"ბედნიერი ვარ, როცა ჩემს ორ ქალიშვილთან ერთად ვარ, ჩემს ორ ფრთასთან..." - მონიკა ბელუჩის უახლესი ინტერვიუ - Marao
"ბედნიერი ვარ, როცა ჩემს ორ ქალიშვილთან ერთად ვარ, ჩემს ორ ფრთასთან..." - მონიკა ბელუჩის უახლესი ინტერვიუ
ცოტა ხნის წინ 61 წლის მონიკა ბელუჩის ფოტოები სოციალურ ქსელში ვირუსულად გავრცელდა - მის დახვეწილობას, ბრწყინვალებას, გრაციოზულობასა და სილამაზეს წლები მეტს ელფერს სძენს. Harper's BAZAAR -ისთვის მონიკა ფოტოგრაფმა შონ ჯეიმს კოქსმა გადაიღო, ინტერვიუ კი ელლა ალექსანდერმა მოამზადა.
მონიკა ბელუჩის გლამური მართლაც ესმის. ეს არის სახე, რომელიც დაიბადა მისი იტალიური მემკვიდრეობითა და მოდისა და კინოს ურთიერთგადახლართულ სამყაროებთან ღრმა კავშირით. სტილი, რომელსაც ის ოცი წლის ასაკიდან მიჰყვება: ელეგანტური პატარა შავი კაბები, რომლებიც მის სხეულს იდეალურად ეკვრის, შესანიშნავი ქუსლიანი ფეხსაცმელი და ჩამოშლილი შავი თმა. ბელუჩი რომ არ არსებულიყო, ფელინი მას გამოიგონებდა.
ბელუჩიმ ყოველთვის იცოდა, ვინ იყო. მას ვერ ნახავთ გადამეტებული პროპორციებით ან ამ სეზონის პოპულარული კედებით. მისი ესთეტიკა დროთა განმავლობაში არ იცვლება. ეს არის სუფთა La Dolce Vita (ტკბილი ცხოვრება), პიროვნებისა და გემოვნების გამოხატულება, ფორმისა და ხარისხის დაფასება.
Harper's BAZAAR მას ესაუბრა, რათა გაეგო, როგორ შექმნა თავისი საფირმო იერსახე, რას ნიშნავს გლამური დღეს და როგორ შეცვალა მისმა იტალიურმა მემკვიდრეობამ სამყაროსადმი ხედვა.
როგორი მოდა გაგრძნობინებთ თავს ყველაზე თავდაჯერებულად?
„მე მომწონს მარტივი ხაზები, რადგან ფორმები მაქვს და უპირატესობას, ჩვეულებრივ, შავს ვანიჭებ. მაგრამ ასევე მიყვარს ხანდახან წითელი, ხანდახან თეთრი და ხანდახან კიდევ უფრო დახვეწილი დეტალები. გააჩნია, მაგრამ უმეტესად მარტივი სილუეტები მირჩევნია. ჩემი ტიპის სხეულისთვის უბრალოება უკეთესია“.
როგორია თქვენი იდეალური სამზადისი?
„მომწონს პირადი სივრცე და საკმარისი დრო, რომ არ ვიჩქარო. ასევე მომწონს მუშაობა ადამიანებთან, რომლებთანაც თავს კომფორტულად ვგრძნობ, ჩემს საყვარელ მაკიაჟის სპეციალისტთან და სტილისტთან, როცა ეს შესაძლებელია. ასევე მომწონს, რომ მაქვს გარკვეული დრო მოსამზადებლად, რადგან, მიუხედავად იმისა, რომ ამას დიდი ხანია ვაკეთებ, წითელ ხალიჩაზე ყოფნა ჩემთვის ყოველთვის ერთგვარი წნეხია. როცა ფილმს იღებ, რაღაცნაირად დაცული ხარ. წითელ ხალიჩაზე ყოფნა სხვაა. როცა უშუალოდ საზოგადოების წინაშე ხარ, ეს ყოველთვის იწვევს ემოციას. ყვირილი, ყველას უნდა შენთის ფოტოს გადაღება, მე ეს მესმის, მაგრამ მჭირდება რამდენიმე წამი სიმშვიდე მანამდე, რათა მოვემზადო ამ ყველაფრისთვის. როცა თეატრში ვთამაშობ, იმავეს ვგრძნობ. შენ გასცემ და იღებ ენერგიას; ეს ძლიერი მომენტია და უნდა გაუმკლავდე ამას“.
