მოდელი, რომელიც ეპშტეინის იმპერიას 20 წლის წინ დაუპირისპირდა - როგორ გაწირა სისტემამ კარენ მულდერი - Marao

კარენ მულდერი 90-იანი წლების მოდის ხატება იყო. Chanel-ის გარეკანებიდან Victoria’s Secret-ის პოდიუმამდე, ის ყველგან ბრწყინავდა. თუმცა, ამ ბრწყინვალების მიღმა უმძიმესი რეალობა იმალებოდა.

ვარსკვლავური კარიერა და საბედისწერო აღსარება 

კარენ მულდერი მსოფლიოში ერთ-ერთი ყველაზე ცნობილი მოდელი იყო. ის თანამშრომლობდა ისეთ ბრენდებთან, როგორებიცაა Versace, Dior და Chanel; გახდა Victoria’s Secret-ის ერთ-ერთი პირველი „ანგელოზი“ და თავისი ეპოქის ყველაზე მაღალანაზღაურებად მოდელთა სიაში შედიოდა.

2001 წლის ოქტომბერში, მულდერი ფრანგულ თოქ-შოუში მივიდა და სამოდელო ინდუსტრიის მაღალჩინოსნები გაუპატიურებაში, ძალადობასა და ტრეფიკინგში დაადანაშაულა. მან კონკრეტული სახელები და გვარები დაასახელა. ინტერვიუ ეთერში არასოდეს გასულა. გავრცელებული ინფორმაციით, ჩანაწერი განადგურდა.

რამდენიმე საათში ის საზოგადოების თვალსაწიერიდან გააქრეს და პარიზის ფსიქიატრიულ საავადმყოფოში გადაიყვანეს, სადაც თვეების განმავლობაში იმყოფებოდა. მის ფსიქიკურ ჯანმრთელობას ეჭვქვეშ აყენებდნენ, მის სანდოობას კი მიზანმიმართულად ანგრევდნენ. მისი კარიერა დასრულდა. წლების განმავლობაში მას არასტაბილურ და არასანდო ადამიანად წარმოაჩენდნენ.

• თითქმის 20 წლის შემდეგ რუსლანა კორშუნოვას თვითმკვლელობის საქმე ისევ აქტუალურია - რისი მსხვერპლი გახდა სინამდვილეში 20 წლის მოდელი 

კაცები, რომლებსაც მან ბრალი დასდო, მუშაობას აგრძელებდნენ.

ერთ-ერთი მათგანი, ჟან-ლუკ ბრუნელი, მოგვიანებით ჯეფრი ეპშტეინის ახლო მოკავშირედ იქნა მიჩნეული. სასამართლო დოკუმენტებმა და ჩვენებებმა ბრუნელი სამოდელო სააგენტოების მეშვეობით მოქმედ საერთაშორისო ექსპლუატაციის ქსელთან დააკავშირა. არაერთმა ქალმა დაადანაშაულა ის არასრულწლოვანებზე ნადირობაში. მისი სახელი არაერთხელ ფიგურირებდა ეპშტეინის ფრენების ჟურნალებში. ის 2020 წელს საფრანგეთში დააკავეს არასრულწლოვანთა მიმართ სექსუალური დანაშაულისა და ტრეფიკინგის ბრალდებით. 2022 წელს ბრუნელი ციხის საკანში, სასამართლოს მოლოდინში, გარდაცვლილი იპოვეს.

კიდევ ერთი აღმასრულებელი პირი, რომელიც მულდერმა დაასახელა - ჟერალდ მარი, მოგვიანებით სულ მცირე 15-მა ქალმა გაუპატიურებასა და სექსუალურ ძალადობაში დაადანაშაულა. BBC-ის გამოძიებამ ისიც კი გამოავლინა, თუ როგორ ცდილობდა ის არასრულწლოვანისთვის სექსის სანაცვლოდ ფულის გადახდას. მიუხედავად ამისა, ის წლების განმავლობაში ინარჩუნებდა გავლენას მოდის ინდუსტრიაში.

