კოჟრი, ანუ "მაზოლი" - გაუხეშებული კანი - ძირითადად, ხელებსა და ფეხებზე ჩნდება.
ფეხებზე მოუხერხებელი ფეხსაცმლის გამო; ხელებზე - მძიმე სამუშაოს შესრულების შემდეგ.
გთავაზობთ მარტივ რჩევებს, თუ როგორ გათავისუფლდეთ კოჟრებისგან.
პირველი რეცეპტი: საპნიან-სოდიანი აბაზანები - 36-40-გრადუსიან წყალში, დაახლოებით ერთ ლიტრში შეურიეთ 1 ჩაის კოვზი სოდა. გაისაპნეთ ფეხები და ჩაყავით სოდიან წყალში 15-20 წუთის განმავლობაში.
შემდეგ გაუხეშებული კანი პემზით ან სპეციალური ჯაგრისით გაიხეხეთ. გადაივლეთ თბილი წყალი, შეიმშრალეთ და მკვებავი კრემი წაისვით. ასეთი აბაზანები კვირაში რამდენჯერმე, კოჟრების სამუდამოდ გაქრობამდე გაიკეთეთ.
მეორე რეცეპტი: ნივრიან-ძმრიანი - 3 კბილ ნიორს დაასხით 3-4 ჭიქა ღვინის ძმარი. გააჩერეთ 2 კვირა. შემდეგ გადაწურეთ, დაასველეთ მასში ბამბის ქსოვილი და დაიფინეთ კოჟრიან ადგილას. ზემოდან წინდა ჩაიცვით და გაიჩერეთ მთელი ღამე.
მესამე რეცეპტი: ნივრის საფენი - გახეხეთ ნიორი. დაირბილეთ კოჟრი სოდიან წყალში და დაიფინეთ გახეხილი ნივრის წვენში დასველებული მარლა. პროცედურა ღამით, ძილის წინ უნდა გაიკეთოთ. გაიმეორეთ კოჟრის მოცილებამდე.
მეოთხე რეცეპტი: პროპოლისის სიკეთე - კოჟრის მოსაშორებელ საუკეთესო საშუალებად პროპოლისი ითვლება. დაიდეთ პროპოლისის ნაჭერი კოჟრზე და დაიკარით პლასტირი. რამდენიმე დღეში კოჟრი უნდა გაგიქრეთ.
მეხუთე რეცეპტი: მარილიანი აბაზანები - კოჟრის მოცილება მარილის ცივ აბაზანებსაც შეუძლია. ამისათვის 1 სადილის კოვზ მარილს დაასხით 1 ლიტრი ცივი წყალი. ჩააწყვეთ მასში ფეხები და 20-25 წუთი დაელოდეთ. მსუბუქი წვა უნდა იგრძნოთ. პროცედურის შემდეგ გაიარეთ მიწაზე ან ცხელ ქვიშაზე. ასეთი აბაზანები დაღლილობასაც მოგიხსნით და სასარგებლოა ბრონქებისა და გულისთვის.
მეექვსე რეცეპტი: ნივრიანი - გახეხილი ნიორი კარაქს გადაურიეთ. ფაფისებური მასა უნდა მიიღოთ. წაისვით დამბალ კოჟრზე, ზედ დაიფინეთ მრავალძარღვას ფოთოლი და შეიხვიეთ. გაიკეთეთ 2-3 ასეთი პროცედურა და კოჟრიც მოგცილდებათ.
მეშვიდე რეცეპტი: ხახვის ფურცლებიანი - ხახვის ფურცლები მოათავსეთ ქილაში და დაასხით ძმარი (უნდა დაფაროს). გააჩერეთ 2 კვირა. ღამით, ძილის წინ ძმრით გაჟღენთილი ხახვის 2-3 ფურცელი კოჟრზე დაიდეთ, გარშემო კი ვაზელინი ან ცხიმიანი კრემი წაისვით. დილით კოჟრის მოცილებას გაფხეკვითაც შეძლებთ.
მერვე რეცეპტი: პომიდვრიანი - დაიმუშავეთ კოჟრი ცოცხალი პომიდვრით ან პომიდვრის პასტით.