კადრები პირდაპირ ბრძოლიდან: მერაბ შარიქაძის მეუღლის ემოციები და წუთები სანუკვარი გამარჯვების შემდეგ - Marao
კადრები პირდაპირ ბრძოლიდან: მერაბ შარიქაძის მეუღლის ემოციები და წუთები სანუკვარი გამარჯვების შემდეგ
სულ ცოტა ხნის წინ რაგბის გულშემატკივრებს მერაბ შარიქაძემ ვრცელი ინტერვიუთი მიმართა - ერთ წელზე მეტია, რაც საქართველოს რაგბის ნაკრების კაპიტანი მოედანზე აღარავის უნახავს - მიზეზებზე კი აქამდე მხოლოდ კულუარებში საუბრობდნენ.
ეს ინტერვიუ არამხოლოდ მისი და ქართული რაგბის გულშემატკივრებისთვის, არამედ მთელი საქართველოსთვის იქცა ამბად უსამართლობის, დაუდევრობის, უიღბლობის, ტკივილის, მაგრამ, ამასთან ერთად, სიძლიერის, გამბედაობის, ადამიანობისა და ცხოვრების თავიდან დაწყების შესახებ.
ყველაფერი კი დაიწყო ასე...
2024 წლის 5 ივლისს საქართველოს მორაგბეთა ეროვნული ნაკრები ზაფხულის ტესტმატჩების სერიის პირველ შეხვედრას ბათუმში, ფიჯის ნაკრების წინააღმდეგ ატარებდა, როცა მოულოდნელად ცნობილი გახდა, რომ ლუკა ჯაფარიძესა და ბექა გიგაშვილთან ერთად, შეხვედრას გამოტოვებდა გუნდის კაპიტანი, ბუკა (მერაბ) შარიქაძე.
მაშინ არც სამწვრთნელო შტაბს და არც თავად სპორტსმენებს მიზეზებზე არ უსაუბრიათ - ამ ამბის შემდეგ კი ბუკა შარიქაძე მოედანზე აღარ დაბრუნებულა.
სულ ცოტა ხნის წინ Setanta Sports Georgia-მ ბუკა შარიქაძის ინტერვიუ გამოაქვეყნა, სადაც სპორტსმენმა ცხოვრებისა და კარიერის ყველაზე რთულ შემთხვევაზე ისაუბრა, შემთხვევაზე, რომელმაც, ფაქტობრივად, დაასრულა მისი კარიერა, გეგმები და ოცნებები.
ბუკა შარიქაძე ინტერვიუში იხსენებს, რომ 5 ივლისის თამაშისთვის მზადებისას, მოდენაზე გასვლის წინ მენეჯერმა უთხრა, რომ კავშირის წარმომადგენლები იბარებდნენ. მაშინ ვერც წარმოიდგენდა, რომ ეს მომენტი მის ცხოვრებას სამუდამოდ შეცვლიდა - საქმე ეხებოდა 2022 წელს მომხდარ შემთხვევას, როცა დოპინგ ტესტის ჩასაბარებლად მერაბ შარიქაძეს თანაგუნდელმა ბუნებრივი მასალის (შარდის) გაცვლა სთხოვა, ამ დეტალებზე სპორტსმენი ინტერვიუში ვრცლად საუბრობს.
„ერთ-ერთი მორაგბის შარდის ფორმულა არ დაემთხვა ძველ ნიმუშს, მერე კი ვიღაცამ მისცა ინფორმაცია, რომ ჩემი შარდი იყო გამოყენებული. 25 დეკემბერს მივიღე წერილი, რომ 6 წლიანი დისკვალიფიკაცია მქონდა. შეთავაზება იყო, რომ ჯაშუში ვყოფილიყავი ან მემხილებინა მორაგბეები. ეგეთი არც რაგბი მინდა და არც ცხოვრება. ისე დამენგრია ვინმესთვის ცხოვრება, როგორც მე დამენგრა''.
მერაბ შარიქაძისთვის ეს ამბავი 6-წლიანი დისკვალიფიკაციით დასრულდა - დასრულდა მისი კარიერაც რაგბიში. ამბობს, რომ მისი განვლილი გზა, თავდადება და ერთგულება ასეთ დასასრულს არ იმსახურებდა.
„დოპინგ სკანდალის შემდეგ, არცერთ თამაშზე არ ვარ ნამყოფი. გულშემატკივრებისთვის არაფერი მითქვამს და უცბად რომ ტრიბუნაზე ვენახე მათ, უცნაური იქნებოდა. ეს თემა ჩემთვის ძალიან მტკივნეულია. ვერ შევეგუე იმ ფაქტს, რომ ნაკრებში აღარ ვარ. 2027 წლის მსოფლიო თასზე თამაშს ვაპირებდი, მერე ერთი წელი დარჩენას და რაგბიდან წასვლას. რაღაც დაუდევრობის გამო, რომ ამ ამბებს მოვწყდი, თან ამის გაანალიზებაც ვერ მოვასწარი. რაგბიში ბევრ რამეზე პასუხისმგებელი ვიყავი და უცბად ყველაზე შორს მდგომი აღმოვჩნდი. ჩემი ისტორია ასე არ უნდა დამთავრებულიყო, ერთი სიტყვით ამას გულისწყვეტას დავარქმევ''.
ამბობს, რომ თავს დამნაშავედ მიიჩნევს, თუმცა თვლის, რომ სასჯელი მისი დანაშაულის საპირწონე არ არის.
