისთვის საყვარელი და, ამავდროულად, საინტერესო ფიგურაა. მას საკუთარი ცხოვრების, განვლილი გზისა თუ ოჯახის შესახებ არაერთხელ უსაუბრია საჯაროდ.
ია ფარულავას ბავშვობა ფერად და მხიარულ პერიოდად ახსოვს, სადაც ხელოვნება და კულტურა მნიშვნელოვან როლს ასრულებდა. მამის გავლენით, ის და მისი ძმა ხშირად ათვალიერებდნენ რენესანსის მხატვრების ნამუშევრებს და უსმენდნენ კლასიკურ მუსიკას, რაც მათ ესთეტიკურ აღქმაზე დიდ გავლენას ახდენდა. ია ფარულავას ერთ-ერთ ინტერვიუში დედასაც იხსენებდა და ამბობდა, რომ განსაკუთრებული გარეგნობის ქალი იყო: "დედა ძალიან ლამაზი ქალი იყო - მოდელი და მოცეკვავე. დედასაც ვგავარ და მამასაც. როდესაც მოსკოვში მოდის ჩვენება გაიმართა, ამ ჩვენებაში მონაწილეობას დედაჩემიც იღებდა. ტოქსიკური დედა იყო - თვითონ ვერ განახორციელა თავისი დიდი ოცნებები, არაჩვეულებრივად მღეროდა. ეგზოტიკური გარეგნობა ჰქონდა. თავისი თავის რეალიზება ვერ შეძლო და ამიტომ ცოტა ტოქსიკური იყო. თავისი მიზნები შვილებს გადასცა - და ჩვენც ისეთები გავხდით, როგორიც მას სურდა..."