მარიამ ვაშაძის ინტერვიუ: "28 წლის გავთხოვდი და 31 წლის ასაკში გავიგე, რომ დედა ვხდებოდი... დედობამდე თითქოს სხვა ცხოვრება მქონდა" - Marao
მარიამ ვაშაძის ინტერვიუ: "28 წლის გავთხოვდი და 31 წლის ასაკში გავიგე, რომ დედა ვხდებოდი... დედობამდე თითქოს სხვა ცხოვრება მქონდა"
ჟურნალისტი, ტელეწამყვანი მარიამ ვაშაძე 10 იანვარს მეორე შვილის დედა გახდა. მას და მის მეუღლეს, ვანო ბენიძეს ვაჟი შეეძინათ, რომელსაც დავითი დაარქვეს. მარიამს პირველი შვილი, ვივიენი 2022 წელს შეეძინა. ამჯერად მან ჟურნალ "თბილისელებთან" სწორედ დედობასა და ოჯახზე ისაუბრა:
„პირველი შვილი რომ გავაჩინე, მინდოდა, მას დედმამიშვილი ჰყოლოდა და ახლა პატარა ძამიკო ჰყავს, დავითი. დიდი ძმა არა, მაგრამ ჩემს გოგონას პატარა ძმა ეყოლება. არ მიფიქრია, მრავალშვილიანი დედა ვყოფილიყავი და შვიდი ან რვა ბავშვი გამეჩინა. ჯერჯერობით ორი მყავს და ვნახოთ, რა იქნება. 28 წლის გავთხოვდი და 31 წლის ასაკში გავიგე, რომ დედა ვხდებოდი. ახლა 36 წლის ვარ. ყველაზე დიდი ბედნიერებაა, როცა დედა ხდები. სხვანაირად დავიწყე ყველაფრის ყურება. დედობამდე თითქოს სხვა ცხოვრება მქონდა, ახლა კი მთლიანად შვილებით ვარ მოცული, ჩემი ცხოვრება ორად გაიყო…
ბავშვების გაზრდაში დედა და ბებია მეხმარებიან და ასევე, მეუღლეც და მისი მშობლებიც ჩართულები არიან. ვივიენს ძალიან კარგი გამზრდელი ძიძა ჰყავს…“
მარიამ ვაშაძის ოჯახი და კარიერა
მარიამ ვაშაძის მეუღლე ვანო ბენიძეა - ვანიკო ბენიძის მამა ბიზნესმენი დავით ბენიძეა. ვანიკო საზოგადოების დიდი ინტერესის ქვეშ, მისი დის ანი ბენიძის გათხოვების შემდეგ მოექცა. მისი და, კუდ-ის მაღალჩინოსნის, დათა ახალაიას მეუღლეა.
წყვილი რამდენიმე წლის წინ დაქორწინდა და ერთ საერთო შვილს ზრდის. მარიამს ოჯახურ ცხოვრებასა და დედობაზე არაერთ ინტერვიუში უსაუბრია. მარიამსა და ვანოს ულამაზესი ქორწილი ჰქონდათ, თავბრუდამხვევ ფოტოებს აქვეყნებდნენ მალდივებიდან, სადაც თაფლობის თვე გაატარეს.
როგორც მარიამი იხსენებდა, ერთმანეთი საერთო მეგობრებმა გააცნეს. ვანო საქართველოსი არ იმყოფებოდა, უცხოეთში სწავლობდა, ამიტომ ერთმანეთს ონლაინ ეკონტაქტებოდნენ. შემდეგ, მეგობრები ზაფხულში ერთად შეიკრიბნენ, სადაც ვანოც იმყოფებოდა - სწორედ აქედან დაიწყო მათი რომანტიკული ურთიერთობა.
"გამიმართლა, რომ ასეთი მეუღლე მყავს. ვანიკო მანებივრებს და ყველაფერში მიწყობს ხელს, არც სიურპრიზებს მაკლებს. მის გვერდით ყოველი დილა ბედნიერად თენდება. ზოგადად, დღის ეთერებზე ვარ, თუმცა გვიანობამდე მიწევს ხოლმე სამსახურში ყოფნა. რასაკვირველია, რთულია, სახლში დაღლილი რომ მივდივარ, მაგრამ ჩემი მეუღლეც დაკავებულია და ფაქტობრივად, ამით ვაბალანსებ სახლში არყოფნას" - ამბობდა მარიამი.
ხშირად მახარებს საჩუქრებით, არ დამავიწყდება ის დღე, როცა ხელი მთხოვა. ეს შარშან, 14 თებერვალს, სიყვარულის დღეს მოხდა. იცის, რომ არ მიყვარს სახალხოდ ხელის თხოვნები, თუმცა სხვას რომ ვუყურებ, მომწონს. მოკლედ, არ ველოდებოდი ხელის თხოვნას, უბრალოდ, საღამოს გამომიარა და ჩაიზე დამპატიჟა ერთ-ერთ მშვიდ კაფეში. მომაწოდა თაიგული, რომელზეც ბარათი იყო დამაგრებული და რომ გავხსენი ეწერა: "გამომყვები ცოლად?" და ნიშნობის ბეჭედიც მომცა. ასე რომ 14 თებერვალი ის დღეა, რომელიც არასდროს დამავიწყდება, ის მხოლოდ ვალენტინობა და სიყვარულის დღე არ არის, ვანიკომ მას ჩვენთვის სხვა დატვირთვა მისცა."