ტკივილი და განწყობის ცვალებადობა, გაუარესება მენსტრუაციის თანმდევია. ეს, პირველ რიგში, ვიტამინების ნაკლებობის გამო ხდება. გაიგე, რომელი ვიტამინი აკლია შენს ორგანიზმს და გამოისწორე მდგომარეობა.
E ვიტამინის დეფიციტის დროს - E ვიტამინი ქსოვილის აღდგენას უწყობს ხელს. იგი თმის, კანისა და ფრჩხილების მთავარი აღმდგენი კომპონენტია. არ გამორიცხო რაციონიდან ზეთი. პირიქით, გაამდიდრე იგი მზესუმზირის, სიმინდის, ზეითუნის ზეთებით. აგრეთვე, ხშირ-ხშირად მიირთვი ნიგოზი, თევზი, ზღვის პროდუქტები, მზესუმზირა, ქუნჟუთისა და გოგრის თესლები.
რკინის დეფიციტი - რკინა დიდი რაოდენობითაა ხბოს ღვიძლში, ბანანში, ხიზილალასა და წითელ თევზში. რკინით მდიდარია: წიწიბურა, ვაშლი, შავქლიავი, კურაგა, ქიშმიში, ბროწეულის წვენი. აქვე ერთ საიდუმლოსაც გაგიმხელთ: რკინის შემცველი პროდუქტები არ მიირთვათ რძის პროდუქტებთან ერთად, ორგანიზმი მათ ვერ აითვისებს. რკინის შემცველი პროდუქტების ჭამიდან, რძის პროდუქტების მიღებამდე, შუალედი 2 საათი მაინც უნდა იყოს.
მაგნიუმის დეფიციტი - თუ ტკბილის მოთხოვნილება გაქვს გაძლიერებული, ორგანიზმი მაგნიუმის ნაკლებობას განიცდის. დღე წიწიბურის ფაფით დაიწყე, დღის განმავლობაში კი ბანანი მიირთვი.
კალციუმის დეფიციტი - თუ თმა მტვრევადი, "უსიცოცხლო" გაგიხდა, ხოლო ფრჩხილები "გეფრცქვნება", ეს კალციუმის ნაკლებობაზე მიუთითებს. რაციონი რძითა და რძის პროდუქტებით უნდა გაამდიდრო, მაგრამ გახსოვდეს, რომ დღის განმავლობაში ორგანიზმი რძის პროდუქტებს ცუდად ითვისებს. ისინი 18-23 საათის შუალედში უნდა მიირთვა. კალციუმს აგრეთვე შეიცავს: კვერცხი, ხაჭო და სოიო.
დაბოლოს, კიდევ რამდენიმე რჩევა, რაც ციკლის დროსა და მისი დასრულების შემდეგ უნდა გაითვალისწინო:
1. ციკლამდე 1 კვირით ადრე გაამდიდრე რაციონი უჯრედისით სავსე პროდუქტებით - კომბოსტო, ვაშლი, წიწიბურა, სოიის მარცვლეული, - რასაც ორგანიზმიდან ზედმეტი სითხე გამოაქვს და გასუქების საშუალებას არ მოგცემს.
2. გააქტიურდი. სასურველია სირბილი. სირბილი ჟიზელ ბიუნდჰენის საყვარელი საქმიანობაა და მისი შემხედვარე, მის გემოვნებას შენც შეგიძლია ენდო.
3. ნუ დალევ წყალს სადილობიდან ერთი საათის განმავლობაში. ასე თავიდან აიცილებ კუჭის გაზრდას, რაც უფრო ადვილად დანაყრების შეგრძნებას გაგიჩენს და რამდენიმე დღეში ულუფის რაოდენობასაც შეამცირებ.
4. მენსტრუაციის პირველ დღეებში ბევრი ტკბილს ეტანება, განსაკუთრებით, შოკოლადს, მაგრამ თუ გასუქების შიშით შოკოლადზე უარს ამბობ, გახსოვდეს, რომ მასში შემავალ ბედნიერების ჰორმონს - სეროტონინს სიმინდიც შეიცავს, ბანანიც და პომიდორიც.