"საქართველო ძალიან მიყვარს, ერთხელ მკითხეს, ქართველი ხარ თუ ჰოლანდიელიო" - ედუარდ სააკაშვილის ცხოვრების უცნობი მხარე - ოჯახი, ბავშვობა, ურთიერთობები - Marao
"საქართველო ძალიან მიყვარს, ერთხელ მკითხეს, ქართველი ხარ თუ ჰოლანდიელიო" - ედუარდ სააკაშვილის ცხოვრების უცნობი მხარე - ოჯახი, ბავშვობა, ურთიერთობები
საქართველოს მესამე პრეზიდენტის, მიხეილ სააკაშვილისა და სანდრა რულოვსის უფროსი ვაჟი, ედუარდ სააკაშვილი, საზოგადოების ყურადღების ცენტრში ჯერ კიდევ 15 წლის ასაკში მოექცა, როდესაც გინესის რეკორდსმენთა სიაში შევიდა. დღეს იგი ნიდერლანდებში ცხოვრობს, თუმცა საკუთარ ბავშვობასა და იდენტობაზე გოგი გვახარიას რუბრიკაში „შვილები“ გულწრფელად ისაუბრა.
„შეიძლება ვთქვათ, რომ სანდრა ტიპური ნიდერლანდელი ქალია, მაგრამ მე, რეალურად, არც ვიცი, როგორები არიან ისინი, რადგან მე მხოლოდ სანდრა ვიცი. ამ ქვეყანაში ბევრს არ ვიცნობ. ბავშვობის გამო მაქვს მშობლიური გრძნობები, ენაც ძალიან კარგად ვიცი - მე და ნიკუშა დღესაც ჰოლანდიურად ვსაუბრობთ ერთმანეთში. საქართველო ძალიან მიყვარს, ერთხელ მკითხეს, ქართველი ხარ თუ ჰოლანდიელიო და მეც დაუფიქრებლად ვუპასუხე, რომ ქართველი ვარ-მეთქი. ჰოლანდიურ პოლიტიკაში რა ხდება, აზრზე არ ვარ.
ბაღში ჩემი ერთ-ერთი საუკეთესო მეგობარი იყო ჩხარტიშვილის [ვანო ჩხარტიშვილი] შვილი. მიშას არ სიამოვნებდა, მაგრამ სანდრას პირიქით, ძალიან კმაყოფილიც იყო ამ ფაქტით. მიშასთვის, რადგანაც პოლიტიკაშია, ეს არის სამკვდრო-სასიცოცხლო ომი. ამიტომ მისთვის უფრო რთულია, რატომ შეუძლია მის შვილს ეს გვერდზე გადადოს ან არც კი იფიქროს ამ საკითხზე.
უცნაური რაღაცები ხდებოდა. მეშვიდე კლასში ვიყავი, კედელზე ხუთჯვრიანი დროშა ეკიდა და ერთმა კლასელმა ჩამოხია, ეს ნაცების დროშააო. ამას ვიტანდი, ერთხელ ავტირდი კიდეც, მაგრამ არ შევედი კამათში“, - ამბობს ედუარდ სააკაშვილი.
ედუარდ სააკაშვილი
ედუარდ სააკაშვილი საქართველოს მესამე პრეზიდენტის მიხეილ სააკაშვილის ვაჟია. მან 15 წლის ასაკში დაამყარა გინესის რეკორდი I-pad-ზე ინგლისურის ანბანის სწრაფად აკრეფაში. მას ანბანის სრულად ასაკრეფად 5,26 წამი დასჭირდა. ედუარდმა 2017 წელს დაამთავრა ამერიკაში სუორტ-მორის კოლეჯი. ის 380 კურსდამთავრებულს შორის საუკეთესო შვიდეულში მოხვდა.
ედუარდი BBC-ის National Public Radio-სთან თანამშრომლობდა. სამაგისტრო პროგრამაზე ედუარდი ნიდერლანდში, ქალაქ უტრეხტის უნივერსიტეტში სწავლობდა. მისი სამაგისტრო თემა ხელოვნურ ინტელექტს ეხებოდა.
"ედუჩა ყოველთვის ორიენტირებული იყო წარმატებაზე.
საშუალო სკოლაში, თვითონ, სანდრას და ჩემი ცოდნის გარეშე, მიმართა გინესის რეკორდების ორგანიზაციას. უცხოეთიდან ჩამოვიდა კომისია, რომელმაც დაარეგისტრირა მის მიერ ბათუმში მსოფლიო რეკორდის დამყარება IPAD-ზე ყველაზე სწრაფად ბეჭდვაში.
მაშინ TIME-ის პირველ გვერდზე გამოქვეყნდა მოკლე შეტყობინება "საქართველოს პრეზიდენტის, მიხეილ სააკაშვილის ვაჟმა დაამყარა ახალი მსოფლიო რეკორდი".
ამ მსოფლიოში ყველაზე პოპულარულმა ჟურნალმა მისი სახელიც კი არ ახსენა, რამაც ედუარდი ძალიან გაანაწყენა. ის ყოველთვის ცდილობდა, რომ ჩემგან დამოუკიდებლად მიეღწია ყველაფრისთვის.
ჩემი შვილობა არასდროს არ იყო ადვილი, სკოლის წლებში ბევრი თანატოლისგან, რომლებიც საკუთარი ოჯახების ქოცური იდეოლოგიის გავლენის ქვეშ იმყოფებოდნენ, ბევრი წამოძახება აიტანა. თუმცა, საბოლოოდ, მიუხედავად ყველაფრისა, სკოლის საუკეთესო კურსდამთავრებულად აღიარეს.
შემდეგ წარჩინებით დაამთავრა კოლეჯი ამერიკაში, სადაც შეხვდა თავის უმაგრეს მეუღლეს ადინას, დაიცვა დისერტაცია ნიდერლანდებში და ახლა ძალიან წარმატებულია ხელოვნური ინტელექტის, ჩემი აზრით, ყველაზე საინტერესო მეცნიერებაში. არ სწყდება საქართველოს, online ლექციებს უტარებს აქ სტუდენტებს, თავისივე შექმნილი კურსით.
მე ვამაყობ ედუარდით! ის გაიზარდა საქართველოს პატრიოტად, უკიდურესად წესიერ, მოკრძალებულ და წარმატებულ ადამიანად!" - წერდა მიხეილ სააკაშვილი.