მაწონი ქართული ნაციონალური რძემჟავა პროდუქტია. დღეს საქართველოს ბაზარზე არსებული მაწონი მთლიანად საქართველოშია დამზადებული.
პროდუქტი სწრაფად (1-2 კვირაში) იყიდება, ამიტომ ქარხნული წარმოების მაწვნებსაც კი პასტერიზაციას არ უკეთებენ. შესაბამისად, მაწონი "ცოცხალი" რძემჟავა პროდუქტია - შემადედებელი ბაქტერიები მასში ცოცხალია და ის ჯანმრთელობისთვის განსაკუთრებით სასარგებლოა.
ბაზარზე იყიდება როგორც ქარხნული, ასევე კუსტარული წესით დამზადებული მაწონი. რომელი ჯობია? ძნელი სათქმელია. ქარხნული მაწონი სუფთა კულტურით და შესაბამის ჰიგიენურ პირობებშია დამზადებული. ამდენად, უფრო უვნებელია.
რა თქმა უნდა, ქარხნული მაწვნის ძირითადი მასა არა ნატურალური რძისგან, არამედ რძის ფხვნილისგან მზადდება. კანონის მიხედვით, ასეთ შემთხვევაში პროდუქტის ეტიკეტზე უნდა იყოს წარწერა "დამზადებულია რძის ფხვნილის გამოყენებით".
სხვათა შორის, არ არის გამორიცხული, რძის ფხვნილი მაწვნის კუსტარულად დამზადების დროსაც იყოს გამოყენებული. ამავე დროს, თუ კუსტარულად დამზადებულ მაწონს ყიდულობთ, გაითვალისწინეთ: შესაძლოა, მისი დამზადებისას ჰიგიენური მოთხოვნები დაცული არ იყოს.
ამიტომ გირჩევთ, სოფლის მაწონი მხოლოდ იმ შემთხვევაში შეიძინოთ, თუ დარწმუნებული ხართ, რომ მას საკმარისად სუფთად ამზადებენ. ბაზარში უცნობი ადამიანებისგან მაწვნის შეძენას არ გირჩევთ.
სამწუხაროდ, კუსტარულად დამზადებული მაწვნის ფალსიფიცირების შემთხვევებიც ხშირია. ყველაზე ხშირად მაწვნისათვის წყლით გაზავებულ რძეს იყენებენ, შემდეგ კი ამ ნაკლის დასაფარად და მაწვნისათვის სისქის მისაცემად პროდუქტს სახამებელს უმატებენ. ამ ფალსიფიკაციის აღმოჩენა ძალიან იოლია - ჩააწვეთეთ მაწონში ერთი წვეთი იოდის ხსნარი. თუ ის გალურჯდა - ესე იგი, მაწონი ფალსიფიცირებულია.
იხილეთ სრულად: mkurnali.ge