დღეს მცირეწლოვანი ბავშვები ხშირად ჯერ ეკრანზე თითის გასმას სწავლობენ და შემდეგ ფანქრის დაჭერას. ეს თანამედროვე ცხოვრების სტილმა მოიტანა, თუმცა არ უნდა დაგვავიწყდეს, რომ ბავშვის სრულფასოვანი განვითარებისთვის მხოლოდ ტექნიკური უნარების დაუფლება საკმარისი არ არის. პედიატრები გვირჩევენ, რომ რაც შეიძლება ადრეული ასაკიდან მივაქციოთ ყურადღება მოტორიკის განვითარებას, რადგან წვრილი მოტორიკა მხოლოდ თითების მოძრაობა არ არის, ის პირდაპირ კავშირშია გონებრივ განვითარებასთან.
ნეირონული კავშირები თითის წვერებზე
ხელით მუშაობა ბავშვის განვითარებაზე პირდაპირ აისახება. დადასტურებულია, რომ წვრილ მოტორიკასა და მეტყველების, მეხსიერებისა და ლოგიკური აზროვნების ცენტრებს შორის მჭიდრო კავშირი არსებობს.
როდესაც ბავშვი ხელით მუშაობს, აქტიურდება ტვინის ორივე ნახევარსფერო:
- მარცხენა: პასუხისმგებელია დეტალებზე, ლოგიკასა და თანმიმდევრობაზე.
- მარჯვენა: პასუხისმგებელია მთლიან აღქმასა და კრეატიულობაზე.
ამავდროულად, ვითარდება ნეიროპლასტიურობა. ფიზიკური წინააღმდეგობა, რომელსაც ხელსაქმის მასალა (მაგალითად, პლასტილინი ან თექა) უწევს თითებს, ტვინს აიძულებს უფრო ინტენსიურად იმუშაოს, ვიდრე ეკრანზე მარტივი შეხებისას.
პრობლემებთან გამკლავების უნარი და კრიტიკული აზროვნება
ციფრულ სამყაროში შეცდომის გამოსწორება მარტივად - „Undo“ ან „Back“ ღილაკით ხდება. რეალურ სამყაროში ყველაფერი ასე მარტივად არ არის. მაგალითად, თუ ყვავილის გამოჭრისას ბავშვმა ქაღალდი არასწორად გაჭრა, მას მოუწევს გამოსავალი მოიფიქროს და ეს შეცდომა ახალ შემოქმედებით გადაწყვეტად აქციოს. სწორედ ეს არის პრობლემების დამოუკიდებლად მოგვარების უნარის გამომუშავების საბაზისო ეტაპი. ხელით მუშაობა ბავშვს ასწავლის, რომ მასალას აქვს თავისი ხასიათი, წონა და ტექსტურა, რასაც ვერცერთი ეკრანი ვერ შეცვლის.
ყურადღების კონცენტრაცია
თანამედროვე ყოველდღიურობაში, სადაც ეკრანი ტვინის სწრაფ სტიმულაციას იწვევს, ბავშვებს სულ უფრო უჭირთ ყურადღების ერთ საქმეზე დიდხანს შეჩერება. ხელსაქმე კი დიდ კონცენტრაციასა და დროს მოითხოვს. ფერადი ფურცლებით მუშაობა, ძერწვა თუ ქსოვა ბავშვს ასწავლის მოთმინებას და აცნობიერებინებს, რომ ხარისხიან შედეგს შრომა სჭირდება.
სტრესის შემცირება
ეკრანის ხშირი გამოყენება ტვინის ზედმეტ სტიმულაციასა და ბავშვის აგზნებადობას იწვევს. ამის საპირისპიროდ, ხელით მუშაობა ერთგვარ მედიტაციას ჰგავს - ის ამცირებს შფოთვას, რომელიც გამოწვეულია ინფორმაციული გადატვირთვითა და სწრაფად ცვალებადი კადრებით.
ეს ყველაფერი არ ნიშნავს, რომ ტექნოლოგიებზე სრულად უარი უნდა თქვათ. უბრალოდ, კრიტიკულად მნიშვნელოვანია ზომიერების დაცვა. შესთავაზეთ ბავშვს ხელსაქმე და დააინტერესეთ იგი „კრაფტით“ პატარაობიდანვე.
ხელსაქმისთვის საჭირო მრავალფეროვან პროდუქციას კი „ბიბლუსის“ მაღაზიებში შეიძენთ. კანდელაკის 7 ნომერში მდებარე ფილიალში თქვენ დაგხვდებათ „არტი და კრაფტის“ სრული კოლექცია, სადაც ნებისმიერი გემოვნების შესაბამის ნივთს შეარჩევთ.
R