ბრიუს უილისის ბრძოლა დემენციასთან და ურთულესი რეალობა: "„ეს იყო ერთ-ერთი ყველაზე რთული გადაწყვეტილება, რაც კი ოდესმე მიმიღია“ - Marao

ჰოლივუდის ერთ-ერთ ყველაზე საყვარელ ვარსკვლავს, ბრიუს უილისს, უკვე რამდენიმე წელია მძიმე ჯანმრთელობის მდგომარეობა აქვს. 2022 წელს მისი ოჯახის გავრცელებული განცხადებით, მსახიობს აფაზია დაუდგინდა - მეტყველებისა და კომუნიკაციის უნარის სერიოზული დარღვევა, რის გამოც უილისმა კინო კარიერა დაასრულა. თუმცა მალევე აღმოჩნდა, რომ პრობლემა უფრო რთულად იყო: 2023 წლის თებერვალში ექიმებმა მას ფრონტოტემპორალური დემენცია (FTD) დაუდგინეს - ნევროლოგიური დაავადება, რომელიც გავლენას ახდენს არა მხოლოდ მეტყველებაზე, არამედ ემოციებზე, ქცევასა და მეხსიერებაზეც.

დასაწყისში ოჯახი იმედოვნებდა, რომ მკურნალობისა და სწორი გარემოს დახმარებით დაავადების პროგრესირება შენელდებოდა. თუმცა ბოლო თვეების განმავლობაში უილისის მდგომარეობა საგრძნობლად დამძიმდა. მას სულ უფრო მეტად უჭირს მეტყველება და ოჯახმა კომუნიკაციის საკუთარი ფორმები შექმნა. იმ ნიშნებითა და ჟესტებით, რომლითაც მსახიობი ახლობლებს პასუხობს.

• "წესიერი ქალის სინდრომი" - ნინო ხაჟომია საკუთარი დაავადების შესახებ საუბრობს 

ემოციურად რთული პერიოდი განსაკუთრებით მძიმედ გადაიტანა მისმა მეუღლემ, ემა ჰემინგმა, რომელმაც არაერთხელ ისაუბრა იმ სიცარიელეზე, რასაც ქმრის თანდათანობითი დისტანცირება იწვევს: „ბრუსი, რომელიც ადრე ყოველთვის ყურადღების ცენტრში იყო, თითქოს ქრება… თუმცა მისი ღიმილი და თვალები ისევ გვახსენებს, რომ ის ჩვენთან არის,“ – ამბობს ემა.

უილისის დაავადებამ ოჯახი მძიმე გადაწყვეტილების წინაშე დააყენა. როგორც ემა ჰემინგმა აღნიშნა, ქმარი ახლა ცალკე, ერთსართულიან სახლში ცხოვრობს, რომელიც სპეციალურად არის ადაპტირებული მისი მდგომარეობისთვის. იქ დამონტაჟებულია სამედიცინო აპარატურა, მუდმივად მორიგეობენ ექიმები და პერსონალი, ხოლო გარემო მაქსიმალურად მშვიდი და კომფორტულია, რათა მსახიობისთვის გადაადგილება და ყოველდღიური ცხოვრება გაადვილდეს.

„ეს იყო ერთ-ერთი ყველაზე რთული არჩევანი, რაც კი ოდესმე მიმიღია. მაგრამ, უპირველეს ყოვლისა, ვიცოდი, რომ ბრიუსს ეს ჩვენი ქალიშვილებისთვის სურდა“, - თქვა მისმა მეუღლემ, ემა ჰემინგმა.

• უახლესი ინფორმაცია სელინ დიონის ჯანმრთელობის შესახებ: რას წერს ამერიკული გამოცემა 

ბრიუს უილისი

ამერიკელი მსახიობი, პროდიუსერი, მუსიკოსი ბრიუს უილისი 1955 წლის 15 მარტს დაიბადა. ჰოლივუდის ერთ-ერთი ყველაზე მაღალანაზღაურებადი მსახიობი. მისი მონაწილეობით ცნობილი ფილმებია „კერკეტი კაკალი“, „არმაგედონი“, „მეხუთე ელემენტი“ და სხვა.

ბრიუს უილისი რვა წლის ასაკიდან იწყებს სამოყვარულო დრამატულ სტუდიაში მეცადინეობას. მოსინჯა სიმღერაც ბლუზის ანსამბლში, თამაშობდა სტუდენტურ თეატრალურ კოლექტივთან. 1977 წელს, 22 წლის ასაკში მან დაანება თავი კოლეჯში სწავლას. მცდელობა მიეღო როლი კინოში, სცენაზე, ტელევიზიაში უშედეგოდ მთავრდებოდა. 

უილისის დებიუტი კინოში შედგა 1987 წელს რეჟისორ ბ. ედვარდსის კომედიაში „ბრმად პაემანი“. ფილმი აღიარეს წარმატებულად და მან მსახიობს გაუხსნა ფართო ასპარეზი. ნიუ-იორკის პოლიციელის ჯონ მაკლეინის როლმა ფილმში „კერკეტი კაკალი“ და ფილმის კომერციულმა წარმატებამ საშუალება მისცა უილისს გაეგრძელებია თავისი გმირის ეკრანული ბიოგრაფია ორ გაგრძელებაში „კერკეტი კაკალი 2" და „კერკეტი კაკალი 3“, რომელიც გადაიღეს 1995 წელს, ხოლო 2007 წელს გამოვიდა „კერკეტი კაკალი 4“.