"ყოველი დილა იწყება 07:00 საათზე, როცა ჯერ კიდევ სიბნელეა, 5 წუთი მაქვს სიმშვიდისთვის და მერე ვიწყებ ყველაზე რთულ საქმეს" - როგორია ლელა მებურიშვილის ერთი დღე - Marao
"ყოველი დილა იწყება 07:00 საათზე, როცა ჯერ კიდევ სიბნელეა, 5 წუთი მაქვს სიმშვიდისთვის და მერე ვიწყებ ყველაზე რთულ საქმეს" - როგორია ლელა მებურიშვილის ერთი დღე
"ყოველი დილა იწყება 07:00 საათზე, როცა ჯერ კიდევ სიბნელეა, 5 წუთი მაქვს სიმშვიდისთვის და მერე ვიწყებ ყველაზე რთულ საქმეს, ბავშვების გაღვიძებას. ვცდილობ, მშვიდად გავაღვიძო და მივცე მათ დრო, ალბათ, ამიტომაც თითქმის ყოველთვის ვაგვიანებთ სკოლაში. შემდეგ ვიწყებ საუზმის მომზადებას, ბავშვებისთვის ლანჩ ბოქსის გამზადებას, ხანდახან ვრთავთ აქტიურ მუსიკას, ვცეკვავთ და ვერთობით, რომ ხასიათზე დავაყენო, ხანდახან ვკამათობთ კიდეც, ხანდახან მეწუწუნებიან, მაგრამ ყოველთვის ყველაფერი მთავრდება ჩახუტებითა და კოცნით.
ამ ყველაფრის შემდეგ იწყება ჩემი მეორე დღე: ძალიან ბევრი საქმით, რაც თავისთავად ყველმა ქალმა უნდა გავაკეთოთ და მერე უკვე ჩვენ საქმეებსა და სწავლას მივხედოთ.
ჩემი აზრით, ყველა ქალი გმირია. ჩუმად, ყოველდღიურად, ათასობით საქმეს ასწრებს - სახლშიც და გარეთაც. თან სწავლობს, ვითარდება, მუშაობს, წარმატებებს აღწევს. მოთმინებით უსმენს შვილებს და მათ მაქსიმალურ სითბოსა და სიყვარულს უნაწილებს. საჭიროების შემთხვევაში კი იცავს. ამ ყველაფერს აკეთებს ისე, რომ ფანტასტიკურად გამოიყურება და მეგობრებისთვისაც პოულობს დროს. ნამდვილად არ არის ცოტა. ძალიან მაგრები ხართ, გოგოებო" - ამბობს ლელა მებურიშვილი გამოქვეყნებულ ვიდეოში.
ლელა მებურიშვილი ოჯახი
მსახიობმა 2013 წელს ბაჩო საგანელიძეზე იქორწინა და მათ ორი შვილი, ლილიკო და ალექსანდრე ჰყავთ. წარმატებული კარიერის, საზოგადოების სიყვარულისა და პოპულარობის მიუხედავად, ცოტა ხნის წინ ლელამ ოჯახთან ერთად ლონდონში წასვლის გადაწყვეტილება მიიღო. მსახიობი მეუღლესა და შვილებთან ერთად ახლა იქ ცხოვრობს, თუმცა საქართველოსაც ხშირად სტუმრობს.
"30 წლის ვიყავი, როდესაც პირველი შვილი შემეძინა. ახლანდელი გადმოსახედიდან ვთვლი, რომ ყველაზე სწორი ასაკი იყო. მანამდე მაინც სხვა საფიქრალი გაქვს, გართობა, მოგზაურობის სიყვარული, ასევე, კარიერაში წინსვლა.
შეიძლება ამას სახელს არ არქმევდნენ, მაგრამ როდესაც ახალნამშობიარები ქალი დედასთან გადადიოდა საცხოვრებლად, ეს უკვე ნიშნავდა, რომ დახმარება სჭირდებოდა. დედა ეხმარებოდა შვილს ბავშვის გაზრდაში და ქალსაც ჰქონდა საშუალება, ფორმაში რომ ჩამდგარიყო. მე არც ერთი შვილის დაბადების შემდეგ არ მქონია დეპრესია, ძალიან მიყვარს პატარები, განსაკუთრებულად, თოთოები და კარგად მახსენდება ჩემი შვილების გაზრდის პერიოდი.პირველი ბავშვი რომ გავაჩინე, მე და ჩემი მეუღლე რამდენიმე კვირა მარტოები ვიყავით ამერიკაში. გარშემო არავინ არ გვყავდა ოჯახის წევრი. სამშობიაროდან ორი დღის შემდეგ გამწერეს, მე და ჩემი მეუღლე ვისხედით და ვფიქრობდით, რა გვეშველება, ახლა როგორ მოვუვლით ამ პატარა არსებას-მეთქი, მაგრამ ამაზე ფიქრი ცოტა ხანს გაგრძელდა, ძალიან ადვილად ავუღეთ ალღო ყველაფერს და არ გაგვჭირვებია" - ამბობდა ლელა ერთ-ერთ ინტერვიუში.
ლელა ახლა შვილებთან და მეუღლესთან ერთად ბრიტანეთში ცხოვრობს და იქ საქმიანობს. დროდადრო კი სამშობლოსაც სტუმრობს და ამბობს, რომ ყველაზე მნიშვნელოვანი მიზეზი საქართველოში ჩამოსასვლელად მისი მშობლები არიან: საქართველოში, პირველ რიგში, ოჯახის – მშობლების და ძმების მონატრებით ჩამოვდივარ, რადგან ძალიან არ მინდა, მშობლებს, რომლებიც უკვე ასაკში არიან, ჩემი არყოფნით გული დავწყვიტო. ამასთანავე, ძალიან ბედნიერი ვარ, რომ ლევან წულაძე ყოველთვის მაძლევს მის სპექტაკლებში მონაწილეობის საშუალებას.
"საქართველოში დაბრუნება ჩემთვის ასოცირდება მზესთან და სითბოსთან, იმ ადამიანებთან, ვინც მიყვარს და ვისთან ყოფნაც მიხარია. რამდენიმე წლის წინ ჩემი ოცნება იყო, შევხვედროდი საინტერესო ადამიანებს, გამეცნო ისინი. მიხარია, რომ ეს ოცნება ამიხდა. ლონდონში ბევრ ცნობილ მსახიობს შევხვდი. ჰიუ გრანტი, ორლანდო ბლუმი... ძალიან დიდი შოკი იყო ჩემთვის და უდიდესი სიამოვნებაა მათთან საუბარი, გაცნობის შესაძლებლობა, თუმცა აღვნიშნავ, რომ ისინიც ნამდვილად ჩვეულებრივი ადამიანები არიან და არ გაგრძნობინებენ, რომ ასეთ წარმატებას მიაღწიეს."