"ვენაში ვცხოვრობ, თუმცა თბილისი გარეშე ცხოვრება არ შემიძლია" - ირმა გიგანი - 5 წლის ასაკიდან დაწყებული მუსიკალური ცხოვრება და საერთაშორისო აღიარება - Marao
"ვენაში ვცხოვრობ, თუმცა თბილისი გარეშე ცხოვრება არ შემიძლია" - ირმა გიგანი - 5 წლის ასაკიდან დაწყებული მუსიკალური ცხოვრება და საერთაშორისო აღიარება
მუსიკოსი ირმა გიგანი პოლიტიკოს თაკო ჩარკვიანისა და ჯონი გიგანის ოჯახში დაიბადა. მისი ბაბუა ცნობილი პოეტი ჯანსუღ ჩარკვიანია, ბიძა - მუსიკოსი მამუკა ჩარკვიანი.
„ბაბუაჩემი თავად ისე კითხულობდა ლექსებს, რომ სრულიად განსხვავებული ემოცია მოდიოდა. მას ძალიან უყვარდა ლექსი „განშორება“, რომელიც ბებიას მიუძღვნა: „შენ ნუ გგონია, რამეს ვდარდობ, რამეს მივტირი, ნურც იმას ფიქრობ, უზენაეს რამე შევუთქვი, მე მიჭირს შენთან განშორება, თორემ სიკვდილი, სიკვდილი რაა - სულის გაყრა ცოდვილ სხეულთან“. ეს ლექსი მეც ძალიან მიყვარს.
ამჟამად ვენაში ვცხოვრობ და ამ ქალაქმა, რა თქმა უნდა, ბევრი რამ მომცა, ჩემს ცხოვრებაში სულ სხვა პერიოდი დაიწყო. თუმცა, თბილისის, ჩემი ახლობელი ადამიანებისა და ოჯახის გარეშე ცხოვრება არ შემიძლია. ალბათ, იმ მუსიკოსთა კატეგორიას მივეკუთვნები, რომლებისთვისაც მუსიკის გარეშე ყოფნა წარმოუდგენელია, მაგრამ ჩემთვის ყველაფრის ღერძი მაინც ადამიანია.
მუსიკაშიც კი იმას ვაიგივებ საყვარელ ადამიანებთან და შეგრძნებებთან, რაც განსაკუთრებით მიყვარს. სწორედ ამიტომ, ხშირად ჩამოვდივარ საქართველოში, რომ ჩემი კუთვნილი „დოზა“ მივიღო - აქედან ძალიან დიდ სითბოს ვიღებ და მეც გავცემ, როგორც შემიძლია“ - ამბობს ირმა Movement.com.ge-სთან
ირმა გიგანი
ირმა გიგანი 1996 წლის 5 აპრილს, თბილისში დაიბადა. მისი მუსიკალური მოგზაურობა ადრეული ბავშვობიდან დაიწყო — 5 წლის ასაკში იგი თბილისის ზაქარია ფალიაშვილის სახელობის პირველ ცენტრალურ სამუსიკო სასწავლებელში, ე.წ. „ნიჭიერთა ათწლედში“, შევიდა პედაგოგ ფირალიშვილის კლასში. პიანისტის ნიჭი და პროფესიონალიზმი მალევე იქცა საერთაშორისო აღიარების საგნად. ჯერ კიდევ 6 წლის ასაკში, 2002 წლის 16 ივნისს, იტალიის ქალაქ მინერბიოში გამართულ შემსრულებელთა მეორე საერთაშორისო კონკურსზე, მან 8-დან 13 წლამდე კატეგორიაში გრან-პრი მოიპოვა. იმავე წლის 9 ივლისს, თბილისის მწერალთა კავშირის დარბაზში, კამერული ორკესტრის თანხლებით ბახის კონცერტი (f-moll) შეასრულა რევაზ ტაკიძის დირიჟორობით. 2002 წლის ივლისში მან მონაწილეობა მიიღო საკონცერტო მარათონში „ნიჭიერი ბავშვები“ და პირველ საერთაშორისო ფესტივალში „ხელოვნების ზეიმი“.
მუსიკოსის კარიერა აღმავალი ტემპით გაგრძელდა. 2003 წლის თებერვალში თბილისის სახელმწიფო კონსერვატორიის დიდ დარბაზში მან სოლო კონცერტი გამართა ზაალ აზმაიფარაშვილის დირიჟორობით. 2010 წელს პიანისტი ფრედერიკ შოპენის სახელობის მეორე საერთაშორისო კონკურსის პირველი პრემიის მფლობელი გახდა. ირმა გიგანის შემოქმედებითი ბიოგრაფია ასევე მოიცავს მონაწილეობას ისეთ პრესტიჟულ საერთაშორისო ფესტივალებში, როგორიცაა ედინბურგის, ტრიესტეს, ბერლინისა და კოტბუსის კინოფესტივალები. დღეისათვის პიანისტი ვენაში ცხოვრობს, სადაც აგრძელებს თავის აქტიურ მუსიკალურ კარიერას, თუმცა მუდმივ შემოქმედებით კავშირს ინარჩუნებს მშობლიურ თბილისთან.