"მომწონს ჩემი თავი მაშინაც და ახლაც, მომწონს ჩემი ლამაზი და ბედნიერი ცხოვრება" - თიკა ჯამბურიას მოგზაურობა 10 წლით უკან - Marao

"2016 წელი. ადრე, უფროსები 10 წლის წინანდელ ისტორიებს რომ ჰყვებოდნენ, ძალიან მიკვირდა და მეუცნაურებოდა. მეგონა, რომ 10 წლის წინანდელ ისტორიებს თუ გავიხსენებდი, ესე იგი, ძალიან დიდი ვიყავი. თითქოს ამ მოგონებებიდან ძალიან ცოტა დრო გავიდა, მაგრამ თან იმდენი რამ მოხდა, იმდენი რამ შეიცვალა და ისე გავიზარდე...

მომწონს ჩემი თავი მაშინაც და ახლაც, მომწონს ჩემი ლამაზი და ბედნიერი ცხოვრება. მიყვარს ჩემი მეგობრები, რომლებიც სულ ჩემ გვერდით არიან. ნინა, რომელიც ძალიან გაიზარდა და უკვე დიდი გოგოა. მომწონს ის ფაქტი, რომ თმის ფერს ასე ისტერიულად აღარ ვიცვლი", - წერს თიკა ჯამბურია და ფოტოებს აქვეყნებს.

თიკა ჯამბურია  

მომღერალ თიკა ჯამბურიას ფართო საზოგადოება ჯერ კიდევ ბავშვობიდან იცნობს, როცა მის მიერ შესრულებული სიმღერა ჰიტად იქცა. მას შემდეგ თიკას კარიერისა თუ პირადი ცხოვრების მიმართ ინტერესი მუდმივად არსებობდა და თიკა პოპულარული შოუების სასურველი სტუმარია დღესაც. 

თიკა ჯამბურია 1991 წლის 14 მარტს თბილისში დაიბადა. დაამთავრა შოთა რუსთაველის სახელობის თეატრალური უნივერსიტეტი და მიიღო მუსიკალური განათლება ფორტეპიანოს განხრითაც. მისი განსაკუთრებული ვოკალური მონაცემები სულ მცირე ასაკში შენიშნეს და ლადო გუდიაშვილის 100 წლის იუბილეზე თბილისის ნაციონალური ბალეტისა და ოპერის თეატრში სიმფონიურ ორკესტრთან ერთად იმღერა. მოგვიანებით, 9 წლის ასაკში, ჩაწერა ყველასთვის კარგად ნაცნობი და საყვარელი ჰიტი "ჯეირანი", რამაც განსაკუთრებული პოპულარობა მოუტანა. ხალხმა განსაკუთრებით შეიყვარა მისი და დათო ხუჯაძის დუეტი "ცისარტყელები".  

2006 წელს გამართა სოლო-კონცერტი ფილარმონიის დიდ საკონცერტო დარბაზში თბილისის ბიგ-ბენდთან ერთად. სხვადასხვა დროს საქართველოში, რუსეთში, იტალიასა და ბულგარეთში ჩატარებულ კონკურსებში მიღებული აქვს გრან-პრი.წარმატებული კარიერის პარალელურად, საზოგადოება ახალგაზრდა ნიჭიერი და პოპულარული მომღერლის პირადი ცხოვრებითაც ინტერესდებოდა. მან ადრეულ ასაკში იქორწინა ჟურნალისტ ხათუნა ხოფერიას ვაჟზე, ბექა ხოფერიაზე. წყვილს ერთი შვილი, ნინა ხოფერია შეეძინა, თუმცა ისინი ერთმანეთს დაშორდნენ. დღეს თიკაც და ბექაც ბედნიერად აგრძელებენ ცხოვრებას, აქვთ მეგობრული ურთიერთობა და შვილის აღზრდაში ორივე ჩართულია.