სიახლე

„მთავარი პერსონაჟების პროტოტიპები მე და ჩემი მეუღლე ვართ“ - აკრძალული სიყვარულის ისტორია რომანში „ალფას ვიბრაცია“

„მთავარი პერსონაჟების პროტოტიპები მე და ჩემი მეუღლე ვართ“ - აკრძალული სიყვარულის ისტორია რომანში „ალფას ვიბრაცია“
ადამიანების ნაწილს იმდენად სჯერა ბედისწერის, რომ ყველგან და ყველაფერში მის ნიშნებს ეძებს. ამ მინიშნებების ძიებამ შეიძლება საბერძნეთის ზღვისპირა სოფელშიც კი წაიყვანოს... თანაც ქორწილამდე ორი თვით ადრე.

ასე გარბის ახალგაზრდა მწერალი ქალი ანთია, რომელიც ნინო ამირეჯიბის რომანის, „ალფას ვიბრაცია“ მთავარი გმირია. ავტორი სწორედ ამ რომანით გახდა ლიტერატურული კონკურსის, „გახდი ბესტსელერის ავტორი 2019“ რჩეული.
„ალფას ვიბრაცია“ ჩემთვის საეტაპო ტექსტია, რომელმაც რადიკალურად შეცვალა ჩემი ლიტერატურული ვექტორი“, - ამბობს ნინო ამირეჯიბი
და თავისი რომანის შესახებ გვესაუბრება:


როდის დაიწყეთ წერა და რამ შთაგაგონათ?

წერა დაახლოებით სკოლის პერიოდში დავიწყე. დიდი ხნის განმავლობაში მხოლოდ ჩემთვის ვწერდი და არ მიფიქრია, რომ საჭირო იყო ეს ჩანაწერები ვინმეს ენახა. რამდენიმე წლის წინ ერთ-ერთ ლიტერატურულ კონკურსში გაუბედავად გავგზავნე ჩემი მოთხრობა, რომელიც წლის საუკეთესო ნაწარმოებების კრებულში მოხვდა. ეს სასიამოვნო მოულოდნელობა იყო. მაშინ პირველად დავფიქრდი, რომ რასაც ტექსტებში ვყვებოდი, ჩემ გარდა, სხვა ადამიანებსაც აინტერესებდათ.


რა გახდა შთაგონების წყარო თქვენი რომანისთვის?

რომანში „ალფას ვიბრაცია“ ბევრი რამ რეალური ცხოვრებიდან არის აღებული, თუმცა სად გადის ზღვარი რეალურ და ირეალურ სამყაროს შორის, არცთუ ისე იოლი სათქმელია. ნაწილობრივ, წიგნის მთავარი პერსონაჟების პროტოტიპები მე და ჩემი მეუღლე (პოეტი ზურაბ რთველიაშვილი) ვართ. ანთია ახალგაზრდა მწერალია, რომელიც ერთ დღესაც ხვდება, რომ მთელი მისი ცხოვრება სრული აბსურდია. დროებით ტოვებს ყველაფერს და საბერძნეთში, წმინდა პელაგიას ზღვისპირა სოფელში გაურბის სპექტაკლის საზოგადოებას, რომლის ნაწილიც, რა თქმა უნდა, თვითონაც არის. წიგნში შესული საფოსტო წერილების მიუხედავად, რომელსაც ანთია საბერძნეთში გაცნობილ პოეტს, ანდრეის სწერს აკრძალული სიყვარულის სახელით, იქმნება ისეთი ილუზია, რომ ეს მხოლოდ სასიყვარულო ტექსტზე აგებული ნაწარმოებია, სადაც მთავარი გმირები თავიანთ სასიყვარულო თავგადასავლებს უყვებიან მკითხველს. თუმცა ეს ასე არ არის.

