ბელა ჰადიდი Dolce & Gabbana-ს წინააღმდეგ: მოდის სამყაროს ახალი „ომი“ იწყება? - Marao

მოდის სამყარო კიდევ ერთი ხმაურიანი დაპირისპირების მომსწრე გახდა. სუპერმოდელმა ბელა ჰადიდმა, რომელიც ცნობილია თავისი აქტიური სამოქალაქო პოზიციით, იტალიური მოდის სახლი Dolce & Gabbana საჯაროდ და მკაცრად გააკრიტიკა. სოციალურ ქსელში გავრცელებულმა მისმა კომენტარებმა დისკუსიის ახალი ტალღა ააგორა: არის თუ არა მოდის ინდუსტრიაში ადგილი ბრენდებისთვის, რომელთა რეპუტაციაც წლების განმავლობაში არაერთი სკანდალით შეილახა?

ბელა ჰადიდის კომენტარები

დაპირისპირება დაიწყო Instagram-ზე, მოდის კრიტიკოსის, ელიას მედინის პოსტის ქვეშ. პოსტი ეხებოდა Dolce & Gabbana-ს ბოლო ჩვენებას მილანის მოდის კვირეულზე. კრიტიკოსმა ყურადღება გაამახვილა იმაზე, რომ ბრენდმა კვლავ უგულებელყო მრავალფეროვნება (diversity) და პოდიუმზე თითქმის მხოლოდ თეთრკანიანი, სტანდარტული ფორმების მოდელები გამოიყვანა.

ბელა ჰადიდმა პოსტს ორი მწვავე კომენტარი დაუტოვა:

„შოკირებული ვარ, რომ ხალხი ამ კომპანიას კვლავ მხარს უჭერს, ეს უბრალოდ სამარცხვინოა“.

„ეს ბრენდი დიდი ხანია "გაუქმებულია"... რასიზმის, სექსიზმის, ფანატიზმისა და ქსენოფობიის წლები... როგორ გვიკვირს ეს დღემდე?“

რატომ არის ბელას რეაქცია მნიშვნელოვანი? ბელა ჰადიდი არ არის უბრალოდ მოდელი, ის ინდუსტრიის ერთ-ერთი ყველაზე გავლენიანი ფიგურაა. მისი მხრიდან ასეთი ღია თავდასხმა Dolce & Gabbana-ზე ნიშნავს, რომ „დუმილის შეთანხმება“, რომელიც ხშირად არსებობს დიდ ბრენდებსა და ტოპ-მოდელებს შორის, დაირღვა. ეს მიანიშნებს იმაზე, რომ ახალი თაობის მოდელები აღარ ერიდებიან კარიერული რისკის ფასად თავიანთი ღირებულებების დაცვას.

რატომ აქვს D&G-ს ასეთი რეპუტაცია?

ბელა ჰადიდს ფრაზა „წლების განმავლობაში დაგროვილი რასიზმი და ქსენოფობია“ ჰაერიდან არ მოუტანია. დომენიკო დოლჩესა და სტეფანო გაბანას არაერთი სკანდალური ნაბიჯი გადაუდგამთ:

• ჩინეთის ბოიკოტი (2018): ბრენდმა გამოაქვეყნა სარეკლამო რგოლები, სადაც ჩინელი მოდელი ჯოხებით იტალიურ საჭმელს უხერხულად ჭამდა. ამას მოჰყვა სტეფანო გაბანას პირადი მიმოწერის გასაჯაროება, სადაც ის ჩინეთს „ფეკალიების ქვეყნად“ მოიხსენიებდა. შედეგად, ბრენდმა ჩინეთის ბაზრის დიდი ნაწილი დაკარგა.
• ჰომოფობიური განცხადებები: მიუხედავად იმისა, რომ თავად დიზაინერები არატრადიციული ორიენტაციის არიან, მათ საჯაროდ გააკრიტიკეს გეი წყვილების მიერ ბავშვების აყვანა და ხელოვნური განაყოფიერება, რასაც „სინთეტიკური ბავშვები“ უწოდეს.
• სელენა გომესის შეურაცხყოფა: სტეფანო გაბანამ სოციალურ ქსელში სელენა გომესის ფოტოზე დაწერა: „ის ისეთი მახინჯია“ (She is so ugly).
• სექსისტური რეკლამები: ბრენდი ხშირად გამხდარა კრიტიკის ობიექტი რეკლამების გამო, რომლებიც ჯგუფური გაუპატიურების რომანტიზებას ახდენდნენ.

მიუხედავად იმისა, რომ ბელას ბევრმა დაუჭირა მხარი, ინტერნეტმომხმარებლების ნაწილმა მას „ორმაგი სტანდარტები“ შეახსენა. არქივებში იპოვეს ფოტოები, სადაც ბელა ჰადიდი თავად გამოდის Dolce & Gabbana-ს ჩვენებებზე ან აცვია მათი სამოსი წითელ ხალიჩაზე.

თუმცა, მოდელის მომხრეები ამბობენ, რომ ადამიანები იცვლებიან, იზრდებიან და მათ აქვთ უფლება, გადახედონ თავიანთ წარსულ თანამშრომლობებს და უარი თქვან მათზე, ვინც მათ ღირებულებებს აღარ შეესაბამება.

ბელა ჰადიდის ეს ნაბიჯი კიდევ ერთხელ ადასტურებს, რომ თანამედროვე მოდის ინდუსტრიაში მხოლოდ „ლამაზი კაბები“ აღარ კმარა. ბრენდებს მოეთხოვებათ ეთიკური პასუხისმგებლობა, მრავალფეროვნების პატივისცემა. Dolce & Gabbana, რომელიც წლებია ცდილობს „უარყოფის კულტურისგან“ თავის დაღწევას, კიდევ ერთხელ აღმოჩნდა კრიზისის წინაშე, ამჯერად ინდუსტრიის „ინსაიდერისგან“.