ცოტა ხნის წინ ცნობილი გახდა, რომ შინაგან საქმეთა სამინისტრომ თბილისში, პროსტიტუციის ხელშეწყობის და პროსტიტუციისთვის ადგილის გადაცემის ბრალდებით 12 პირი დააკავა. ამბავი კიდევ უფრო რეზონანსული გახადა საქმეში საზოგადოებისთვის ცნობილი სახის, ხატია წერეთლის მონაწილეობამ.
მომღერალ ხატია წერეთელს, რომლის ნამდვილი სახელი და გვარი ირმა კურტანიძეა, პროსტიტუციაში ჩართული ქალებისთვის სისტემატურად დახმარება და გარკვეული თანხის სანაცვლოდ ფართების გადაცემა ედება ბრალად.
შსს-მ დღეს ფარულად გადაღებული კადრები გაავრცელა, რომელშიც ხატია წერეთელი იგივე ი.კ ფიგურირებს.
ხატია წერეთლის ახლო მეგობარი, გურამ არუთინაშვილი AMBEBI.GE-ის ესაუბრა:
"მე და ხატია საუკეთესო მეგობრები ვართ. თავზარი მაქვს დაცემული, ჩემთვის ეს ყველაფერი წარმოუდგენელია. მე იმ სალონში, თბილისში ბევრჯერ ვარ ნამყოფი და მსგავსი არაფერი ყოფილა. ის არაფერს მიმალავს, ჩვენ ყველანაირ თემაზე გახსნილად ვსაუბრობდით. მგონია, რომ ეს ყველაფერი მოწყობილია კონკურენტების მხრიდან. ხატია დიდი ხანია ამ სფეროშია, სამკურნალო, სარელაქსაციო მასაჟებს აკეთებს და მგონია, რომ ამ ყველაფერს როგორც მოწყობილს ისე დავარქმევდი. მისი შვილიც არ გამოდის კონტაქტზე. ძალიან კარგი შვილი ჰყავს, პროგრამისტია, საიტები აქვს და რეკლამებს ჰყიდის სხვადასხვა სტომატოლოგიურ კლინიკებზე", - ამბობს არუთინაშვილი AMBEBI.GE-სთან.