საინტერესოა, რატომ შეარჩიეთ სათაურად „ალფას ვიბრაცია“, ხომ არ არის ეს გამოცანა, რომელიც მკითხველმა უნდა ამოხსნას?

წიგნის სათაურს სიმბოლური დატვირთვა აქვს და თითქოს მთელ ტექსტს გასდევს ფონად. ალფა – როგორც ახალი ეტაპი, როგორც ახალი ცნობიერების საწყისი. თუ როგორ წარვმართავთ ჩვენს ცხოვრებას, ეს უკვე იმ უარყოფით ან დადებით ტალღებზეა დამოკიდებული, რომლებსაც ჩვენი ეთერული სხეული აირეკლავს გარე სამყაროსგან. იქნებ სწორედ ეს ვიბრაციები განსაზღვრავენ თითოეული ადამიანის ცხოვრებაში შესაბამის მოვლენებს...

წიგნი სულ ახლახან გამოიცა. უკვე ხომ არ იღებთ მკითხველისგან წერილებს?

მიუხედავად იმისა, რომ არ არის დიდი დრო გასული, რაც რომანი წიგნის მაღაზიებში გამოჩნდა, რამდენიმე თბილი წერილი უკვე მივიღე, რაც ძალიან სასიამოვნოა. ამბობენ, რომ გულწრფელი ტექსტია. თუ ეს გულწრფელობა მართლაც ჩანს, ძალიან მიხარია.

რას ეტყოდით მკითხველს, რომელიც ახლა იწყებს თქვენი რომანის კითხვას?

ხშირ შემთხვევაში, რთულია თანამედროვე მკითხველს სრულიად ახალი რამ შესთავაზო, რაც ჯერ არასდროს თქმულა, თუნდაც სხვა ფორმით. ხანდახან ტექსტი მხოლოდ და მხოლოდ სიტყვებისა და წინადადებების თამაშს ემსგავსება.
ვფიქრობ, მკითხველს ელოდება საინტერესო თავგადასავალი, სადაც შეხვდებიან გმირებს, რომლებიც ოცნებობენ, უყვართ, სტკივათ, სულს უხუთავთ გარემო, სადაც უწევთ ცხოვრება, მაგრამ მიუხედავად დაბრკოლებებისა, მაინც ირონიულ პრიზმაში უყურებენ ყველაფერს და თანდათან თავისუფლდებიან საზოგადოებაში დამკვიდრებული სოციალური და მორალური პრაქტიკისგან.

ახლა შემოქმედების რა ეტაპზე ხართ, ახალ რომანზე ხომ არ მუშაობთ?

ამჟამად, ვმუშაობ ახალ ლიტერატურულ პროექტზე, რომელიც ორიგინალურ ფორმატში განხორციელდება.
ვფიქრობ, საკმაოდ საინტერესო პროექტია ქართულ და ზოგად ლიტერატურულ სივრცეში. ეს იდეა მე და ჩემს მეუღლეს დაახლოებით ერთი წლის წინ გაგვიჩნდა. მოგეხსენებათ, რომ ჩემი მეუღლე ცნობილი პოეტი და პერფორმანს-არტისტია, მე კი ძირითადად პროზაში ვმუშაობ. ჩვენი თანამშრომლობა მიზნად ისახავს არა მხოლოდ ლიტერატურული ტექსტის შექმნას, არამედ უფრო მეტად ინტერდისციპლინარულ ხასიათს მიიღებს. ეს არ იქნება მხოლოდ ექსპერიმენტული რომანი, რომელიც ვერბალური ჩარჩოებით შემოიფარგლება. ვფიქრობთ, ნაწილობრივ ტექსტი-პერფორმანსი გამოვა.

FaceBook ბეჭდვა
კომენტარები / 0 /
კომენტარი ჯერ არ გაკეთებულა
loadign_gif
გამოკითხვა
რომელ კატეგორიას ნახულობთ ყველაზე ხშირად?
არქივის კალენდარი
e87a93