კარენ მულდერი არავინ დაიცვა. ის გააჩუმეს.

ორი ათწლეულის შემდეგ, კაცები, რომელთა შესახებაც ის აფრთხილებდა სამყაროს, დააპატიმრეს, ამხილეს ან ციხის საკნებში დაიღუპნენ. სიმართლემ მისი წარსული ვერ შეცვალა, მაგრამ შეცვალა ის, თუ როგორ უნდა გვახსოვდეს მისი სიტყვები.

ის არ იყო გიჟი. მან უბრალოდ სიმართლე დროზე ადრე თქვა.

ჯეფრი ეპშტეინის საქმე

ჯეფრი ეპშტეინი იყო ამერიკელი ფინანსისტი, რომელმაც წარმოუდგენელი სიმდიდრე დააგროვა, თუმცა მისი შემოსავლების წყარო ყოველთვის ბუნდოვანი რჩებოდა. ის მეგობრობდა მსოფლიოს ყველაზე გავლენიან ადამიანებთან, პრეზიდენტებთან, სამეფო ოჯახის წევრებთან, მეცნიერებთან და ჰოლივუდის ვარსკვლავებთან.

გამოძიების მიხედვით, ეპშტეინმა შექმნა არასრულწლოვანი გოგონების ექსპლუატაციის საერთაშორისო ქსელი. ის იყენებდა თავის კერძო თვითმფრინავს (რომელსაც მედიამ „ლოლიტა ექსპრესი“ შეარქვა) გოგონების გადასაყვანად თავის რეზიდენციებში:

• ნიუ-იორკის მენსონი: ერთ-ერთი ყველაზე დიდი კერძო სახლი მანჰეტენზე.
• ლითლ სენტ ჯეიმსი: კერძო კუნძული ვირჯინიის არქიპელაგზე, რომელსაც ადგილობრივები „პედოფილების კუნძულს“ ეძახდნენ.

ამ საქმეში საკვანძო ფიგურაა ბრიტანელი მედიამაგნატის ქალიშვილი, გილიან მაქსველი. გამოძიებამ დაადგინა, რომ სწორედ ის იყო სქემის „ორგანიზატორი“ - ის ეძებდა და ამზადებდა არასრულწლოვან გოგონებს ეპშტეინისა და მისი მეგობრებისთვის. 2021 წელს მაქსველს 20 წლით თავისუფლების აღკვეთა მიესაჯა.

პირველად ეპშტეინი 2005 წელს ფლორიდაში დაადანაშაულეს, თუმცა მაშინ მან საეჭვოდ მსუბუქი სასჯელი მიიღო (ე.წ. „Sweetheart deal“). მან მხოლოდ 13 თვე გაატარა ნახევრად ღია ტიპის ციხეში, სადაც დღისით სამსახურში გასვლის უფლება ჰქონდა. ეს მიუთითებდა მის წარმოუდგენელ კავშირებზე სამართალდამცავ სტრუქტურებში.

2019 წელს ეპშტეინი ხელახლა დააკავეს ფედერალური ბრალდებით. რამდენიმე კვირაში ის ნიუ-იორკის ყველაზე დაცულ ციხეში გარდაცვლილი იპოვეს. ოფიციალური ვერსიით ეს იყო თვითმკვლელობა, თუმცა იმ ფაქტმა, რომ იმ ღამეს კამერები არ მუშაობდა და მცველებს ეძინათ, უამრავი კონსპირაციული თეორია წარმოშვა.

2024 წელს სასამართლომ დაიწყო იმ დოკუმენტების გასაჯაროება, სადაც ეპშტეინის ასობით ნაცნობია ნახსენები. მიუხედავად იმისა, რომ სიაში ყოფნა ავტომატურად დანაშაულს არ ნიშნავს, საზოგადოებისთვის ნათელი გახდა, თუ რამდენად ღრმად იყო შეღწეული ეპშტეინის ქსელი მსოფლიო ელიტაში.