მერაბ შარიქაძეს საქართველოშიც და მსოფლიოშიც ათასობით გულშემატკივარი ჰყავს, მაგრამ მათ შორის განსაკუთრებული მისი დედა იყო - განსაკუთრებულია მისი მონოლოგიც დედის შესახებ:
„დედაჩემი ჩემი ფანატი იყო. ეს ამბავი ყველაზე მტკივნეულად დედაჩემმა მიიღო. ჩემს აღქმაში დედაჩემის ცუდად გახდომას ჩემს ამბავს ვუკავშირებ. დოპინგზე ვამბობდი, რომ უარესებიც ხდება და მთავარია, რომ გარშემო ყველა კარგად მყავდა. სამწუხაროდ, უარესიც მოხდა - დედა ამ ამბიდან მალე გარდაიცვალა. ცოტა ხნის წინ ჩემმა დამ დედაჩემის საფულე გახსნა. იქ ნახა წერილი, ზუსტად ვერ ვციტირებ სიტყვებს, მაგრამ ასეთი რამ ეწერა: ღმერთო, გთხოვ, ბუკა დააბრუნე მოედანზე, კაპიტნად. თვითონ ტკივილს ვერ გაუძლო და მაინც ჩემს კარიერაზე ფიქრობდა ბოლო მომენტამდე''.
სამწუხაროდ, მერაბს 2027 წელს ავსტრალიაში გასამართ მსოფლიო თასზე ვერ ვიხილავთ, ვერ შეძლებს დიდი სურვილის ასრულებას მაგრამ ახლა მისი ცხოვრების არანაკლებ მნიშვნელოვანი ეტაპია - გუშინ ღამით, 29 ნოემბერს მისი ტრიუმფის მომსწრე კიდევ ერთხელ გავხდით - MMA-ს ოქტაგონზე მიდი დებიუტი გამარჯვებით დასრულდა. ქართველმა პოლონელი მეტოქე, პატრიკ კონტნი მეორე რაუნდში ტექნიკური ნოკაუტით დაამარცხა.
"სალაპარაკო ბევრი დამიგროვდა, თუმცა ვეცდები, მოკლედ ვთქვა. პირველ რიგში, მადლობა ყველას, ვინც ღონისძიებაზე მობრძანდა. თქვენი მხარდაჭერა არის ფასდაუდებელი რამ, თქვენ რომ არა, მე დღეს აქ ვერ მიხილავდით. მინდა მადლობა გადავუხადო რაგბისა და MMA-ის გულშემატკივარს.
დაბოლოს, მადლობა ოჯახს, მეუღლეს – ჩემს ყველაზე დიდ გულშემატკივარს, რომელიც, სამწუხაროდ, დღევანდელ დღეს ვერ მოესწრო, დედაჩემს გაუმარჯოს. ეს გამარჯვება მას ეკუთვნოდა და მას მივუძღვენი. დე, შენ სულს ვენაცვალე და შენი სახელის ხსოვნა იყოს”.
ვინ არის მერაბ შარიქაძის მეუღლე
ბუკა შარიქაძემ საქართველოს ნაკრებში პირველად 18 წლის ასაკში ითამაშა. მილტონ ჰეიგმა მალევე შენიშნა ახალგაზრდა მორაგბეში დიდი ნიჭი, შრომისმოყვარეობა და საქმისადმი უაღრესად კეთილსინდისიერი დამოკიდებულება. ორი წლის განმავლობაში მერაბმა ეროვნულ გუნდში 19 კეპი მოიხვეჭა და 6 ლელო გაიტანა. ამათგან, ყველაზე მნიშვნელოვანი, ნოემბრის ტესტებზე სამოას ნაკრებთან გატანილი ლელოა, რომელმაც "ბორჯღალოსნებს" ისტორიული გამარჯვება მოაპოვებინა.
ბუკა შარიქაძე ქართული მედიისთვის საყვარელი და საინტერესო სტუმარია, თუმცა 32 წლის ქართველი სპორტსმენი იშვიათად საუბრობს პირად ცხოვრებაზე.
რამდენიმე წლის წინ ამბობდა, რომ შეყვარებული არაერთხელ ყოფილა, მაგრამ დაოჯახების გადაწყვეტილება არ მიუღია: „შეყვარებული ინგლისშიც მყავდა და საქართველოშიც. საფრანგეთში არ მყოლია, სიმართლე გითხრათ, ფრანგი გოგონები მაინცდამაინც არც მომწონს. არ მინდა, უცხოელი შეყვარებული მყავდეს. ქართველი გოგონები ძალიან მომწონს, მაგრამ დისტანცია შეყვარებულებს პრობლემების მეტს არაფერს მოგვიტანს“, - ამბობდა მაშინ ბუკა.
ახლა ბუკა შარიქაძე შეყვარებულია - მისი მეუღლე მშვენიერი ანანო კალაძეა. წყვილი უკვე რამდენიმე წელია, ერთადაა, სოციალურ ქსელში ერთად გადაღებულ ფოტოებსაც ხშირად აქვეყნებენ. ანანო მერაბ შარიქაძის დიდი გულშემატკივარია და მის გვერდით ნახავთ ყოველთვის - მნიშვნელოვანი თუ ნაკლებად მნიშვნელოვანი ღონისძიებების დროს.
ანანო კალაძე მერაბ შარიქაძის გვერდით იყო გუშინაც, როცა სპორტსმენი MMA-ში დებიუტისთვის, ცხოვრების ახალი ეტაპისთვის ემზადებოდა. მაშინაც, როცა ამ ემოციური წუთებისა და გამარჯვების შემდეგ მერაბი ემოციებს საყვარელ ადამიანებს უზიარებდა.