სექსუალურ და მიმზიდველ მოდელს, ნინი ონიანს მოდასა და სილამაზეზე ვესაუბრეთ. მან ასევე გაგვიზიარა თავისი შეხედულებები ქალურ ბედნიერებასა და მოვლილი ქალის თავისებურ ფორმულაზე.
- რომ არა მოდა, როგორი იქნებოდა მსოფლიო?
- ერთფეროვანი და მოსაწყენი.
- ლამაზ სხეულში ლამაზი სულია?
- არა... ყოველთვის არა.
- თქვენი ყოვედღიურობა მაკიაჟის გარეშე წარმოგიდგენიათ?
- ყოველდღიურად მაკიაჟს არ ვიკეთებ, მხოლოდ ტუჩსაცხი და ტუში.
- ქალისთვის ყველაზე ბედნიერი წლები...
- ბედნიერ წლებს, ვფიქრობ, ასე კონკრეტიკა არ აქვს... ბედნიერებას ასაკი არ აქვს.
- ქალი ყველაზე მოდური არის, როცა..
- იხდენს იმას, რაც აცვია, უსვია, ასხია და ა.შ.
- რომ არა კაცები, ქალი მოდას აჰყვებოდა?
- რა თქმა უნდა. ქალები, ჩემი აზრით, ჯერ ერთმანეთს აწონებენ თავს და შემდეგ კაცებს.
- გაქვთ ფერი, რომელსაც არ ღალატობთ?
- შავი.
- მოვლილი ქალის თქვენეულ ფორმულას ხომ არ გაგვიმხელდით?
- Happy Girls are the prettiest... საიდუმლოც ეს არის. არაფერი ალამაზებს ქალს ისე, როგორც ბედნიერი ღიმილი.
-ფიტნესი რა როლს ასრულებს თქვენს და ზოგადად, 21-ე საუკუნის ადამიანის ცხოვრებაში?
- ვფიქრობ, აქტიური და ცხოვრების ჯანსაღი წესი საჭირო კი არა, უბრალოდ, აუცილებელია უკლებლივ ყველასათვის. ჩვენ პატივი უნდა ვცეთ სხეულს, რომელშიც ვიმყოფებით. მე ძალიან მიყვარს ვარჯიში.
- საყვარელსა და მავნე ჩვევას ხომ არ გაგვიმხელთ?
- მავნე ჩვევა სიგარეტია, რომელსაც პერიოდულად ვეტანები. მაქვს პერიოდები, როდესაც საერთოდ არ ვეწევი... 2 წელი, 3 წელი... შემდეგ ისევ ვიწყებ. ასე ვარ წლებია და ბოლომდე ვერ დავძლიე, თუმცა ახლა მეცხრე თვეში ვარ და მთელი 9 თვეა, არც კი გამიხედავს მისკენ.
საყვარელი ჩვევა და ასევე სასარგებლო, ვარჯიშია...
- ”სილამაზე მსხვერპლს მოითხოვსო”, სტერეოტიპია თუ არა? რას იტყვით თქვენი გამოცდილებიდან ამის შესახებ?
- გააჩნია, მსხვერპლში რა იგულისხმება... ნებისყოფას მოითხოვს და ფინანსებს, ეს უფრო რეალურია, ვიდრე მსხვერპლი. კარლ ლაგერფილდმა თქვა: "ამბობენ, სილამაზე მსხვერპლს მოითხოვსო, სისულელეა, სილამაზე მოითხოვს ფინანსებს".
- შეცვლიდით რამეს საკუთარ გარეგნობაში და თუ შეცვლიდით, რას?
- უფფ... კი შევცვლიდი... უბრალოდ ვფიქრობ, რომ რაიმეს რომ ხელი მოვკიდო, იმაზე უკეთესი ვერაფრით ვიქნები, ვიდრე ვარ. თუმცა არ მომწონს ჩემი ცხვირი, ტუჩი... ვისურვებდი, სხვანაირი მქონოდა. მაგრამ დარწმუნებული არ ვარ, რომ სხვანაირი უფრო მომიხდება.
- მაღალქუსლიან ფეხსაცმელზე მეტად თავდაჯერებული ხართ თუ უბრალოდ კედებში?
- რა თქმა უნდა, ქუსლიან ფეხსაცმელში. კედები არ მიყვარს.
- რომელია თქვენი ყველაზე საყვარელი აქსექსუარი და რაიმე მოგონებას ხომ არ უკავშირდება?
- ძალიან მიყვარს ბეჭდები, საათი და სათვალე... ძირითადად, მჩუქნიან და ავტორებიდან გამომდინარე, მოგონებაც არის და საყვარელი ნივთიც.
- ის, თუ რა დევს ჩანთაში, ხშირად ქალის ხასიათს განსაზღვრავს. გაგვიმხელთ, რისი პოვნა შეიძლება ყოველთვის თქვენს ჩანთაში?
- ტანსაცმლიდან დაწყებული, კოსმეტიკა, სუნამო, საფულე, სათვალე... ხშირად ბევრი სხვა უცნაური ნივთიც მოიძებნება... დიდი და ტევადი ჩანთები მიყვარს, რომ ყველაფერი ჩავტიო, რაც მჭირდება.
მერიემ კაკაურიძე