რა არის დისმორფია: რატომ ეძებენ ქალები მუდმივად დეფექტებს საკუთარ გარეგნობაში - Marao

პანდემიის შუაგულში - იმ დროს, როდესაც ჩვენ მკაცრად გვიკრძალავდნენ სამედიცინო დაწესებულებებში ვიზიტს განსაკუთრებული მიზეზის გარეშე - მხოლოდ დიდ ბრიტანეთში, პლასტიკურ ქირურგებთან კონსულტაციების რაოდენობა 70%-ით გაიზარდა. ჰარვარდის სამედიცინო სკოლის პროფესორი შადი კუროში ამბობს, რომ ასეთი მკვეთრი ცვლილების ერთ-ერთი მთავარი მიზეზი საკუთარ თავთან დიდი ხნით მარტო ყოფნა იყო.

ყველაფერი ჯერ კიდევ 2016-2017 წლებში დაიწყო - პანდემიამ მხოლოდ გააუარესა სიტუაცია. დღევანდელი თაობა, პრინციპში, უფრო მგრძნობიარეა ამ თემის მიმართ, შფოთვა თაობა Z-ის ერთ-ერთი დამახასიათებელი ნიშანია. Foreo-ს მიერ ჩატარებულმა გამოკითხვამ აჩვენა, რომ ქალების 61% განიცდის „შედარებისა და სასოწარკვეთის“ სინდრომს. სოციალური მედიის სულ უფრო „გაფილტრულ“ სამყაროში გასაკვირი არ არის, რომ ქალები და მამაკაცები გაზრდილი ზეწოლის ქვეშ არიან. ოთხი წლის წინ მეცნიერები უკვე საუბრობდნენ ეგრეთ წოდებულ სნეპჩატ-დისმორფიაზე - ფსიქიკურ აშლილობაზე, რომელიც გამოწვეულია ფილტრებით გადაჭარბებული გატაცებით. 2019 წელს, Instagram-მა ეფექტებიც კი აკრძალა, რომლებიც გარდაქმნის გარეგნობას. მაგრამ გარეგნობით უკმაყოფილო ადამიანის შეჩერება შეუძლებელი გახდა. საბოლოო ჯამში, ისინი პლასტიკური ქირურგის კაბინეტში აღმოჩნდებიან - და ყველაზე ირეალური მოთხოვნებს აყენებენ. „ჩემმა ერთ-ერთმა პაციენტმა მთხოვა, რომ ცხვირის წვერი მილიმეტრზე ფართო არ ყოფილიყო. ეს, რომ გაიგოთ, არის ნემსის სისქე" - ამბობს ყბა-სახის ქირურგი.

აშკარაა, რომ სურვილი აბსოლუტურად არაჯანსაღია და ფსიქოლოგის დახმარებას საჭიროებს. ამერიკაში, მაგალითად, რაიმე სერიოზული ჩარევის წინ საჭიროა ფსიქოთერაპევტის კონსულტაცია - და ეს გონივრულია. ჩვენს ქვეყანაში კი ფსიქიკური აშლილობის მქონე პაციენტს არცერთი საღად მოაზროვნე ექიმი არ წაიყვანს. შედეგად ადამიანები ფსევდოსპეციალისტების ხელში ხვდებიან, რომლებიც მზად არიან შეასრულონ ნებისმიერი ახირება ფულის გულისთვის. პლასტიკური ქირურგის, ოთარი გოგიბერიძის თქმით, ტუჩები ყველაზე ხშირად ზიანდება: „სულ ახლახან ველაპარაკე ქალს, თვითონ დერმატოკოსმეტოლოგია, მაგრამ სახეზე თითქმის ჯოკერის ღიმილი ადგას. ჰიალურონის მჟავის არაერთი ინექციისა და კონტურის კორექციის შედეგად ტუჩების ფორმა შეიცვალა, მიმიკები დამახინჯდა, სახე კი შეშინებულად გამოიყურება. ”როდესაც ვხედავ, რომ ქალი ცდილობს მოაგვაროს თავისი შინაგანი პრობლემები კოსმეტიკური მანიპულაციების და სილამაზის ინდუსტრიის ყველა მიღწევის ტესტირების გზით, გირჩევთ დაუკავშირდეთ ფსიქოლოგს: სხვა პროცედურა არ გააუმჯობესებს თქვენს პირად ცხოვრებას. ” სოფია ბიგვავა, კლინიკა Bellefontaine-ის მთავარი ექიმი ამბობს, რომ ზღვარი თვითგაუმჯობესების სურვილსა და ფსიქიკურ დაავადებას შორის თხელია, მაგრამ გამოცდილ სპეციალისტს თითქმის ყოველთვის შეუძლია ამის დანახვა. მაგალითად, ჰიალურონის მჟავის გადაჭარბებული დოზა აფერხებს ლიმფურ დრენაჟს. როგორც ჩანს, ადამიანს სურს ნაკლოვანებების აღმოფხვრა, მაგრამ იღებს საპირისპირო ეფექტს - "გაბერილი", შეშუპებულ სახეს. ”ზუსტი დიაგნოზის დასმა შეუძლია მხოლოდ ფსიქიატრს ან ფსიქოლოგს."

როგორ უნდა მიხვდეს ექიმი, რომ დისმორფიით დაავადებულ პაციენტთან აქვს საქმე? - თითოეულ გამოცდილ სპეციალისტს აქვს საკუთარი კრიტერიუმები. ”არის დრო, როდესაც პაციენტს ასი ფოტო მოაქვს ვიზიტზე, კამათობს, იქცევა აგრესიულად და აყენებს აბსოლუტურად შეუძლებელ მოთხოვნებს. პლასტიკური ქირურგი ხშირად მოქმედებს როგორც ფსიქოთერაპევტი. ყველაფერი მნიშვნელოვანია: როგორ შემოდის ადამიანი კაბინეტში, როგორ მესალმება, როგორ დებს ჩანთას... მუშაობის წლების განმავლობაში ვისწავლე ყურადღების მიქცევა ერთი შეხედვით უმნიშვნელო დეტალებზე. მე არასოდეს მივიღებ პაციენტს ფსიქიკური აშლილობის ოდნავი ნიშნითაც კი: ლეგალურად, ექიმი, რა თქმა უნდა, დაცული იქნება მისი თანხმობით, მაგრამ რეპუტაციის რისკები აქ კოლოსალურია“.

ხშირ შემთხვევაში, აშლილობას თან ახლავს დეპრესია. და ასევე - სხვა პრობლემების მთელი რიგი: სოციალური ფობიიდან შფოთვამდე და პანიკურ შეტევებამდე. ფსიქოლოგების აზრით დისმორფიის გამოჩენის ერთ-ერთი მთავარი მიზეზი მშობლების დადებითი გავლენის ნაკლებობაა: „გოგონას, რომელსაც ბავშვობაში არ აქებდნენ, შეიძლება სამომავლოდ საკუთარი თავის სიყვარული გაუჭირდეს.“ ევროპის სამედიცინო ცენტრის (EMC) ფსიქიატრიისა და ფსიქოთერაპიის კლინიკის ხელმძღვანელის ნატალია რივკინას თქმით, სოციალურმა ქსელებმა მხოლოდ გაამწვავა ფსიქიკურ ჯანმრთელობასთან დაკავშირებული ყველა პრობლემა: „ე.წ ფილტრს აქვს პირდაპირი დამაზიანებელი გავლენა ცენტრალურ ნერვულ სისტემაზე, რაც იწვევს დაღლილობას, კონცენტრაციის დაკარგვას, შფოთვას და პანიკასაც კი."