"მწვერვალებს იპყრობს" - ნასტასია ლეგრან-ბაბლუანის შთამბეჭდავი გამოსვლა JACQUEMUS-ის ჩვენებაზე - Marao
"მწვერვალებს იპყრობს" - ნასტასია ლეგრან-ბაბლუანის შთამბეჭდავი გამოსვლა JACQUEMUS-ის ჩვენებაზე
29 ივნისს ვერსალის სასახლეში შთამბეჭდავი საღამო მოეწყო - ფრანგმა დიზაინერმა საიმონ პორტ ჟაკმუსმა ახალი კოლექცია „Le Paysan“ წარადგინა. ჩვენება განსაკუთრებულ დატვირთავს ატარებდა - ყველა გამოყენებული დეტალი დიზაინერის განვლილი ცხოვრების ანარეკლი იყო. უჩვეულო იყო ისიც, რომ ჩვენება პატარა ბიჭუნამ გახსნა, რომელმაც, სიმბოლურად, სასახლის დიდი კარი გააღო. ეს ბავშვი საიმონ პორტ ჟაკმუსს განასახიერებდა, გაღებული კარი კი - მის ახდენილ ოცნებებს.
ეს ჩვენება ქართველებისთვისაც ემოციური და განსაკუთრებული აღმოჩნდა, რადგან პოდიუმზე ქართველი ჟურნალისტის ოლგა ბაბლუანის ქალიშვილი, ნასტასია ლეგრან-ბაბლუანიც გამოჩნდა. "მწვერვალებს იპყრობს", "ქართული სილამაზე მსოფლიო სცენაზე", "რა საამაყო ფაქტია", - წერენ ნასტასიას ფოტოს ქვეშ.
ნასტასია ლეგრან-ბაბლუანის წარმატების გზა
ნასტასია ლეგრანი ყველასთვის კარგად ნაცნობი და საყვარელი ტელეწამყვანის, ოლგა ბაბლუანისა და ასევე ცნობილი ქართველი კინორეჟისორის, მსახიობის, მწერლისა და სცენარისტის, თემურ ბაბლუანის შვილიშვილია. მისი დედა, ოლგა ბაბლუანი ასევე საქართველოში ცნობილი ტელეწამყვანია. ნასტასია ლეგრანი 20 წლისაა, თუმცა უკვე მოახერხა სამოდელო სფეროში საკუთარი სიტყვის თქმა და მნიშვნელოვანი წარმატების მიღწევა. ის, მატილდა გვარლიანის კვალდაკვალ, კიდევ ერთი ახალგაზრდა ქართველი მოდელია, რომლის კარიერული მიღწევებითაც თამამად შეგვიძლია ვიამაყოთ.
Models.com-ის ინფორმაციით, ახალგაზრდა მოდელი, ნასტასია ლეგრანმა კარიერა პარიზში, Women Management Paris-დან დაიწყო. თანამშრომლობს ისეთ ცნობილ სამოდელო სააგენტოსთან, როგორიცაა Women Management Milan. ნასტასია ლეგრანი გამოვიდა ისეთი ბრენდების ჩვენებებზე, როგორებიცაა, Alaïa (S/F2025 Show), Courreges (F/W 25 Show), Dries Van Noten (F/W 25 Show), Chloe (F/W 25 Show), Schiaparelli (F/W 25 Show), Louis Vuitton (F/W 25 Show), Chanel (F/W 25 Show) და სხვ.
ნასტასია საფრანგეთში, პარიზში ცხოვრობს, იქ სწავლობს და საქმიანობს, თუმცა დედასთან და დასთან ერთად ხშირად სტუმრობს საქართველოსაც. მისი დედა, ოლგა ბაბლუანი ამბობდა, რომ სურს, მის შვილებს ჩვენს ქვეყანასთან მჭიდრო კავშირი ჰქონდეთ:
„ძალიან მინდა, რომ ჩემს შვილებს საქართველოსთან ჰქონდეთ ურთიერთობა და არ დაკარგონ. ახლა სამი კვირით ვიყავი პარიზში წასული და რომ ვბრუნდებოდი, ისე მეჩქარებოდა ჩამოსვლა, რომ ერთი სული მქონდა, როდის ჩავჯდებოდი თვითმფრინავში და ოთხ საათში თბილისში ვიქნებოდი. ჩემი შვილების უფროა პარიზი, ნამდვილი ფრანგები არიან.
ნასტასია, მიუხედავად იმისა, რომ კარიერულად სულ უფრო ვითარდება, სოციალურ ქსელში აქტიურობით არ გამოირჩევა და საკუთარ ფოტოებს იშვიათად აზიარებს. ინსტაგრამზე მხოლოდ სამიათასამდე გამომწერი ჰყავს და ცხოვრების მშვიდ სტილს ირჩევს.