ყველა ჩვენგანისთვის ცნობილია, რომ ბევრი რამ, რასაც ყოველდღიურად მივირთმევთ, მავნებელია როგორც ჯანმრთელობისთვის, ასევე აღნაგობისთვის. ამიტომაც შეეცადე მოძებნო მავნებელი პროდუქტების ალტერნატივა.
განსაკუთრებით მაშინ, თუ მტკიცედ გადაწყვიტე წონაში დაკლება და ამასთან, დიეტის დაცვა და სპორტარბაზში გამთანგავი ვარჯიშები გეზარება.
პირველ ეტაპზე დაიწყე დღის რაციონში კალორიების ნელ-ნელა შეზღუდვა. უარი თქვი საკვებ "მძიმეწონოსნებზე" და მიეჩვიე ნაკლებცხიმიან კვებას. მთავარი ხომ რაოდენობა კი არა, ცხიმის ხარისხია. გაითვალისწინე, რომ ზოგიერთი პროდუქტი ფარულ ცხიმებს შეიცავს. მაგალითად, ის ბევრია ძეხვეულში, ნახევარფაბრიკატებში, ბულიონებში, სუბპროდუქტებში – შეეცადე, მოერიდო ასეთ საკვებს.
460 კკლ – 260 კკალ: თუ დილით ფუნთუშის ნაცვლად ხორბლის პურს მიირთმევ თაფლით, ჩათვალე, რომ მთელი დღე მხნედ იგრძნობ თავს და ნაკლებ კალორიასაც მიიღებ.
150 კკალ – 50 კკალ: ნუ შეიძენ იოგურტს სხვადასხვა დანამატითა და დიდი ხნის შენახვის ვადით. ის ნაკლებსასარგებლოა, ვიდრე მალფუჭებადი, ცოცხალი იოგურტი.
773 კკალ – 81 კკალ: კარაქი (75%-ზე მეტი ცხიმიანობით) სისხლში ქოლესტერინის დონეს მაღლა სწევს. უმჯობესია, თუ მის მაგივრად პურზე უცხიმო ხაჭოს წაისვამ.
სადილის მიმართ ალტერნატიული მიდგომა:
440 კკალ – 270 კკალ: თუ ჰოთ-დოგებით იკვებები, მალე გასუქდები. მაგრამ მაინც, თუ არ შეგიძლია ფასტ-ფუდის გარეშე, აჯობებს, მიირთვა ბურგერი ქათმის კატლეტითა და ბოსტნეულით.
165 კკალ – 35 კკალ: უმაღლესი ხარისხის ხორბლის ფქვილისგან დამზადებული სპაგეტის ერთი პორცია ვახშმამდე ენერგიით აგავსებს, მაგრამ მაიონეზის ნაცვლად მას ტომატის სოუსი მოასხი.
314 კკალ – 117 კკალ: ტრანსცხიმები, რომლებსაც ფრი შეიცავს, ძალიან მავნებელია ორგანიზმისთვის. ბევრად უვნებელი და დაბალკალორიულია სახლში, ტაფაზე შემწვარი კარტოფილი.
347 კკალ – 225 კკალ: როცა არჩევანის წინაშე დადგები, უპირატესობა მიანიჭე პიცას უცხიმო ლორითა და ტომატით და არა სუპერკალორიული სალიამით.
104 კკალ – 56 კკალ: ტომატის სუპი გასპაჩო ბოსტნეულითა და მწვანილით შენს წონაზე არანაირად არ აისახება, რასაც ვერ ვიტყვით ყველის კრემ-სუპზე.
ვახშამი: გააკეთე სწორი არჩევანი
328 კკალ –240 კკალ: ლივერული ძეხვის ჯანმრთელი და ნაკლებკალორიული ალტერნატივაა საექიმო. აირჩიე სანდო საწარმოს მიერ გამოშვებული.
337 კკალ – 155 კკალ:
შენს წონაზე არანაირ კვალს არ დატოვებს მსუბუქი კოქტეილი-სალათა ზღვის პროდუქტებით, რასაც ვერ ვიტყვით ხორცის შემცველ სალათაზე. თუნდაც შენი არჩევანი მაიონეზით შეკაზმო, ის მაინც ბევრად ნაკლებკალორიული იქნება.
350 კკალ – 197 კკალ:
უარს ვერ ამბობ ყველზე? საფრანგეთში, ყველის სამშობლოში, მას სადილის წინ ან მას შემდეგ მიირთმევენ, ან დესერტის ნაცვლად. თუ უარს ვერ ამბობ ამ პროდუქტზე, თავს უფლება მიეცი, ტრაპეზის ბოლოს მიირთვა ყველის პატარა ნაჭერი.
360 კკალ – 108 კკალ: მშრალად გამოყვანილი მაღალკალორიული ძეხვი მადას მატებს. თუ მაინცდამაინც ვერ ამბობ უარს ამ პროდუქტზე, არჩევანი ინდაურის ფილეზე გააკეთე. შებოლილი სახითაც ის ბევრად ნაკლებკალორიულია.
წახემსება:
538 კკალ – 357 კკალ: ჩიფსებში არაფერია სასარგებლო, ის ცარიელი კალორიებია! ჩახრამუნებით კი მარილიან ჩხირებსაც ჩაახრამუნებ. აქ 100 გრ-ში მხოლოდ 0,5 გრ ცხიმია, როცა ამ რაოდენობის ჩიფსებში – 25 გრ-ია.
128 კკალ – 71 კკალ: ტკბილეულით ირთობ თავს ჭამიდან ჭამამდე? არ არის პრობლემა, ოღონდ შოკოლადის ნაცვლად მიირთვი მარმელადი ან ჟელე.
ჟურნალი "და ქალი"
(გამოდის თვის დასაწყისში)