პირველად ისტორიაში: ორი ქართველი, მატილდა გვარლიანი და დემნა გვასალია GUCCI-ისთვის - Marao
პირველად ისტორიაში: ორი ქართველი, მატილდა გვარლიანი და დემნა გვასალია GUCCI-ისთვის
2025 წლის მარტში მოდის სამყაროში ახალი ამბავი ელვისებურად გავრცელდა - დემნა გვასალია იტალიური მოდის სახლის, Gucci-ის შემოქმედებით დირექტორად დაინიშნა. ამის შესახებ ინფორმაცია ბრენდის მფლობელმა ფრანგულმა ჰოლდინგმა, Kering-მა გაავრცელა.
"მოდამ განსაზღვრა მისი გზა და დღეს ეს გზა უნიკალურია. ეს არის ის, რაც Gucci-ს იმსახურებს და სჭირდება მას მომავლისთვის“, - თქვა Gucci-ს აღმასრულებელმა დირექტორმა სტეფანო კანტინომ ჟურნალისტებთან საუბრისას.
ინფორმაციას თავად დემნა გვასალიაც გამოეხმაურა:
"ნამდვილად აღფრთოვანებული ვარ, რომ შევუერთდი Gucci-ის ოჯახს. ჩემთვის დიდი პატივია წვლილი შევიტანო სახლში, რომელსაც ღრმად ვცემ პატივს და დიდი ხანია აღფრთოვანებული ვარ. მოუთმენლად ველი, რომ სტეფანოსა და მთელ გუნდთან ერთად Gucci-ის საოცარი ისტორიის ახალი თავი დავწერო“, - ნათქვამია დემნა გვასალიას განცხადებაში.
დემნა გვასალიას სადებიუტო კოლექცია Gucci-ში
სულ ცოტა ხნის წინ დემნა გვასალიას Gucci-სთვის შექმნილი პირველი კოლექცია ხელმისაწვდომი გახდა. მსურველებს კოლექციის Lookbook-ის დათვალიერება უკვე შეუძლიათ. ეს ამბავი განსაკუთრებით საინტერესო და აღმაფრთოვანებელი აღმოჩნდა ქართველებისთვის, რადგან Lookbook-ში ქართველ მოდელს, მატილდა გვარლიანსაც შეხვდებით. მისი ფოტო კი თავად Gucci-ს ოფიციალურ Instagram გვერდზეც შეგიძლიათ ნახოთ. ეს ქართველი დიზაინერისა და ქართველი მოდელის პირველი გადაკვეთაა Gucci-ში.
დემნას ხედვა Gucci-ისთვის
„მე მებრძოლი ვარ და ცხოვრებაში უმეტესად რაღაცების დამტკიცება მიწევს, ამიტომ გარე მოლოდინები გვერდით მოვლენად იქცევა“.
WWD-სთან საუბრისას დემნამ აღნიშნა, რომ ის მზადაა ამ გამოწვევისთვის, კარგად იცის, რომ მისი პირველი კოლექცია მიკროსკოპულად შემოწმდება ამ სფეროს ექსპერტების მიერ, მაგრამ მან იცის, როგორ გაუმკლავდეს ამ ზეწოლას.
"მე ჯერ არ წარვადგენ ჩემს ხედვას, არამედ ვაშენებ პლატფორმას, რომელზეც შემდეგ დავაშენებ ჩემს ხედვას. მინდა, ჩემი ინტერპრეტაციით შევცვალო Gucci-ის გაგება და აღქმა", - ამბობს ის. პირველ ოლექციას დემნა გვასალიამ "ბავშვური ნაბიჯები" უწოდა.
„გუჩის“ იმიჯის აღსაწერად, დემნამ შექმნა პერსონაჟების სერია, რომლებიც „ლა ფამილიას“ ნაწილია, თითოეულს თავისი პიროვნება და დამოკიდებულება აქვს. ახლად დანიშნულ პრეზიდენტთან და აღმასრულებელ დირექტორთან, ფრანჩესკა ბელეტინისთან თანამშრომლობით, დიზაინერმა გადაწყვიტა, ორშაბათს გამოეცა კატრინ ოპის მიერ გადაღებული ლუქ-ბუქი.
