„ჩემი ცხოვრების მიზანი კარგი დედობაა“ – თამო ვაშალომიძე ემოციებზე და გეგმებზე - Marao
„ჩემი ცხოვრების მიზანი კარგი დედობაა...“ – თამო ვაშალომიძე ემოციებსა და გეგმებზე
თამო ვაშალომიძემ სოციალურ ქსელში გულწრფელი ემოციები გააზიარა და გამომწერებს საკუთარი განცდების შესახებ მოუყვა. მისი თქმით, TikTok-ზე ატვირთული ვიდეო მოგვიანებით წაშალა, რადგან ემოციებს ვერ მოერია და ვიდეოში ტიროდა.
„ვიდეო დავდე TikTok-ზე და მერე წავშალე, იმიტომ, რომ ვტიროდი. მე კი შეგპირდით, რომ აღარ ვიტირებდი, აღარ დავდებდი ისეთ ვიდეოებს, სადაც ვტიროდი. ძალიან ბევრი ვიტირე, გოგოებო, თქვენი კომენტარების გამო. იცოდეთ, რომ იმხელა ძალა ხართ ჩემს გარშემო. მადლობა ყოველი კომენტარისა და სიყვარულისთვის.
მინდა, რომ ძალიან კარგი დედა ვიყო. ჩემი ცხოვრების მიზანია, რომ კარგი დედა ვიყო, სიმშვიდეში და კარგად აღვზარდო შვილები. რომ მწერთ სოფიას დედა, მაქსიმეს დედა – ეს ჩემთვის ძალიან ემოციურია.
ასევე, ჩემი მიზანია, ჩემი კომპანია იმპერიად ვაქციო, ჩემი სიკვდილის მერე იარსებოს „თამოსკინმა“ და ვიცხოვრო სწორად. არის რთული დღეები, მაგრამ არავინ არ მაცდის, ვიყო ცუდ ხასიათზე“, – ამბობს თამო ვაშალომიძე.
თამო ვაშალომიძის ოჯახი და კარიერა
თამო ვაშალომიძის სახელი და გვარი პირველად საზოგადოებამ წლების წინ გაიგო, როცა მან ყურადღება თამამი ფოტოსესიებითა და განცხადებებით მიიპყრო. ის ფოტომოდელია და ხშირად ჩანს სხვადასხვა კამპანიაში. ამის გარდა, ის სოციალურ ქსელში თავადაც აქტიურია, აქვს "ფეისბუკის", "ინსტაგრამისა" და "ტიკ-ტოკის" საკუთარი არხები და გამომწერებს ცხოვრების საინტერესო დეტალებს ამ გზით უზიარებს.
"პირველი წარმატება იყო მაშინ, როდესაც საქართველოს სახელით კოსოვოში წავედი, 2013 წელს. საქართველოში კონკურსი "მის ბიკინი" ჩატარდა. საუკეთესო ოცეულში მოვხვდი და მერე გამოვეთიშე. ჩემმა მენეჯერმა გამიშვა კოსოვოში, იქ "მის თავისუფლება" ტარდებოდა. ჩემთვის ეს ძალიან ემოციური იყო. ვფიქრობდი, აქ არ გამიმართლა და ბედი იქ უნდა მეცადა. ამ კონკურსში "პრესის რჩეული" გავხდი. ჩემი ტიტული ლენტზე დიდი ასოებით ეწერა და რომ გადამკიდეს, ეგრე ჩამოვედი საქართველოში. უზომოდ გახარებული ვიყავი."
თამო დაქორწინებული იყო ბიზნესმენ აკა სამხარაძეზე. წყვილს ერთი საერთო შვილი, მაქსიმე ჰყავს, ხოლო თამოს პირველ ურთიერთობაში გოგონა შეეძინა.
"ახლა ჩემი მეუღლე არის ჩემი მარჯვენა ხელი, სული, გული; ადამიანი, რომელიც ყველაფერს აკეთებს ჩემი ბედნიერებისთვის. მაგრამ სანამ მას გავიცნობდი, თავად ძალიან ბევრი ვიშრომე. გულწრფელად გეტყვი, მაშინ ბევრი რამ არც ვიცოდი, როგორ გამეკეთებინა. გულუბრყვილო ვარ-მეთქი, ხომ გითხარი, ხანდახან ტელევიზიები სიუჟეტებისთვის სათავისოდ მიყენებდნენ. გამოუცდელი რომ ხარ, გგონია, ყველა კეთილია, ყველას მოსწონხარ, მერე თავს გესხმიან და ხმასაც ვერ იღებ, გეშინია არ დაგბლოკონ, არ გაგაშავონ. ეს ყველაფერი გამოვიარე. მებრძოლი რომ არ ვყოფილიყავი, დღეს ჩემი რეალობა ასეთი არ იქნებოდა", - ამბობდა თამო ერთ-ერთ ინტერვიუში.
მიუხედავად ამისა, ცოტა ხნის წინ თამო ვაშალომიძემ გაამხილა, რომ ის მეუღლეს დაშორდა. ახლა ის შვილებთან ერთად ცალკე ცხოვრობს და აგრძელებს კარიერულ წინსვლას - მან შექმნა თავის მოვლისა და კოსმეტიკური ხაზები, რომლის პოპულარიზაციისთვისაც ბოლო ორი წლის მანძილზე აქტიურად ესწრება მსოფლიო დონის ღონისძიებებს, მათ შორის, ვენეციისა და კანის კინოფესტივალებს. სულ ცოტა ხნის წინ კი ის პროფესიული განვითარების მიზნით აშშ-ში იმყოფებოდა.