არის ვინმე, ვისი სტილითაც ყოველთვის აღფრთოვანებული იყავით?
„არსებობს ამდენი ქალი საოცარი და უნიკალური სტილით, და ისინი დიდებულები არიან თავიანთ განსხვავებულობით. ვფიქრობ ვივიენ ვესტვუდზე და აირის აპფელზე. მე აღფრთოვანებული ვარ ადამიანებით, რომლებსაც აქვთ ამგვარი კრეატიულობა, პიროვნება და ფანტაზია. ეს ქალები ნამდვილად თავისუფლების სიმბოლოები არიან“.
როგორ აისახა თქვენი იტალიური მემკვიდრეობა იმაზე, თუ როგორ იცვამთ, აისახა თუ არა საერთოდ?
„ღმერთო ჩემო, ვფიქრობ, მე უბრალოდ ჩემი ქვეყნის პროდუქტი ვარ, ისევე როგორც პასტა პომიდვრით. ჩემი მუქი თმა, მუქი თვალები და მაღალი ქუსლები... ბევრს ვფიქრობ ჩემს კულტურაზე და ასევე იტალიური კინოს წამყვან ქალბატონებზე, რომლებიც დღესაც შთამაგონებენ, როგორებიც არიან, მონიკა ვიტი, ანა მანიანი, სოფი ლორენი და ჯულიეტა მაზინა.
რა თქმა უნდა, ასევე შეხება მქონდა ფრანგულ და ამერიკულ კინოსთან, მაგრამ მე იტალიიდან ვარ, ამიტომ გავიზარდე ასეთი მაგალითებით. დღეს ვცხოვრობ პარიზსა და რომს შორის. პარიზის გარეშე სიცოცხლე არ შემეძლო; ის ნამდვილად ერთ-ერთი ულამაზესი ქალაქია მსოფლიოში, მაგრამ ასევე რომი ჩემს გულშია. იქ სხვაგვარი შუქია“.
როგორ დაახასიათებდით იტალიურ სტილს დღეს?
„იტალიაში ქალურობის სხვადასხვა ფორმა არსებობს. თუ ფიქრობთ ანა მანიანზე, ან სოფი ლორენზე, ან ჯულიეტა მაზინაზე… ყველა ეს ქალი წარმოადგენს ქალურობის განსხვავებულ სახეს და თითოეული ვერსია ლამაზია. როგორც ადრე ვთქვით, ეს პიროვნებაზეა დამოკიდებული. ეს არის რაღაც, რაც შიგნიდან მოდის“.
რას ნიშნავს გლამური თქვენთვის?
„ჩემთვის გლამური არის ემოციით თამაში და კაცობრიობის ხელოვნების ფორმად გარდაქმნა. ვფიქრობ იმაზე, თუ როგორ ისვამდა ბებიაჩემი წითელ ტუჩსაცხს 80 წლის ასაკში, სანამ გარეთ გავიდოდა. ეს არის გლამური - მარტივი მომენტი, მაგრამ ასევე თამაშის უნარი და ფანტაზიის ფორმა. ეს შეიძლება იყოს მცირე ჟესტი“.
რა არის თქვენი სტილის აუცილებელი ნივთები? რომელი გარდერობის ნივთების გარეშე ვერ იცხოვრებდით?
„პატარა შავი კაბა და ასევე მამაკაცის კოსტიუმები. ისინი მარტივი და ყოველდღიურია, მაგრამ ამავე დროს გლამურული. და, რა თქმა უნდა, მაღალი ქუსლები წითელი ხალიჩისთვის“.
როდის გრძნობთ თავს ყველაზე ლამაზად?
"როცა ბედნიერი ვარ, ანუ როცა ჩემს ორ ქალიშვილთან ერთად ვარ, ჩემს ორ ფრთასთან ერთად - ბედნიერი და საკუთარ თავთან ბალანსში".
