ბრიჯიტ ბარდოს გარდაცვალების მიზეზი ცნობილია: დახურული დაკრძალვა, მეუღლის სიტყვა და ერთადერთი შვილის გამომშვიდობება - Marao

ლეგენდარული ფრანგი კინოვარსკვლავი და ცხოველთა უფლებების აქტივისტი ბრიჯიტ ბარდო უკანასკნელ გზაზე გააცილეს. სან-ტროპეში გაიმართა დაკრძალვის ცერემონია, რომელსაც მისი საყვარელი პოლიტიკოსი, ულტრამემარჯვენე ლიდერი მარინ ლე პენიც ესწრებოდა.

ბარდო 28 დეკემბერს, 91 წლის ასაკში, საკუთარ სახლში - La Madrague-ის ვილაში გარდაიცვალა. დაკრძალვის ცერემონია გაიმართა Notre-Dame de l’Assomption-ის ეკლესიაში და ქალაქის მასშტაბით დიდ ეკრანებზე გადაიცემოდა.

ცერემონიამდე სიტყვით გამოვიდა ბარდოს მეუღლე, ბერნარ დორმალი, რომელმაც განაცხადა, რომ მსახიობი კიბოს შედეგად გარდაიცვალა. დაავადების კონკრეტული ფორმა არ დაუკონკრეტებია, თუმცა ჟურნალ Paris Match-თან საუბარში აღნიშნა, რომ ბარდომ „ძალიან კარგად გადაიტანა“ ორი ოპერაცია, ვიდრე დაავადებამ საბოლოოდ არ სძლია მას.

ბრიჯიტ ბარდომ საერთაშორისო აღიარება 1950-იან წლებში მოიპოვა და ფრანგული კინოს რევოლუციონერად მიიჩნევა. ფილმებმა, მათ შორის „და ღმერთმა შექმნა ქალი“, მას სექსუალური თავისუფლების სიმბოლოდ აქცია და ტრადიციული ჩარჩოები დაარღვია.

1970-იან წლებში ბარდომ მსახიობობა დატოვა და აქტიურად ჩაერთო ცხოველთა უფლებების დაცვის კამპანიებში. მოგვიანებით იგი პოლიტიკურადაც გააქტიურდა და ღიად დაუჭირა მხარი ულტრამემარჯვენე პოზიციებს, რამაც მისი ზოგიერთი გულშემატკივარი გაანაწყენა. განსაკუთრებით მწვავე რეაქციები მოჰყვა მის მკაცრ განცხადებებს იმიგრაციის საკითხზე.

ბარდო ხუთჯერ იქნა ნასამართლევი სიძულვილის ენით საუბრისთვის, განსაკუთრებით მუსლიმების მიმართ გამოთქმული განცხადებების გამო. სიცოცხლის ბოლომდე იგი კმაყოფილებას გამოთქვამდა მარინ ლე პენის პარტიის - ეროვნული გაერთიანების - მზარდი მხარდაჭერის გამო საპრეზიდენტო არჩევნების წინ.

ოთხშაბათს, როდესაც დაკრძალვის პროცესია Place des Lices-სა და სან-ტროპეს პორტს გაივლიდა, შეკრებილი ხალხისგან ტაში და შეძახილები ისმოდა. ეკლესიაში ბარდოს კუბოს შეტანისას ჟღერდა მარია კალასის სიმღერა.

ცერემონიას ესწრებოდნენ ფრანგი მომღერლები ჟან-როში და მირეი მატიო, ტელეწამყვანი კაროლინ მარჯერიდონი, ასევე კანადელ-ამერიკელი გარემოსდამცველი და ცხოველთა უფლებების აქტივისტი პოლ უოტსონი.

მარინ ლე პენი, რომელმაც ბარდო საფრანგეთის სიმბოლოს - მარიანას - თანამედროვე სახედ მოიხსენია, ცერემონიაზეც იმყოფებოდა. ორ ქალს ერთმანეთის მიმართ ურთიერთპატივისცემა აკავშირებდა - ბარდო ერთხელ ლე პენს „თანამედროვე ჟანა დარკადაც კი მოიხსენიებდა.

ცხოველთა უფლებების დაცვისთვის ბარდოს მრავალწლიანი ბრძოლა დაკრძალვის მთავარი თემაც გახდა. 

ბარდოს გარდაცვალებას თან მოჰყვა, როგორც პატივისცემის გამოხატვა, ისე კრიტიკული შეფასებები. „მწვანეების“ წარმომადგენელმა პოლიტიკოსმა სანდრინ რუსომ განაცხადა: „იყო შეძრული დელფინების ბედით, მაგრამ გულგრილი დარჩე ხმელთაშუა ზღვაში დაღუპული მიგრანტების მიმართ - ეს როგორი ცინიზმია?“